ئۈمىدجان قادىرى: سۆيگۈنىڭ ھۆسنى

ئۈمىدجان قادىرى

سۆيگۈنىڭ ھۆسنى

ئۈمىدجان قادىرى

سازىنى تۈزگەي مۇھەببەت

نۇر ئارا ئۈزگەن قاراقنىڭ سەن ئىرۇر دەرمانى گۈل،
تاڭ سۆيۈپ بەرگىڭنى شەبنەم قاندۇرار ئارمانى،گۈل.

بالقىغاي جىلۋەڭدە رەڭلەر ئۇبىلەن دۇنيا گۈزەل،
سازىنى تۈزگەي مۇھەببەت،كەلتۈرۈپ پەرمانى گۈل.

ھۆسنى ئاي جانانغا تىمسال جان كۈلەر نازىڭ ئارا،
ياشنىغاي ئاشىق ۋىسالى، قاڭقىغان ئاسمانى گۈل.

ئۇيقۇدىن ئەيلەپ بىدار ھەم بۇلبۇلى بىچارىنى،
ئىشقىدا داغلاپ ۋۇجۇدنى، كۆيدۈرەر چوغدانى گۈل.

گۈلخۇمارلىقتىن تەۋەللۇت بۇ ئۈمىدجانمۇ يەنە،
يەتكۈچە قارلار نەپەسكە كۈيلىگەي چەندانى گۈل.

مۇسىبەتنامە

(مەرھۇم يازغۇچى سۇلتان ھاشىمغا مەرسىيە)

قازاغا بىئامال بەندە،بۈگۈن بىر تۆھپىكار كەتتى،
مۇسىبەت ئىلكىدە بوغدا تۆكۈپ ياش زارۇ-زار،كەتتى.

يۈرەككە رىشتىلەر چەگكەن ئىدى ئۇ«قوش تىرەك»*لىكتە،
قەلەمدىن بالقىتىپ دۇرنى ئېتەتتى دىل خۇمار،كەتتى.

قاچانلا كۆرسە كىم خۇشخۇي،قارايتتى بارچىگە تەكشى،
سىپايە،ساددا،تۈزلۈكتە كۆڭۈللەرنى ئۇتار كەتتى.

ئۇ كەتتى،تۆھپىسى قالدى مۇبارەك ئەجرىدىن يازما،
ئەزىم يۇرت باغرىدا مەڭگۈ يىقىلماس بىر مۇنار،كەتتى.

يېشىدا پۈتتى يادنامە پىغان يۇتقان ئۈمىدجانمۇ،
چېقىلغان باشتا چاقماقلار ئاڭا ماتەم تۇتار،كەتتى.

«قوش تىرەك»*ـــــ مەرھۇم سۇلتان ھاشىمنىڭ شۇ ناملىق ھېكايىسى


سەھرا

ئېسىڭدە بارمۇ  ھازىرمۇ ، سەبى چاغ ئوينىغان سەھرا؟
كىرىپ باغلارغا سۈڭگۈچتىن ، ئۆرۈكلەر بويلىغان سەھرا؟!

ئۈزۈپ كۆك غورا شاخلاردىن ، كورۇسلاپ  چاينىشىپ لەززەت!
ئىچىپ يوبداننى كۆك باشلىق ،مەزە قىپ تويمىغان سەھرا!؟

قۇيامسەن ھېلىھەم دوراپ ، كۈيى خۇش ئەزگۈ تورغاينى،
مۈكۈشمەك ئوينىشىپ قاچسام ، تۇتۇپ سەن قويمىغان سەھرا؟

كېيىكتەك قېيغېتىپ-تاقلاپ ، سۈزۈك ھېس شۇقەدەر غەمسىز،
قازاننى چالمىدىن راسلاپ،ئېتىپ ئاش  ‹‹ تويلىغان ›› سەھرا؟

مۇبادا رەۋىتىڭ بولسا ، كېلىۋەر ، ياش تۇرار كەچمىش ،
ئۈمىدجان زارىقىپ يولغا ئۆزۈڭدۇر ئويلىغان،سەھرا.

رەسسام

چىۋەر قولدا كۈلەر گۈلشەن،نىگارىڭدۇر بوياق،رەسسام،
تەپەككۇرلەر ئۇچار كۆكتە،نۇرانە جۈپ قاراق،رەسسام.

ئىجادىڭدىن تۆكۈپ سۆيگۈ،ئۇلاپ دىلنى كۆڭۈللەرگە،
كۆيۈپ گۈلگە ناۋا تۆككەن مىسال بۇلبۇل سىياق رەسسام.

تونۇتماقلىق جاھان-ئەلگە ھايات رەڭدارلىقىن ئارمان،
رەسىملەردە بېشارەتنى بېرىپ،يەشكەن سوراق رەسسام.

گويا جەننەت قىلىپ سىزغاچ ۋەتەننىڭ كەڭ دالاسىنى،
چىگىلدى رىشتە چىڭ- مەھكەم كۈۋەجەپ ئوت پىراق،رەسسام.

