قوشماق يۈرەك ئۇيۇلغان تېرەك
قوشماق يۈرەك ئۇيۇلغان تېرەك،
قاپتۇ ئەجەپ كەچكۈزدە قۇرۇپ.
تولدى ئاچچىق كۆزلىرىم ياشقا،
ئايسىز كەچتە يۆلىنىپ تۇرۇپ.
قوشماق يۈرەك ئۇيۇلغان تېرەك،
بولغان شېرىن كەچمىشكە گۇۋاھ.
قۇنۇپ يۇمران شاخلارغا سۆيگۈ،
سالغان باھار پەسلىدە ئۇۋا.
قوشماق يۈرەك ئۇيۇلغان تېرەك،
ئوخشاپ قالغان مۇقەددەس جايغا.
ئاشىق جاندىن ھاياجان قايناپ،
قۇتلاپ شاھتەك مىندۈرگەن تايغا.
قوشماق يۈرەك ئۇيۇلغان تېرەك،
قالغان بىزگە چوڭلاردىن ئۇدۇم.
كەچكى شەپەق قىزارغان چاغدا،
نۇرغۇن قىسسە تۇغۇلغان چوقۇم.
قوشماق يۈرەك ئۇيۇلغان تېرەك،
ياشاپ كەلگەن خىلۋەتتە ئۇزاق.
ۋىسال كۈيى ياڭرىغان جۇشقۇن،
ھىجران پەيتى قۇرسىمۇ تۇزاق،
قوشماق يۈرەك ئۇيۇلغان تېرەك،
قاپتۇ ئەجەپ مەزگىلسىز قۇرۇپ.
يىراق كەتكەن سۆيۈملۈك يارنى،
ئەسلەپ چىقتىم... يۆلىنىپ تۇرۇپ.
مەنبە: ئىجادىيىتىم
بۇ يازمىنى ئاخىرىدا نەسىمى تەھرىرلىگەن. ۋاقتى 2012-6-20 13:16 
يوللىغان ۋاقتى 
