ساخاۋەتچى ئاتىلار توققۇزتارادىكى ئاپەتكە ئۇچرىغان ئاممىدىن سەمىم

تەڭرىتاغ

	ساخاۋەتچى ئاتىلار توققۇزتارادىكى ئاپەتكە ئۇچرىغان ئاممىدىن سەمىمىي ھال سورىدى ئۆز مۇخبىرىمىز نىجات نىياز خەۋىرى ، فوتوسى : دېكابىر ئايلىرى يېقىنلىشىپ قالغان بولسىمۇ ئىلى ئوبلاستى توققۇزتارا ناھىيەسىنىڭ ھاۋاسى ناھايىتى ئىللىق ئىدى ، قۇياش ئۆزىنىڭ سېخىي نۇرىنى پۈتۈن ئەتراپقا چېچىپ ، كىشىلەرگە بىر خىل ئىللىقلىقنى ، ئاسايىشلىقنى ، تېنچلىقنى ھېس قىلدۇرۇۋاتاتتى .  ئۈرۈمچىدىن 800 نەچچە كىلومېتىر يولنى بېىسپ ، توققۇزتارادىكى يەر تەۋرەش ئاپىتىگە ئۇچرىغان ھەر مىللەت خەلقىدىن ھال سوراش مەقسىتىدە توققۇزتاراغا كەلگەن ئۈرۈمچى خەير - ساخاۋەت باش جەمئىيىتى ساخاۋەتچى ئاتىلار كوللىكتىپىدىكى 10 ۋەكىل 13 -نويابىر سەھەردە ناھىيە ۋە يېزا باشلىقلىرىنىڭ يول باشلىشى بىلەن ئاپەت ئەھۋالى بىر قەدەر ئېغىر بولغان توققۇز تارا ناھىيەسىنىڭ دۆڭمەھەللە يېزىسى مۇيۇڭگۈزەر كەنتى ، گۇڭشاڭ كەنتى ، كەسىمبۇلاق كەنتى ، قىزىلنۇر كەنتى ، دۆڭمەھەللە كەنتى ، ئويتام كەنتى ۋە ئۇچقۇن كەنتلىرىگە بېرىپ ، شۇ يەرلەردىكى ئاپەت ئەھۋالى بىر قەدەر ئېغىر ، تۆۋەن تۇرمۇش كاپالىتىدىن بەھرىمان بولىدىغان ئائىلىلەردىن ، پېشقەدەم مائارىپچىلاردىن ، ۋەتەنپەرۋەر دىنىي زاتلاردىن بولۇپ 100 گە يېقىن ئائىلىدىن ھال سورىدى .     ساخاۋەتچى ئاتىلار بۇ قېتىم ئاپەت رايونىغا 70 مىڭ يۈەن پۇل ئېلىپ كەلگەن بولۇپ ، ئۇلار ئۆزلىرى ئاپەت ئەھۋالىغا بېرىپ ، نەق مەيداندا تەكشۈرۈپ ، ھەقىقەتەن قىيىنچىلىقى بار ئائىلىلەرگە 300 يۈەندىن 2000 يۈەنگىچە تارقىتىپ بەردى . ئاپەتكە ئۇچرىغان ئامما ساخاۋەتچى ئاتىلارنىڭ ئۆزلىرىنى يوقلاپ كەلگەنلىكىنى كۆرۈپ ناھايىتى ھاياجانلاندى ، قەلبى چەكسىز سۆيۈندى .     ئۈرۈمچى خەير - ساخاۋەت باش جەمئىيىتى ساخاۋەتچى ئاتىلار كوللىكتىپىنىڭ مەسئۇلى ھەسەنجان ئابدۇراخمان مۇنداق دېدى : بىز تېلېۋىزور ، گېزىت ۋە تورلاردىن توققۇزتارا ناھىيەسىنىڭ يەر تەۋرەش ئاپىتىگە ئۇچرىغانلىقىنى كۆرۈپ ۋە ئاڭلاپ كۆڭلىمىز ناھايىتى يېرىم بولدى ھەمدە دەرھال كوللىكتىپىمىزدىكى ئەزالار ئاپەت رايونىغا پۇل يىغىش قىلىشنى باشلىدۇق ، قىسقىغىنە نەچچە كۈن ئىچىدە 70 مىڭ يۈەن پۇل توپلاندى ، بىز بۈگۈن بۇ پۇلنى ئېلىپ توققۇزتارادىكى ئاپەتكە ئۇچرىغان ھەر مىللەت ئاممىسىدىن ھال سوراۋاتىمىز ، بىزمۇ ناھايىتى خۇشال بولدۇق . يەر تەۋرىگەن بىلەن مېھر - مۇھەببەت تەۋرىمەيدۇ ، كىشىلەرنىڭ ئاپەتتىن كېيىنكى قايتا قۇرۇشقا بولغان ئىشەنچىسى تەۋرەپ قالمايدۇ ، بىز ھەممىمىز بىر ئائىلە كىشىلىرى ، بۈگۈن ئاپەتكە ئۇچرىغان خەلقلەرنىڭ ئاپەتتىن كېيىنكى قايتا قۇرۇشقا بولغان ئىشەنچىسىنىڭ كۈچلۈكلۈكى ، ئىرادىسىنىڭ يۇقىرىلىقىنى كۆرۈپ ناھايىتى خۇشال بولدۇق ، نۇرغۇنلىغان كىشىلەر ئۆزلىرىنىڭ بۇ قىيىنچىلىقنى يېڭىپ كېتەلەيدىغانلىقىنى ئېيتتى . ئىشىنىمىزكى پارتىيە ۋە ھۆكۈمەتنىڭ ياردەم بېرىشى ، قوللىشى ، بىزگە ئوخشاش نۇرغۇنلىغان ياخشى نىيەتلىك كىشىلەرنىڭ ياردىمىدە ئاپەتكە ئۇچرىغان خەلق چوقۇم قايتىدىن ئۆزىنىڭ گۈزەل كەلگۈسىنى قۇرالايدۇ .     توققۇزتارا ناھىيەسى دۆڭمەھەللە يېزىسىنىڭ يېزا باشلىقى تاھىر مۇنداق دېدى : ساخاۋەتچى ئاتىلار ئۈرۈمچىدىن شۇنچە ئۇزۇن يولنى بېسىپ بىزنى يوقلاپ كەپتۇ ، بىز بۇنىڭدىن ناھايىتى سۆيۈندۇق ، ھەر مىللەت خەلقىمۇ ناھايىتى خۇش بولدى ، يېزىمىزدا ئاپەت ئەھۋالى بىر قەدەر ئېغىر بولغاچقا پارتىيە ۋە ھۆكۈمەت يېزىمىزدىكى خەلقنىڭ تۇرمۇشىغا ناھايىتى كۆڭۈل بۆلدى . جۈملىدىن مانا بۈگۈن ساخاۋەتچى ئاتىلارمۇ يېزىمىزغا كېلىپ يېزىمىزدىكى نۇرغۇنلىغان ئاممىنى خۇش قىلدى ، ئۇلارنىڭ ئىشەنچىسىنى تېخىمۇ ئاشۇردى ، مەن مۇشۇ مۇناسىۋەت بىلەن ساخاۋەتچى ئاتىلارغا چىن كۆڭلۈمدىن رەھمىتىمنى بىلدۈرىمەن .     ئۇنىڭدىن باشقا ، ساخاۋەتچى ئاتىلار كوللىكتىپى يەنە ئاپەت رايونىغا 100 يەشىك ‹‹ ئابلاجان نانلىرى ›› ، ۋە شۇ يەردىكى باشلانغۇچ مەكتەپ ئوقۇغۇچىلىرىغا بىر يىللىق 100 سان ‹‹ شىنجاڭ ئۆسمۈرلىرى ›› گېزىتىنى ھەقسىز مۇشتەرى بولۇپ بەردى .       ئىگىلىنىشىچە ، 2011-يىلى 1-نويابىر ئۈرۈمچى ۋاقتى سائەت 6:21 دە، شىنجاڭ ئۇيغۇر ئاپتونوم رايونى ئىلى قازاق ئاپتونوم ئوبلاستىنىڭ غۇلجا ناھىيەسى بىلەن توققۇزتارا ناھىيەسى چېگرىسىدا (شىمالىي كەڭلىك 43.6 گىرادۇس، شەرقىي ئۇزۇنلۇق 82.4 گىرادۇس) ئالتە بال يەر تەۋرىگەن بولۇپ، تەۋرەش مەركىزىنىڭ چوڭقۇرلۇقى 10 كىلومېتىر بولغان .بىر مىنۇتتىن كېيىن، يەنى ئۈرۈمچى ۋاقتى سائەت 6:22 دە، شىنجاڭ ئۇيغۇر ئاپتونوم رايونى ئىلى قازاق ئاپتونوم ئوبلاستىنىڭ نىلقا ناھىيەسى بىلەن كۈنەس ناھىيەسى چېگرىسىدا (شىمالىي كەڭلىك 43.6 گىرادۇس، شەرقىي ئۇزۇنلۇق 82.6 گىرادۇس) 4.1 بال يەر تەۋرىگەن، تەۋرەش مەركىزىنىڭ چوڭقۇرلۇقى سەككىز كىلومېتىر بولغان.

