يازغاندىمەن قانچە لىرىكا ،
سەن ئۈچۈنلا پەقەت سەن ئۈچۈن.
بۇ يۈرەكنى ئوتقا سېپ قويۇپ،
پەرۋاسىزلا يۈرىسەن نېچۈن؟ 
سۆيگۈ تىلەپ تەلمۈرەر ساڭا،
مىسرالىرىم مىسكىن بىچارە.
ساڭا بولغان ئوتلۇق سۆيگۈمنى ،
چۈشەنمىسەڭ مەندە نە چارە؟
شئىر يازدىم شائىر ئەمەسمەن،
بەلكى كۆيچىڭ مەن سېنىڭ پەقەت.
يوللۇرۇڭغا چېچىلغان تۇيغۇم،
ئايىقىڭغا باش قويار ئەبەت.
شائىرلىقنى تۇغار ئاشىقلىق،
شۇ سەۋەپتىن ئالدىم قەلەمنى.
ھېچكىشىگە سالمىسۇن تەڭرىم،
ماڭا سالغان بۇ دەرىت-ئەلەمنى.
ھىجرانىڭنىڭ دارىدا تۇرۇپ،
بىر ئازاپتىن ئىڭرايدۇ يۈرەك.
بۇ يۈرەكنىڭ دەرىتلىك ھالىنى،
كىم چۈشىنەر سېنىڭدىن بۆلەك؟
قەلىمىمدىن تۆكۈلگەن ھەرگىز،
سىياھ ئەمەس تومۇردىكى قان.
بىلسەڭ نىگار غەمكىن بىر يۈرەك،
ھېجرانىڭدا تەسلىم قىلار جان.
سەن مىسالى بىر مەشۇق سەنەم،
ئاشىقىڭمەن يىگانە غېرىپ.
گۇمانلانساڭ سۆيگۈمدىن ئەگەر،
بۇ يۈرەكنى كۆرۈپ باق يېرىپ.
مىسرالارغا بېرەلمەي بەرداش،
ئۇپراپ كەتتى سەبى يۈرىكىم.
مەيلى نەدە بولساڭ بول ئامان،
شۇدۇر مېنىڭ كۆڭۈل تىلىكىم. 
مەنبە: خاتىرەمدىن بۇ يازمىنى ئاخىرىدا iziz تەھرىرلىگەن. ۋاقتى 2011-4-29 18:46
| 
يوللانغان ۋاقتى 2011-4-29 18:18
