ئىبراھىم  ئەلەيھىسالام   ئۆز   ئوغلىنى  ئۇنتۇپ  قالمىدى  .  ئۇ  ئوغلىنىڭ  ئەھۋالىغا  ناھايىتى  كۆڭۈل  بۆلەتتى  ھەمدە  بۇ  يەرگە  دائىم  كېلىپ  ئوغلىنى  يوقلاپ  تۇراتتى  .  ئىسمائىل  بارا -بارا   چونە  بولۇپ  ،  مۇستەقىل  تۇرمۇش  كەچۈرەلەيدىغان  ۋە  ئەمگەك  قىلالايدىغان  بولدى .  بىر  كېچىسى  ئىبىراھىم  ئەلەيھىسالام  چۈش  كۆردى  ،  كۆرگەن  چۈشىدە  ئاللا  ئۇنىڭغا  ئوغلىنى   ئۆلتۈرۈپ  قۇربانلىق  قىلىشنى  بۇيرىدى  .  پەيغەمبەرلەرنىڭ  چۈشىدىكى  ئىشلارنىڭ  ھەممىسى  راست  ئىدى  ،  چۈشىدە  كۆرگەنلىرى  چوقۇم  ئەمەلگە  ئاشاتتى  .

زەربە  ئۈستىگە  زەربە  ،  ئاپەت  ئۈستىگە  ئاپەت  ئۈزۈلمەي  كەلمەكتە  ئىدى .  ئىبراھىم  ئەلەيھىسالام   ئۆمرىنىڭ  تولىسىنى  جاپا – مۇشەققەت  ئىچىدە  ئۆتۈزۈپ  ،  ياشانغان  چاغدا ئاران  بىر  ئوغۇل   كۆرگەنلىكىگە  ناھايىتى  خوشال  ئىدى  .  لېكىن ،  كېيىنكى  چاغلاردا  ئۇ  ئوغلىنى  ئانىسى  بىلەن  بىللە  ئادەم  قەدىمى  بېسىلمىغان  بىر  قاقاس  چۆلگە  تاشلىۋېتىشكە  مەجبۇر  بولغان  بولسىمۇ  ،  لېكىن  ئاللا  ئۇلارنى  ئۆز  پاناھىدا  ساقلاپ  ،  ئۆلۈم  يىتىمدىن  قۇتۇلدۇردى  .  ئەمدى  ئوغلى  چوڭ  بولۇپ  يېتىشىپ  كېلىۋىدى  ،  ئۇنى  قۇربانلىق  قىلىشقا  توغىرا  كەلدى .  ئىسمائىل  ئۇنۇڭ  بىردىن  بىر  ئوغلى  ئىدى  ،  ئەمدى  ئۇنۇڭغا  ئوغلىنى  ئۆز  قولى  بىلەن  ئۆلتۈرۈپ  قۇربانلىق  قىلىشقا  توغىرا  كەلدى  . بۇ  نىمە  دىگەن  ئازاپلىنارلىق   ئىش -ھە !  بۇنداق  ئازاپقا  يۈرىكى  تاشتىن  پۈتكەن  ئادەممۇ  چىداپ  تۇرالمايدۇ  .

پەيغەمبەر  دىگەن  بەرىبىر  پەيغەمبەر-دە !   ئىبراھىم  ئەلەيھىساللام  ئۆزىنىڭ  ئاللاغا  بولغان  قەتئىي  ئېتىقادى  بىلەن  بۇ  ئازاپنى  تارتىشنى  راۋا  كۆرۈپ  ، ئاللاھنىڭ  ئىرادىسىگە  بويسۇنۇش  قاراراغا  كەلدى-دە  ،  ئوغلىنىڭ  يېنىغا  بېرىپ :

__  ئى  ئوغلۇم !  ئالاتائالا  چۈشۈمدە   مېنى  سېنى  ئۆلتۈرۈپ   ئۇنۇڭ  يولىدا  قۇربانلىق  قىلىشقا  بۇيرىدى  .   ئۇنۇڭغا  سەن  رازى  بولامسەن  ؟ __ دىدى  .  ئۇنۇڭ  ئۆز  چۈشىدە  كۆرگەنلىرىنى  ئوغلىغا  ئېيتىشى  قۇربانلىق  قىلىشنىڭ  ئاللانىڭ  ئىرادىسى  ئىكەنلىگىنى  ئوغلىغا  بىلدۈرۈش  ئۈچۈن  ئىدى  .