ئۈمىدۋارلىق،گۈزەللىكنى تېپىپ سەندىن ئۈمىدجانمۇ،
يازار ئەشئار،بۈيۈك مەقسەت،ئەمەس مەنزىل يىراق،رەسسام.

سۆيگۈنىڭ ھۆسنى

ئۇيقۇغا چۆككەن زېمىن، ئۈزمەكتە كۆكتە ئاي كۈلۈپ،
بىر يىگىت مەمنۇن شۇتاپ،كۈتكەن نىگارنى جاي،كۈلۈپ.

ئاي سالار سىنچى نەزەر دەريا-ئېقىندىن، باغقىچە،
كۈيلىرى چەككەي رۇجەك، ئىلھام يىگىتكە باي،كۈلۈپ.

مەۋجۇدات تاتلىققىنا ئۈپكەي چۈشىنى ئۇيقۇدا،
پاھ،شېرىن لەززەت ئارا گۈللەپ ھەۋەسلەر راي كۈلۈپ.

ئاي، يىگىت ھەرئىككىسى قۇچقاچقا سۆيگۈ ۋەسلىنى،
تۇيغۇلار ئەۋجى قىيام، پەسلى باھاردا ماي كۈلۈپ.

سۆيگۈنىڭ ھۆسنى بىلەن نۇرلار سۈمۈرگەچ ئارمىنى،
ئۆزىگە قانداق بېرەر ئەمدى ئۈمىدجان«ھاي!»،كۈلۈپ.

تىنىمسىز تەۋرىنەر كىرپىك

ھېدىم سىڭمەكتە تۆت تامغا،تۇرارمەن ئۈشبۇئان تەنھا،
تاپالماي يەككىلىك بەرھەم،تۇغۇلغاي چۆلسىمان تەنھا.

تىنىمسىز تەۋرىنەر كىرپىك،بوراندا مىسلى قامغاقتەك،
كۆڭۈل ئەسرارغا مۇڭداش يوق سەھەر،شام ھەرزامان تەنھا.

ۋۇجۇدۇم مۈلكىنى پۈتكۈل خىياللار ئورىغاي تەگسىز،
قەيەردە ۋەسلىمە ئىمكان؟بولۇرمەن دەرگۇمان،تەنھا.

چېكىلمەس ئىشكمۇ بىرمەرتە،شامالدىن ئۆزگە نەتاۋۇش!؟
قۇلاق زارىقتى،تالجىقتى،تىڭىرقار بىرلا جان تەنھا.

ئۈمىدجان ئۆگزىسى تەشنا لىرىكا سورىغان قۇشقا،
بىراق،تۇرماقتا ھەرباقسام چېچىلغان ھەممە دان،تەنھا.

باھار بولسۇن تامام ئۆمرۈڭ

كۆڭۈل تەشناسى ئۇلغايغاي،چىنەڭنى قۇچسا كۆز ھەرئان،
تومۇزلار تەپتى ئارماندىن كۆچەر ئۈستۈڭگە سۆز ھەرئان.

سېپى ئەپكەشتە چەككەن ئىز مۆرەڭگە كەشتە تۇغقاندۇر،
قېتىق ساتقان پۇلۇڭ ھۆسنى گويا گۈلشەندە توز ھەرئان.

قېتىقنىڭ رەڭگى ئەسلەتسە غۇبارسىز شۇ كۆڭۈللەرنى،
تىلەپ ئاقلىقنى ھەر دىلغا،ئاقار تاڭلارغا يۈز ھەرئان.

قولۇڭ سۈتنى قىيام ئەتكەن يىراق بولسۇن زەخىملەردىن،
باھار بولسۇن تامام ئۆمرۈڭ،يولۇقماي مەڭگۈ كۈز ھەرئان.

قېتىقتەك ئاق بولۇپ كوچاڭ،زەپەر-نۇسرەتكە يار بولغىن،
شۇچاغ خۇشنۇد ئۈمىدجانمۇ يازار ئەشئارنى ئۇز ھەرئان.

خۇشال دېھقان

كۆڭۈل خۇشنۇد لىرىك كۈيدىن،ھالاۋەتلەر سۈرەر دېھقان،
گۈلىستاندا گويا بۇلبۇل ئۇرۇپ خەندان كۈلەر دېھقان.

توراشقا يوق سېپىل يولنى،قەدەم-ئىزلار قۇچار گۈلنى،
شەھەر رەستە ئارا شۇنچە راۋان دادىل يۈرەر دېھقان.

يېتەكلەنگەچ ئۇنىڭ روھى گۇگۇم قونماس شەمىستانغا،
سۈرەتلەنگەن ھېكايەتتە ئۆزىن شاھ دەپ بىلەر دېھقان.

تېپىپ نۇسرەت ئەجىر-مېھنەت،زېھىن-ئاڭدا ئۇلۇغ ھېكمەت.
نىگار چېھرى بېرىپ ئامەت،رېئال جەننەت كۆرەر دېھقان.

