بەختلىكمەن
بىلقىز سۇلايمان
بەختلىك قىزىمەن ئانا يۇرتۇمنىڭ،
ئۆسكىنىم گۈل يېزا، چىمەنلىك قىرغاق.
قۇلىقىم تۈۋىدە ياڭرايدۇ مۇقام،
ھېسلىرىم دېڭىزدەك تىنىمسىز ئويغاق.
ئاق كۆڭۈل، ئەمگەكچان، قەھرىمان خەلقى،
مول ھوسۇل كانىدۇر بۇ مۇنبەت تۇپراق.
قاشتېشى ماكانى دەريا ساھىلى،
مەشۇتنىڭ ئاساسى ھەر يېشىل ياپراق.
گۈللىدى ئىلىم - پەن، مىللىي تېبابەت،
تاپماقتا بىمارلار كېسەلگە داۋا.
سۇلىرى مىسالى زەمزەمدىن ئارتۇق،
يۈرەكنىڭ راھىتى بۇندا ساپ ھاۋا.
بۇ گۈزەل گۈلشەندە بۇلبۇل ناۋاسى،
كۈيىگە يۈرىكىم تەڭكەش ھەر زامان.
ئۈندەيدۇ ئۇ مېنى ئىجاد قىلىشقا،
قوزغىتىپ قەلبىمدە شېئىرىي ھاياجان.
ھۆر ھايات قاينىغان ئالتۇن دىيارىم،
كۈنسېرى گۈللىنىپ ئاچماقتا چېچەك.
زوقلىنىپ ھۆسنۈڭگە قانمىدىم شۇنچە،
كەلگۈسى ئىقبالدىن نىشان ھەر چېچەك.
بەختلىك قىزىمەن ئانا يۇرتۇمنىڭ،
خۇشالمەن بولسىلا ئەل - يۇرتۇم ئامان.
ماكانىم چىمەنزار، ئۈستۈمدە قۇياش،
بىزەيمەن يۇرتۇمنى تەر تۆكۈپ ھامان.
1983-يىل 18 - يانىۋار ئۈرۈمچى
بۇ يازمىنى ئاخىرىدا نەسىمى تەھرىرلىگەن. ۋاقتى 2012-6-19 13:05 
يوللىغان ۋاقتى 2012-6-16 22:36:15
رەھمەت