__  دادا  ، __  دىدى  ئوغلى  ئىتائەتمەنلىك  بىلەن  ،  __   سىز  پەرمان  بويىچە  ئش  قىلىڭ !  ئەگەر  بۇ  ئاللانىڭ  ئىرادىسى  بولىدىغان  بولسا  ،  سىز  مېنىڭ  بەرداشلىق  بېرەلەيدىغانلىقىمنى  كۆرەلەيسىز  .

ئاتىغا  ھۆرمەت  قىلىش  __  ئالىجاناپلىق   ،  ئاللانىڭ  ئىرادىسىگە  بويسۇنۇش  ،  ئاللانىڭ  ئورۇنلاشتۇرىشىغا  ئىتائەت  قىلىش  بولسا  تېخىمۇ  ئالىيجاناپلىق  .

دادىسىنىڭ  ئازابىنى  يەڭگىللىتىش   ،  دادىسىغا  ئاللانىڭ  ئەمرىنى  تېخىمۇ  ئوڭۇشلۇق  ئىجىرا  قىلىش  ئىمكانىيىتى  يارىتىپ  بېرىش  ئۈچۈن  ،  ئىسمائىل  دادىسىغا  مۇنداق  دىدى  :

__   دادا  ،  جان  ئاچچىقىمدا  پۇت  ئېتىپ  تولغىنىپ كەتمەسلىگىم  ئۈچۈن  ،  مېنى  مەھكەمرەك  باغلاڭ  ،  كىيىملىرىمنى  سالدۇرىۋېتىڭ  ،  بولمىسا  قان  چاچىراپ  كېتىدۇ  ،  بۇنى  ئانام  كۆرۈپ  قالسا  كۆڭلى  بۇزىلىدۇ  ؛  پىچىقىڭىزنى  بىلەپ  ئىتتىكلىتىپ  ،  كېكىرتىگىمگە  توغرىلاپ  بىر  پىچاق  بىلەن  ئۆلتۈرۈڭ  ،  شۇنداق  قىلسىڭىز  كۆپ  ئازاپلانماسلىقىم  مۈمكىن  .  مەندىن  ئانامغا  سالام  ئېيتىپ  قويۇڭ  .  ناۋادا  خالىسىڭىز  ،  كىيىم -  كېچەكلىرىمنى  ئانامغا  تاپشۇرۇپ  بېرىڭ  .  بۇ  مېنىڭ  ئانامغا  قالدۇرغان  خاتىرەم  بولۇپ  قالسۇن  .  ئانام  مېنى  سېغىنغاندا  ،  كىيىملىرىمنى كۆرسە  كۆڭلى  تەسەللى  تاپار   ھەم  كىيىملىرىمدىن  مېنىڭ  ھىدىمنى  پۇرار  .

__ئى  جېنىم  ئوغلۇم  ، __  دىدى  ئىبراھىم  ئەلەيھىسالام ،  __   سەن  ئاللانىڭ  ئەمرىنى  ئورۇندىشىمغا  ياردەم  بېرەلىسەڭ  ،  بەكمۇ  ياخشى  قىلغان  بولىسەن  !   __   ئىبراھىم  ئەلەيھىسالام  سۆزلەۋېتىپ  ئوغلىنى  باغرىغا  بېسىپ  يۈز – كۆزلىرىنى  توختىماي  سۆيۈپ  كەتتى  .  ئاتا  -  بالا  ئىككەيلەن  بېشىنى  بېشىغا   يېقىشىڭ  قاتتىق  يىغا  -  زار   قىلىشتى .

