پۇتبول مەدەتكارلىرىمىزغا رەھمەت !
6-ئاينىڭ 11-كۈنىدىكى پۇتبول مۇسابىقىسىنىڭ خەۋىرىنى خېلى بۇرۇنلام ئەتراپىمدىكىلەردىن ئاڭلىغان ئىدىم . ئۇنىڭ ئۈستىگە ئۈرۈمچىدە ئوينالغان ئالدىنقى ئىككى قېتىملىق مۇسابىقىنىڭ ئەھۋالى بولۇپمۇ توپ مەستانىلىرىنىڭ قىزغىنلىقى كىشىلەر ئارىسىدا مۇنازىرىلىشىدىغان قىزغىن تېمىغا ئايلانغان ئىدى . مەركىزىي تېلىۋىزىيە ئىستانسىنىڭ تەنتەربىيە قانىلىنىڭ تۇنجى قېتىملىق مۇسابىقىنىنىڭ ئەمەلىي ئەھۋالىنى ئاساس قىلىپ ئىشلىگەن ئالتە مىنۇتلۇق خەۋەر تۈسىنى ئالغان پىروگراممىسىنىڭ «پۇتبول كېچىلىكى» مەخسۇس سەھىپىدا قويۇلۇشى شىنجاڭ ئۇيغۇر ئاپتونۇم رايونىدىكى ھەر مىللەت خەلقىنىڭ پۇلبولغا بولغان قىزغىنلىقىنى مەملىكەت مىقياسىدا ئەمەس پۈتۈن يەر شارىغا جاكارلىغان ئىدى . راس گەپ قىلسام مەن بۇ پىروگراممىنى كۆرۇپ كۆزۇمدىن ياش چىقىپ كەتتى . ئىككىنچى قېتىم ئۈرۈمچىگە ئورۇنلاشتۇرۇلغان مۇسابىقىغە مەكتىپىمىزدە بىر پائالىيەت بولۇپ قېلىپ بارالمىغان ئىدىم . ئوقۇغۇچىلار « مۇئەللىم سىز بېرىپ سۈرەت تارتسىڭىز بولمامدۇ ؟ » دىيىشىپ كەتكەن ئىدى . مانا ئەمدى ئۈچىنچى قېتىملىق مۇسابىقىمۇ ئۈرۈمچىگە ئورۇنلاشتۇرۇلۇپتۇ . مەن ئىككى سائەت بۇرۇنلام ئەرگۇڭ تەنتەربىيە مەركىزىگە بېرىپ بولغان ئىدىم . كوچا ئاپتۇبوسلىرىدىكى ئەدەمنىڭ كۆپلۈكى ، يولدىكى ماشىنىلارنىڭ كۆپلۈكى ، شۇنداقلام تەرتەربىيە مەركىزىگە قاراپ ئېقىۋاتقان پىيادىلەرنىڭ كۆپلۈكى ئادەمنى ھەيران قالدۇراتتى . مەن بىر سائەتتىن ئوشۇق ئادەملەر توپىغا قاراپ تۇردۇم ... قىسقىسى چوڭ كىچىك ھەتتا قۇچاقتىكى بوۋاقلارمۇ بار ئىدى ، ياشلار ئەڭ كۆپ بولۇپ ، ئۇلار بىلەن بىللە ھەمراھ بولۇپ كېلىۋاتقان چىرايلىق قىزلارمۇ شۇنداق كۆپ ئىدى . مۇسابىقە دەل ۋاختىدا باشلاندى مەيداندىن كۆتۇرۇلگەن قىزغىن چاۋاق ، «شىنجاڭ ! ھۇررا !!! » دەپ توۋلىغان ئاۋازلار مەيداننى ياق ! پۈتۇن ئۈرۈمچى ئاسمىنىنى لەرزىگە سالدى ، ئاۋاز دوللقۇنلىرىدا زىمىن تەۋرىگەندەك قىلاتتى . مېنىڭ ئاپاراتىمنىڭ كۆزى دەل مۇشۇ قىزغىن تاماشىبىنلارغا توغرىلانغان ئىدى... پۇتبول مەدەتكارلىرىمىز سىلەرگە رەخمەت !
