يەر شارى خەۋەر تورى 27-ئاپرېل خەۋىرى؛ لەگلەك تورى تەرجىمىسى: ئىسرائىلىيە ھۆكۈمىتى شەرقى ئىروسالىم «شەرقى قۇددۇس» تا 77 يۈرۈش ئولتۇراق رايۇن قۇرۇش قارارى چىقارغانلىقىنى بىلدۈردى. تېل ئ‍اۋىۋدىكى « Peace Now» يەھۇدى ئولتۇراق يەرلەر ئىنشائاتى تەكشۈرۈش كومىتىتى باشلىقى Hagit Ofran مۇخبىرغا سۆز قىلىپ، 17-مارتتىكى ئۇمۇمى سايلامدىن بۇيان تۇنجى قېتىم ئىسرائىلىيە كونتروللىقىدىكى شەرقى ئىروسالىمدا ئولتۇراق رايۇن قۇرۇش قارارى چىقارغانلىقىنى بىلدۈردى. بۇ قارارغا ئاساسلانغاندا، 77 بىنانىڭ قۇرۇلىدىغانلىقى، بۇلاردىن 4 ىنىڭ Pisgat Zeev دە، 36 سىنىڭ Neve Yaakov دا قۇرۇلىدىغانلىقى بىلدۈرۈلدى. يەنە بىر تەرەپتىن مەزكۇر تەكشۈرۈش ئورنىنىڭ ئېلان قىلغان يازما باياناتىدا، «شەرقى ئىروسالىمدا قۇرۇلۇشى پىلانلانغان يېڭى ئولتۇراق رايۇنلار بىزگە ئالدىنقى ھۆكۈمەتنىڭ بۇ ھەقتىكى سىياسەتلىرى ھەققىدە يىپ ئۇچى بەرمەكتە، نىتانىياخۇ ئىككى دۆلەت ئارىسىدىكى مەسىلىنى ھەل قىلىش ۋە تىنچلىقنى ئىمكانىيەتىسز قىلىدىغان ئولتۇراق رايۇن قۇرۇش سىياستىنى داۋاملاشتۇرماقتا» دېيىلگەن. ئىسرائىلىيە غەربى قىرغاقنى يەھۇدا ۋە ساماريا شەكلىدە ئاتاپ ئۆز ئەسلى زېمىنى دەپ قارايدۇ. غەربى قىرغاقتا 400 مىڭ، شەرقى قۇددۇستا بولسا 200 مىڭ يەھۇدى ئولتۇراقلاشقۇچى بار دەپ قارىلىدۇ. پەلەستىنلىك دائىرلەر بولسا بۇ ساننىڭ يۇقارقىدىنمۇ كۆپ ئىكەنلىكىنى بىلدۈرىۋاتىدۇ. ئىسرائىلىيە ھۆكۈمىتى دۇنيادىكى نۇرغۇن دۆلەتلەردىن يەھۇدى ئولتۇراقلاشقۇچىلارنى ئەكىلىپ غەربى قىرغاق ۋە شەرقى قۇددۇستا يېڭى قۇرۇلغان ئولتۇراق رايۇنلاردا ئولتۇراقلاشتۇرماقتا. شۇ سەۋەبتىن كۆچمەن يەھۇدىيلار بىلەن يەرلىك پەلەستىنلىكلەر ئارىىسدا پات-پات توقۇنۇش ۋەقەلىرى سادىر بولىۋاتىدۇ.