ئىبراھىم  ئەلەيھىسالام   ئوغلىنىڭ  ئىككى  قولىنى   باغلاپ  ،   يەرگە  ياتقۇزدى – دە  ،  قولىغا  پىچاق  ئالدى .  ئۇ  ئوغلىغا  قاراپ  ،  كۆزىدىن  يامغۇردەك  ياش  تۆكۈپ   ،  ئاھ  ئۇرۇپ  كەتتى  ،  ئارقىدىن  پىچاقنى  ئوغلىنىڭ  كېكىرتىكىگە  توغۇرلاپ  بىر  ئۇرىۋىدى   ،  پىچاق  ئۆتمەي  توختاپ  قالدى  ،   چۈنكى  ئالا  پىچاقنىڭ  بىسىنى  كەينىگە  ياندۇرىۋەتكەن  ئىدى  .

__   ئى  دادا  ،  __   دىدى  ئوغلى  ، __  يۈزۈمنى  دۇم   قىلىڭ  ،  بولمىسا  يۈزۈمنى  كۆرۈپ  ئىچ  ئاغرىتىسىز – دە  ،  ئالانىڭ  ئەمىر – پەرمانىنى  ئىجرا  قىلىشىڭىزغا  دەخلى  يېتىدۇ  .

دادىسى  ئوغلىنىڭ  دىگىنى  بويىچە  قىلدى  ،  ئاندىن  پىچاقنى  ئېلىپ  ئىسمائىلنىڭ  بوغىزىغا  توغۇرلاپ  يەنە  ئۇردى  .  لېكىن  ،  پىچاق  يەنىلا  ئۆتمىدى  .  ئىبراھىم  ئەلەيھىسسالام  تەمتىرەپ  قېلىپ  ،  ئاللاغا  قانداق  قىلىش  توغۇرسىدا  مۇراجىئەت  قىلدى  .  ئالا  ئۇنۇڭغا  :

ئى  ئىبراھىم  !  سەن  چۈشۈڭدىكى  بۇيرۇق  بويىچە  ئىش  قىلدىڭ  .  مەن  بارلىق  ئاق  كۆڭۈل   بەندىلىرىمگە  مۇشۇنداق  مەرھەمەت  قىلىمەن  ،  __  دەپ  ۋەھىي  يەتكۈزدى  .

ئاتا – بالا   ئىككەيلەن  قۇتۇلۇپ  قالدى  .  ئۇلار  ئالاغا  تەشەككۈر  ئېيىتتى   .  شۇنىڭدىن  كېيىن  ئۇلارنىڭ  ئاللاغا  بولغان   ئىشەنچىسى  تېخىمۇ  قەتئىيلەشتى  .

ئاللا   ئىسمايىلنىڭ  بەدىلىگە  قۇربانلىق  قىلىش  ئۈچۈن  جەننەتتىن  بىر  قوشقار  چىقاردى  .  ئاتا -  بالا  ئىككەيلەن  كەينىگە  قارىۋىدى  ،  يېنىدا  بىر  قوچقار  تۇرغانلىقىنى  كۆردى  .  ئىبراھىم  ئەلەيھىسالام  بايا  ئىشلەتكەن  پىچاقنى  قوچقارنىڭ  بوينىغا  توغۇرلاپ  ئۇرىۋىدى   ،  قوشقار  شۇ  ئان  يىقىلدى  ،  يەر  قانغا  بويالدى  .  بۇ  قوچقار  ئىسمائىلنىڭ  بەدىلىگە  ئۆلتۈرۈلدى  .   شۇنۇڭدىن  تارتىپ  ،  بارلىق  مۇسۇلمانلار  بۇ  ۋەقەنى  خاتىرىلەپ   ،  ئاللاغا  ئۆزلىرىنىڭ  تەشەككۈرىنى  بىلدۈرۈش  ئۈچۈن  ،  ھەر  يىلى  شۇ  كۈندە  قۇربانلىق  قىلىدىغان  بولدى  .   قۇربان  ھېيىتنىڭ  كېلىپ  چىقىشى  مانا  شۇنداق  .

مەنبە:چوغلان تورى