داۋاملىق ئالدىڭىزغا قاراڭ
ھەيۋەتلىك بىر دەرەخنىڭ ئاستىدا ناھايىتى ئاجىز بىر گۈل ئۆسۈپتۇ. گۈل دەرەخنىڭ ئۆزىنى دائىم قوغداپ تۇرۇشى بىلەن ھېچقانداق بوران - چاپقۇننىڭ ئۆزىگە ئازراقمۇ زىيان سالالماي كېلىۋاتقانلىقىدىن بەكمۇ خۇشال بولۇپ، دۇنيادىن بىغەم يۈرۈپتۇ.
بىر كۈنى بىر نەچچە دەرەخ كەسكۈچى كېلىپ، ھېلىقى ھەيۋەتلىك دەرەخنى ھەرىدەپ ئېلىپ كېتىپتۇ. گۈلنىڭ بۇنىڭدىن كۆڭلى ناھايىتى يېرىم بولۇپ: «ئى تەڭرىم، مەن كۈچلۈك قوغدىغۇچىمدىن ئايرىلىپ قالدىم. بۇنىڭدىن كېيىن كۈچلۈك بوران چىققاندا ۋە قاتتىق يامغۇر ياغقاندا قانداقمۇ قىلارمەن...» دەپ ھەسرەت ياشلىرىنى تۆككىلى تۇرۇپتۇ.
بۇ ئەھۋالنى كۆرۈپ تۇرغان ئانچە يىراق بولمىغان جايدىكى بىر دەرەخ گۈلگە شۇنداق تەسەللى بېرىپتۇ:
ـــــ ھەرگىز ئۇنداق ئويلىمىغىن، دەل سېنىڭ ئويلىغىنىڭنىڭ ئەكسىچە، سەن ئۇ دەرەخنىڭ سايىسىدىن قۇتۇلدۇڭ. ئەمدى سەن قۇياشنىڭ ئىللىق نۇرىدىن ۋە خاسىيەتلىك يامغۇردىن بىۋاستە بەھر ئالالايسەن. غوللىرىڭ تېخىمۇ كۈچلىنىپ، ئېچىلغان گۈللىرىڭ قۇياش نۇرىدا كۆزلەرنى قاماشتۇرىدۇ - دە، كىشىلەر سېنىڭ ئاجايىپ چىرايلىق گۈل ئىكەنلىكىڭنى كۆرۈپ، ساڭا تولىمۇ ھەۋەس قىلىشىدۇ!
ھېكمەت: ھەر قانداق بىر تاللاش يېڭى بىر پۇرسەتنى يارىتىدۇ، بەزىدە ئۇزاق ۋاقىت بېقىنىپ ياشاپ كەلگەن نەرسىلىرىمىزدىن ئايرىلغىنىمىزدا تەبىئىيلا ئازابلىنىمىز، ئەمما بۇ خىل ئايرىلىشقا ئويلىمىغان بەخت ۋە پۇرسەتلەر يوشۇرۇنغان بولۇشى مۇمكىن. شۇڭا داۋاملىق ئالدىمىزغا قارىشىمىز كېرەك. يادىمىزدا بولسۇن، قاراڭغۇ كېچىنىڭ كەينىدىن ھامان يورۇق تاڭ ئاتىدۇ.
مەنبە: ئۈرۈمچى كەچلىك گېزىتى | 
يوللانغان ۋاقتى 2010-12-29 23:20
يوللانغان ۋاقتى 2010-12-30 00:24