دۆت

	ئاتا مەندىن رازى بول، يولۇمغا دۇئا قىل دىنمىزنىڭ مۇقەددەس پەرىزى بولغان ھەج سەپرىگە تەرەددۇت قىلدىم ،بولسا سېنىمۇ ئاپارغىم بارئىدى بىراق سەن قەتئى ئۇنمىدىڭ؟ -دەپتۇ ئوغۇل ئاتىسىغا شۇ كۆڭلۈڭگە رەخمەت ئۇغلۇم. ساڭا تۆۋەندىكى سۆزلەرنى ئۇدۇن قىلاي - دۇپتۇ بوۋاي ئوغلىغا ھەج سەپىرى ئۇ ئىنتايىن ئۇلۇغ ئىش بالام. ئەمما ئۇنىڭ تۆۋەندىكىچە ئەڭ مۇھىم شەرتلىرى بار،شۇندىلا سىنىڭ ھەج تاۋاپلىرىڭ قۇبۇل بولغۇسى 1.سەپەر خەج-خىراجىتىڭ ھالال مىھنەت تەرىڭ بولىشى ئۇنىڭدا ھەرگىز باشقىلارنىڭ ھارام نىسىۋىسى بولماسلىقى زۆرۈر 2.ھەج تاۋىپىڭغاا ئاتا-ئانا، دوست بۇرادەر، قۇلۇم-قوشنىلىرىڭ سەپىرىڭگە رازى بۇلۇپ دۇئالار قىلىشى زۆرۈر 3.تاپقان پۇل مېلىڭنىڭ 3تىن 2قىسمىنى غېرىپ .مىسكىنلەرگە بەرگەندىن كىيىن قالغان 3تىن بىر قىسىم پۇل مېلىڭ ئاندىن سىنىڭ ھەج خىراجىتىڭ بۇلىدۇ ئوغلۇم. ..... سەن مۇشۇلارنى قىلالىدىڭمۇ؟ سورىدى ئاتا ياق ئاتا ھەببەللى! مۇشۇ ئىشلارنى قىلىپ بۇلۇپ بارساڭمۇ كىچىكمەيسەن ئوغلۇم ،بۇ ئىشلار خۇددى ھەرەمگە بارغاندەكلا ساۋاپلىق ئىشلاردۇر. مۇشۇنداق ساخاۋەتچىلەرنىڭ ئەشۇ قوللىرىنى  قەغەزگە مىڭ نۇسخا كۆپەيتىپ ھەممە مىسچىتلەرگە چاپلاپ قويسام دەيمەن.

igilmes

	ساخاۋەتچىلىرىمىزنىڭ  ئاپەتكە ئۇچۇرغۇچىلارغا     دەل ۋاقتىدا سېھى قوللىرىنى سۇنغانلىقىغا ئالەمچە ئاپىرىن...!

mungdax

	ئۈرۈمچىدىن 800 نەچچە كىلومېتىر يولنى بېىسپ ، توققۇزتارادىكى يەر تەۋرەش ئاپىتىگە ئۇچرىغان ھەر مىللەت خەلقىدىن ھال سوراش مەقسىتىدە توققۇزتاراغا كەلگەن ئۈرۈمچى خەير - ساخاۋەت باش جەمئىيىتى ساخاۋەتچى ئاتىلار كوللىكتىپى تېخىمۇ روناق تاپقاي. ئۇلارنىڭ ئىسانپەرۋەرلىك ۋە ساخاۋەتلىك ئىشلىرىدىن بەكمۇ تەسىرلەندۇق. ئالەم مېھرى مۇھەببەت گۈزەلدۇر.

kurban

	ساخاۋەتچى ئاتىلارغا رەھمەت. ئاللا ئۆمۈرلىرىنى ئۇزۇن قىلسۇن.

	ساخاۋەتلىك قولۇڭلارغا ئاللا ساۋاب بەرگەي