4–دەرىجىلىك ئاپەتتىن قۇتقۇزۇش، جىددىي ئەھۋالغا تاقابىل تۇرۇشقا سەپەرۋەرلىك قىلىندى
ئۈرۈمچى لىنىيەسى خەۋىرى: شىنجاڭنىڭ توقسۇن ناھىيەسىدىكى 5.3 بال يەر تەۋرەشتە 1241 ئادەم ئاپەتكە ئۇچرىدى . نۆۋەتتە، ئاپتونوم رايون 4–دەرىجىلىك ئاپەتتىن قۇتقۇزۇش ، جىددىي ئەھۋالغا تاقابىل تۇرۇشقا جىددىي سەپەرۋەرلىك قىلىپ، ئاپەتتىن قۇتقۇزۇش ۋە ياردەم بېرىش خىزمىتىنى قانات يايدۇرماقتا.
8–ئىيۇن سائەت 9:53 تە، توقسۇن ناھىيەسىدە 5.3 بال يەر تەۋرىدى ، سائەت 9:54، 10:00 لاردا يەنە ئايرىم–ئايرىم 4.2 بال ۋە 4.1 بال قالدۇق يەر تەۋرىدى .
ئاپتونوم رايونلۇق خەلق ئىشلىرى نازارىتى ئاپەتتىن قۇتقۇزۇش ، ياردەم بېرىش باشقارمىسىنىڭ مۇئاۋىن باشلىقى ئىسھاق ئىبراھىمنىڭ تونۇشتۇرۇشىچە ، بۇ قېتىمقى يەر تەۋرەشتە توقسۇن ناھىيەسىدىكى 1241 ئادەم ئاپەتكە ئۇچرىغان ، 324 ئائىلىنىڭ 1335 ئېغىز ئۆيى زىيانغا ئۇچرىغان ، بۇنىڭ ئىچىدە 50 دېھقان–چارۋىچى ئائىلىسىنىڭ 168 ئېغىز ئۆيى خەتەرلىك ئۆيگە ئايلىنىپ قالغان بولۇپ ، ئولتۇرۇشقا بولمايدىكەن ، 274 ئائىلىنىڭ 1135 ئېغىز خۇسۇسىي ئۆيى يېرىلىپ كەتكەن ، ھويلا تاملىرى ئۆرۈلۈپ چۈشكەن ، بەش كالا–قوي قوتىنى ئۆرۈلۈپ چۈشكەن . بۇنىڭدىن باشقا ، بۇ ناھىيەنىڭ بوستان يېزىلىق ئوتتۇرا مەكتىپىنىڭ 24 ئېغىز سىنىپىنىڭ تاملىرىغا چاك كەتكەن ، يىلانلىق يېزىلىق دوختۇرخانىنىڭ سەككىز ئېغىز كېسەلخانىسىنىڭ تاملىرى يېرىلىپ كەتكەن . ھازىرغىچە ، ئادەم ئۆلۈش–يارىلىنىش مەلۇماتى تاپشۇرۇۋېلىنمىغان .
يەر تەۋرەش ئاپىتى يۈز بەرگەندىن كېيىن ، ئاپتونوم رايونلۇق پارتكوم ، ھۆكۈمەت يۈكسەك ئەھمىيەت بەردى ، ئاپتونوم رايونلۇق پارتكومنىڭ مۇئاۋىن شۇجىسى ، ئاپتونوم رايوننىڭ رەئىسى نۇر بەكرى دەرھال كۆرسەتمە بېرىپ ، ئاپەتكە تاقابىل تۇرۇش ، ئاپەتتىن قۇتقۇزۇش خىزمىتىنى پۈتۈن كۈچ بىلەن ياخشى ئىشلەشنى تەلەپ قىلدى . ئاپتونوم رايونلۇق خەلق ئىشلىرى نازارىتى دەرھال 4–دەرىجىلىك ئاپەتتىن قۇتقۇزۇش، جىددىي ئەھۋالغا تاقابىل تۇرۇشقا سەپەرۋەرلىك قىلدى ھەمدە ئاپەتتىن قۇتقۇزۇش خىزمەت گۇرۇپپىسىنى دەرھال ئاپەت رايونىغا بېرىپ ئەھۋال ئىگىلەش ، ئاپەتكە ئۇچرىغانلاردىن ھال سوراش ، ئاپەتتىن قۇتقۇزۇش خىزمىتىگە يېتەكچىلىك قىلىشقا ئەۋەتتى . توقسۇن ناھىيەلىك پارتكوم، ھۆكۈمەتمۇ ئەڭ تېز سۈرئەتتە ئاپەتكە ئۇچرىغان ئاممىنى جىددىي تارقاقلاشتۇرۇپ ، تېخىچە خەتەرلىك ئۆيلەردە ئولتۇرۇۋاتقانلارنى بىخەتەر جايغا يۆتكىدى ھەمدە دەرھال 500 مىڭ يۈەن ئاپەتتىن قۇتقۇزۇش جىددىي مەبلىغى ۋە 50 ئاپەتتىن قۇتقۇزۇش چېدىرى ئاجرىتىپ ، ئاپەتكە ئۇچرىغان ئاممىنىڭ تويۇنۇش ، كىيىنىش، ئولتۇراقلىشىش، داۋالىنىش قاتارلىق ئاساسىي تۇرمۇشىنى كۆڭۈلدىكىدەك ئورۇنلاشتۇردى . توقسۇن ناھىيەلىك ئوت ئۆچۈرۈش تارماق ئەترىتى قۇتقۇزۇشنى پائال قانات يايدۇردى ، تۇرپان ۋىلايەتلىك ئوت ئۆچۈرۈش ئىدارىسىمۇ دەرھال خەتەردىن قۇتقۇزۇش، ياردەم بېرىش ئاپتوموبىلىدىن تۆتنى ئاجرىتىپ ، توقسۇن ناھىيەسىنىڭ قۇتقۇزۇش ھەرىكىتىگە ياردەم بەردى.
نۆۋەتتە، ئاپەت رايونىدىكى تۈرلۈك قۇتقۇزۇش خىزمەتلىرى تەرتىپلىك ئېلىپ بېرىلىۋاتىدۇ ، ئاپەتكە ئۇچرىغان ئاممىنىڭ كەيپىياتىمۇ تۇراقلاشتى . يەر تەۋرەشنىڭ تەسىرىدە، لەنجۇ–شىنجاڭ تۆمۈريولىنىڭ ئۈرۈمچىدىن شاپتۇلغىچە بولغان ئارىلىقىدا ۋە جەنۇبىي شىنجاڭ تۆمۈريولىنىڭ مەلۇم بۆلىكىدە بىر مەزگىل تۇرۇپ قالغان يولۇچىلار پويىزى ۋە يۈك پويىزىمۇ نورمال قاتناشقا باشلىدى .