«جاپاكەش»كە قۇياش تەقدىم،زىيا جىلۋە قىلار باشتا،
سەپەر يۈرگەن ئۈمىدجانغا گۈزەل مەنزىل تىلەر دېھقان.

ھەۋەس بىخلاندى ئارماندىن

مۇقەددەس جىگدىزار باغرى،سۆيۈپ جۈپ ئىزنى يول،قالدى،
تېپىشماق ئېيتىشىپ كۆكلەم،تۆكۈشكەن سىرمۇ مول قالدى.

يېقىملىق سايرىغان تورغاي كۈيىگە جۆر بولۇپ خۇشۋاق،
ئېتىزلار قوينىدىن تەرگەن جۇلالىق رەڭگى گۈل قالدى.

شېرىن ھېسلاردا زەپ تاتلىق سۆيۈشكەن شۇ ئۇلۇغ دەملەر،
ئۈزۈپ شادلىقتا ئۆركەشلەپ،گىرەلەشكەن كۆڭۈل قالدى.

ھەۋەس بىخلاندى ئارماندىن غۇبارسىز شۇنچە پاك-پاكىز،
جىپىسلاشقان نەپەس ئوتلۇق،بويۇن ئۈپكەنچە قول،قالدى.

چىغىرنى قورشىبان جىگدە تۇرار،(پاك دىلغا شاھىد ئۇ)،
قىلىپ ئىخلاس ئاشۇ جايغا ئۈمىدجان بىر ئوغۇل،قالدى.

ھەۋەس شەيتانى كۈيلەتسە

ئاتالدىم بەندىسى دەرتنىڭ،ئازاپلارنى ھاپاش ئەيلەپ،
مۇھەببەت تىغلىرى تىلدى يۈرەكنى،كۆزنى ياش ئەيلەپ.

كېتىپ قالدىڭ قاچانلاردا ئۇۋاسىن تاشلىغان قۇشتەك،
شامالغا ئۇچتى پەريادىم،نىگار باغرىڭنى تاش ئەيلەپ.

گۇگۇم ھېيتلايدۇ خانەمدە،زىيالار سەن بىلەن كەتكەچ،
غەمۇ-ھىجراندا ئۆتكەن كۈن،زۇقۇم يۇتماقتا ئاش ئەيلەپ.

ئاداشتىڭ بەلكى سەزمەستىن،ھەۋەس شەيتانى كۈيلەتسە،
چۈشەر جايىڭنى بىلمەي ھېچ،ئۇچارسەن قانچە شاش ئەيلەپ.

تېپىپ ئالغۇنچە ئەقلىڭنى،ئۈمىدجان ئايلىنار چالغا،
كېلىش ئىمكانى بولغايمۇ ئۇچاغ كەچمىشنى پاش ئەيلەپ؟!

(ئاپتۇر:گۇما ناھېيە پىيالما يېزىلىق خەلق ھۆكۈمىتىدە)
تېلىفۇن: 13094090085
皮山县皮亚勒玛乡人民政府：吾米提江卡迪尔
邮号：845154

halisbay

سىزنىڭ مۇشۇنداق ئېسىل غەزەللىرىڭىز مۇنبىرىمىزنى گۈل-گۈلىستانلىققا ئايلاندۇرۇپ كېلىۋاتىدۇ. قەلەم تۇتقان قوللىرىڭىز تالمىغاي،تەپەككۇر دۇردانىلىرىڭىز ئۈزۈلۈپ قالمىغاي دوستۇم

yultuz

غەزەللىرىڭىز  بىر - بىرىدىن  ئىسىل چىقىپتۇ . تىرىشچانلىق  ،  ئىزدىنىشچانلىق روھىڭىزدىن  تەسىرلەندىم . بەرىكەتلىك  بولغايسىز !

HOJAKABIZ

ئۈمىد جاننىڭ بىر-بىرىدىن ياخشى غەزەللىرى مۇنبەردىن ئورۇن ئېلىپ ، ئوقۇرمەنلەرنىڭ كۆڭۈل ئېتىزىنى توختاۋسىز سۇغۇرىۋاتىدۇ.مەنمۇ ئەشۇ بەھىرلەنگۈچىلەرنىڭ بىرى. يەنە بىر تەكلىپىم ئۈمىتجان دېسە مەن ئۇنىڭ جىسمىنى تونىغاندىن باشقا ئۇنىڭ ئۆزىگە خاس ئۇسلۇپ بىلەن يازىدىغان ئالماش قاپىيىلىك بارماق ۋەزىنلىك يەڭگىل،تاغ سۈيىدەك شىلدىرلاپ ئېقىپ تۇرىدىغان سۈزۈك مىسرالىرى بىلەن بەكراق تونۇش ئېدىم. دېمەكچى بولغان گېپىم سەل ئۇزىراپ كەتكەن بولسىمۇ يەنە ئەشۇ سۈزۈك مىسرالارنى سېغىنماقتىمەن! بۇ بىر خاسلىق ئېدى...