ۋاقىتسىز ئايرىلغان باغۋەن
(خاسىيەتخان سايىم مۇئەللىمنىڭ ۋاپاتىنىڭ بىر يىللىقىنى ئەسلەيمەن)
ئۆتكەن يىل ئاۋغۇسىتنىڭ مەيىن شامىلى كىشىگە ئالاھىدە ھوزۇر بېغىشلايدىغان ،يېڭى ئوقۇش مەۋسۈمىنىڭ دەل باشلىنىش پەيتى كەلگەن ، مۇسۇلمانلارنىڭ روزى ھېيتىنىڭ ھارپىسى ئادەمنىڭ ئىشەنگۈسى كەلمەيدىغان بىر شۇم خەۋەر بىردەمدىلا خېجىڭ ناھىيە بارۇن خارمودۇن بازىرىنىڭ يېراق-يېقىن جايلىرىنىڭ ھەممىسىگە تارقالدى.
كېچە- كۈندۈز ئۆزىنى كەسىپكە بېغىشلاپ ،28 يىلدىن بۇيان ئوقۇتۇش مۇنبىرىدە ئوقۇغۇچىلارنى تەربىيلەپ، جان كۆيدۈرۈپ ئىشلەپ كەلگەن خېجىڭ ناھىيىلىك 5- باشلانغۇچ مەكتەپنىڭ ئوقۇتقۇچىسى خاسىيەتخان مۇئەللىم ئۆتكەن يىل 8- ئاينىڭ 28- كۈنى تۇيۇقسىز يۈرەك سانجىقى بىلەن سۈيۈملۈك ئوقۇغۇچىلىرى،ئائىلىسىدىكىلەرنى تاشلاپ ،47يېشىدا بۇ دۇنيادىن ۋاقىتسىز ئايرىلدى....
بىر قىسىم ناھەق ئىشلارغا چىداپ تۇرالمايدىغان،ئەر ئوقۇتقۇچىلارنىڭ باشقۇرىشىمۇ تەس كېلىدىغان كەپسىز ئوقۇغۇچىلارنى گەپ ئاڭلاتقۇزىدىغان خاسىيەت مۇئەللىم بىر ئۆمۈر سىنىپ مەسئۇللۇق خىزمىتىنى ئىشلەپ،تالاي ئوقۇغۇچىلارنى تەربىيەلەپ چىققان.ئۇنىڭ ئاۋازى ياڭراق،ھەرىكىتى چاققان،ئەستايىدىل، ئوقۇتۇش مېتودى ئالاھىدە ياخشى ئىدى.ئۇ دەرس ئۆتسە ،سىنىپنى چىۋىن ئۇچسا ئاڭلانغۇدەك جىمجىتلىق باساتتى.ئۇنى ئوقۇغۇچىلار بەكمۇ ھۆرمەتلەيتتى، ئۇنىڭدىن تەپتارتاتتى.ئۇ 1- سىنىپنىڭ بىرىنچى مەۋسۈمىدىلا ئوقۇغۇچىلارنىڭ ئانا تىل ساۋاتىنى تولۇق چىقىراتتى.ئوقۇغۇچىلار ئەدەبىيات دەرىسنى باشقا دەرىسلەرگە قارىغاندا تېخىمۇ تىرشىپ ئۆگىنەتتى. شۇنىڭ ئۈچۈن ئۇنىڭ نەتىجىسى ھەر يىلى مەكتەپ ۋە نەھىيە بۇيىچە ئالدىنقى قاتاردا تۇراتتى.
ئۇ 3-سىنتەبىر ئۆتكۈزمەكچى بولغان ئوغلىنىڭ توي مۇراسىمىنىڭ تەييارلىقى ئۈچۈن 27-ئاۋغۇسۇت كەچتە مەكتەپتىكى كەسىپداشلىرىنى ئۆيىگە چاقىرىپ چاي بەرگەن ئىدى. ئۇنىڭ شۇ كۈندىكى خۇشچاقچاقلىقى ،ئۇسسۇل ئويناپ مېھمانلارنى كۈلدۈرۈشلىرىدىن ،ئەتىگەندە بۇ شۇم خەۋەرنىڭ يېتىپ كەلگەنلىكىگە ھېچكىمنىڭ ئىشەنگۈسى كەلمەيتتى. بىردەمدە مۇسىبەتكە يىغىلغان ئوقۇتقۇچى، ئوقۇغۇچىلار بۇ سۆيۈملىك ئوقۇتقۇچى ئۈچۈن ئۈن سېلىپ يىغلاشتى، ئۇنىڭ مۇنەۋۋەر ئىش-ئىزلىرىنى تىلغا ئېلىشتى.
ئۇ بىر ئۆمۈر ياش ئەۋلاتلارنى تەربىيەلەشتىن ئىبارەت ئىنتايىن مۈشكۈل ۋە ئۇلۇغ مەسئۇلىيەتنى ئۈستىگە ئېلىش جەريانىدا، كىشى بالىسىنى ئۆز بالىسىدىن ئەزىز كۆرۈپ، بارچە قايغۇ- ئەلەملەرنى ئىشىك سىرتىدا قالدۇرۇپ، گېگانىت قەدەملەر بىلەن سىنىپقا كىرىپ، ئوقۇغۇچىلارغا ئادەم بولۇشنى ئۆگەتكەن،ئۆزىنىڭ ئاددىيلىقى بىلەن مۇقەددەس كەلگۈسىنى بەرپا قىلىش يولىدا ، ئۆزى ئاستا –ئاستا يىقىلىش بەدىلىگە نەچچە مىڭ يىمىرىلمەس گىگانىت غۇنچىلارنى يىتىشتۈرۈپ،ئوقۇتقۇچىغا خاس ئېسىل پەزىلىتىنى نەمايەن قىلغان.
ئۇ ھايات ۋاقتىدا مەكتەپ، ناھىيە تەرىپىدىن كۆپ قېتىم ‹‹ئىلغار سىنىپ مەسئۇلى››،‹‹مۇنەۋۋەر ئوقۇتقۇچى››،‹‹8-مارت قىزىل بايراقدارى››،‹‹ئۈلگىلىك دەرس ئۆتۈش ماھىرى›› بولۇپ تەقدىرلەنگەن.
چەكلىك ھاياتىمىزدا بىزگە ئادەم بۇلۇشنى ئۈگەتكەن يولباشچى خاسىيەتخان سايىمدەك ئەزىز ئۇستازلارنى مەڭگۈ ئەسلەيمىز!!!
خېجىڭ ناھىيىلىك 5- باشلانغۇچ مەكتەپتىن: ئابلا كامال
يوللىغان ۋاقتى 2012-9-10 13:55:31
يوللىغان ۋاقتى 2012-9-11 16:46:34
