گۇلاخما يېزىلىق ئوتتۇرا مەكتەپ قۇرۇلغانلىقىنىڭ 50 يىللىقى داغدۇغىلىق تەبرىكلەندى
ئەخمەتجان مەتقۇربان (مۇڭداش) خەۋىرى، فوتوسى:
2011- يىلى 11- ئاينىڭ 4- كۈنى داڭلىق ئاشلىق ۋە كۈمەچ ماكانى دەپ تەرىپلىنىپ كېلىۋاتقان قەدىمىي يۇرت چىرا ناھىيەسىنىڭ گۈلاخما يېزىسىدا، گۇلاخما يېزىلىق ئوتتۇرا مەكتەپ قۇرۇلغانلىقىنىڭ 50 يىللىقى داغدۇغىلىق تەبرىكلەندى. مەكتەپنىڭ 50 يىللىق قۇتلۇق توي مەرىكىسىگە ئاپتۇنۇم، ۋىلايەت، ناھىيە، يېزا رەھبەرلىرى، مائارىپ تارماقلىرى ۋە باشقا تارماقلارنىڭ مەسئۇللىرى، ئاساسىي قاتلام كادىرلىرى، قېرىنداش مەكتەپلەرنىڭ مەسئۇللىرى، بۇ مەكتەپتە ئىشلەپ پىنسىيىگە چىققان، خىزمەت ئېھتىياجىغا ئاساسەن باشقا ئورۇنلارغا يۆتكىلىپ كەتكەن بىر قىسىم ئوقۇتقۇچىلار، ھازىر خىزمەت قىلىۋاتقان ئوقۇتقۇچىلار، ئوقۇش پۈتتۈرگەن ئوقۇغۇچىلار ۋەكىللىرى ۋە ھازىر ئوقۇۋاتقان ئوقۇغۇچىلار، ئاتا- ئانىلار ۋەكىللىرى ھەمدە بىر قىسىم مەرىپەتپەرۋەر شەخىسلەردىن بولۇپ 2500 دىن ئارتۇق كىشى قاتناشتى. تەبرىكلەش پائالىيىتىدە ھەر دەرىجىلىك رەھبەرلەر، مائارىپ مەمۇرى تارماقلىرىنىڭ مەسئۇللىرى تەبرىك سۆزى قىلىپ، مەكتەپنىڭ شانلىق نەتىجىلىرىگە يوقىرى باھا بەردى. مەكتەپ رەھبەرلىرى مەكتەپنىڭ بۈگۈنى ۋە ئۆتمۈشى ھەققىدە سۆز قىلىپ، مەكتەپنىڭ قىسقىچە تارىخىنى تۇنۇشتۇردى. مەكتەپنىڭ قۇرۇلۇشى ۋە تەرەققىياتىغا گەۋدىلىك تۆھپە قوشقان مەكتەپ مۇدىرلىرى ۋە پىشقەدەم ئوقۇتقۇچىلار ۋەكىللىرى، مەكتەپداشلار ۋەكىللىرى تەسىرلىك ئەسلىمىلىرىنى ئوقۇپ، ئانا مەكتىپىگە بولغان چوڭقۇر مېھرى- مۇھەببىتىنى ئىزھار قىلىشتى. مەكتەپنىڭ قۇرۇلۇشى ۋە تەرەققىياتىغا گەۋدىلىك تۆھپە قوشقان تۆھپىكار ئوقۇتقۇچىلارغا تون كەيگۈزۈلدى. «مەكتەپ مارشى» ۋە ئوقۇتقۇچى، ئوقۇغۇچىلار تەييارلىغان ئېسىل سەنئەت نۇمۇرلىرى ئورۇندالدى. ھەر دەرىجىلىك ئورۇنلار، قېرىنداش مەكتەپلەر، ئاساسىي قاتلام ئورۇنلىرى، بىر قىسىم مەكتەپداشلار ۋە مەرىپەتپەرۋەر شەخىسلەر نەق پۇل ۋە ماددى بۇيۇم سوۋغا قىلدى. مۇراسىم ئىشتىراكچىلىرىغا گۇلاخما يېزىلىق ئوتتۇرا مەكتەپ قۇرۇلغانلىقىنىڭ 50 يىللىقىغا ئاتاپ چىقىرىلغان «مەرىپەت گۈلدەستىلىرى» ناملىق ژورنال تەقدىم قىلىندى.
| 
يوللىغان ۋاقتى 2011-11-10 11:37:21
يوللىغان ۋاقتى 2011-11-10 12:16:23
