قايغۇلۇق خەۋەر

بۈگۈن، يەنى 2009 - يىل 1 - ئاينىڭ 28 - كۈنى ئۈرۈمچى ۋاقتى سائەت 5 تە ئۆزىنىڭ ئويناق، لىرىك غەزەللىرى بىلەن ئۇيغۇر شېئىرىيەت ئاسمىنىنى نۇرلاندۇرۇپ كېلىۋاتقان تالانتلىق شائىرىمىز مۇھەممەت خېۋىر ئەپەندى مېڭىگە قان چۈشۈش كېسىلى سەۋەبىدىن داۋالاش ئۈنۈم بەرمەي، 54 يېشىدا بىز بىلەن مەڭگۈلۈك ۋىدالاشتى.

 مەرھۇم ئۆزىنىڭ سان جەھەتتىن كۆپ، سۈپەت جەھەتتىن يۇقۇرى بولغان پاساھەتلىك غەزەللىرى بىلەن ئۇيغۇر شېئىرىيىتى ئۈچۈن ئاجايىپ زور تۆھپىلەرنى قوشقان ئىدى. بۈگۈن چۈشتىن باشلاپ، دىيارىمىزدىكى بىرنەچچە قەلەمكەش ئاغىنىلەر شائىرنىڭ ئۈرۈمچىدىكى دوختۇرخانىدا ئىكەنلىكى، كېسەللىك ئەھۋالىنىڭ بەكمۇ خەتەرلىك ئىكەنلىكى ھەققىدە ئەندىشىلىك خىياللارنى قىلىپ ئولتۇرۇشقان ئىدۇق، كەچقۇرۇن يەنە سائەت 5 تىن سەل ئۆتكەندە، تۇيۇقسىز ئاغىنىمىز پەرھات كازىمنىڭ يانفونى ئەنسىز سايراپ، شائىرنىڭ ۋاپات بولغانلىق خەۋىرى كەلدى. ئولتۇرغانلار ھەممىمىز بۇ خەۋەرگە ئىشەنگۈمىز كەلمەي، روھىمىز چىقىپ كەتكەندەك تۇرۇپلا قالدۇق. بىراق، ئىشەنمەسلىككە ئامال يوق ئىدى، چۈنكى، بىزگە بۇ قايغۇلۇق خەۋەرنى دەل مەرھۇمنىڭ ئۆز ئوغلى يەتكۈزگەن ئىدى.

نە ئامال؟! مۇسىبەت يۈرىكىمىزنى قۇرۇتتەك يېمەكتە ئىدى. ئۇيغۇر ئۆزىنىڭ يەنە بىر ئوت يۈرەك، تالانتلىق شائىرىدىن ئايرىلدى...شېئىرىيەت ئاسمىنىمىزدىن يەنە بىر يورۇق يۇلتۇز ۋاقىتسىز ساقىدى... ئاللاھ ئۇنىڭ ياتقان يېرىنى جەننەتتە قىلغاي!!!