ئالتە خىل كۆكتاتنى ئەڭ ياخشىسى سېتىۋالماڭ
يېزا ئىگىلىك مۇتەخەسسىسلىرى كۆپچىلىكنىڭ كۆكتات سېتىۋالغاندا، ئامال بار پەسىللىك كۆكتاتلارنى تاللاش بىلەن بىرگە، تۆۋەندىكى ئالتە خىل كۆكتاتنى ئەڭ ياخشىسى سېتىۋالماسلىقىنى ئەسكەرتىدۇ:
بەك قاتتىق شوخلا: شوخلا قانچە قاتتىق بولسا، ئىشلەتكەن ئۆسۈملۈك ھورمۇنى شۇنچە كۆپ بولىدۇ، بۇنى ئەڭ ياخشىسى سېتىۋالماسلىق لازىم ياكى سېتىۋېلىپلا دەرھال يىمەي، ئىككى – ئۈچ كۈن قويۇپ پىشقاندا ئۆزلۈكىدىن يۇمشىشىنى ساقلاش. بۇ ۋاقىتتا سالامەتلىككە زىيانلىق قىزارتقۇچى ھورمۇننىڭ رولىمۇ ئاجىزلايدۇ. ئۇنىڭدىن باشقا تېشى قىزىل، ئىچى يېشىل شوخلا بالدۇر پىشۇرۇش دورىسى بىلەن مۇناسىۋەتلىك بولۇشى مۇمكىن.
يېرىقى بار تۇرۇپ: يېرىلىپ كەتكەن تۇرۇپ ياكى پىلەكلىك زىرائەتلەرنى ئەڭ ياخشىسى يىمەسلىك كېرەك، بۇلار ئېغىر دەرىجىدە ھاشاراتلارنىڭ زىيىنىغا ئۇچرىغان بولۇشى ياكى نورمال بولمىغان تېرىش جەريانىدىن كېلىپ چىققان بولۇشى مۇمكىن.
چوڭۇپ قالىدىغان تەرخەمەك: سېتىۋېلىپ ئەكەلگەن تەرخەمەكنى بىر كېچە قويۇپ قويسىلا، ئىككىنچى كۈنى يەنە ئۇزىراپ قالىدۇ، بۇنىڭغا چوقۇم ھورمۇنلۇق چوڭايتىش دورىسى ئىشلەتكەن.
رەڭگى بەك سۇس يېشىل يوپۇرماقلىق كۆكتاتلار: پارنىكتىكى كۆكتاتلار بىۋاسىتە كۈن نۇرىدا تەبىئىي ئۆسكەن كۆكتاتلارغا سېلىشتۇرغاندا كۆركەم، يوپۇرمىقىنىڭ رەڭگى سۇس، لېكىن ئوزۇقلۇق تەركىبى تەبىئىي ئۆسكەن پەسىللىك كۆكتاتلارغا يەتمەيدۇ، شۇڭا يېشىل يوپۇرماقلىق كۆكتات سېتىۋالغاندا رەڭگى قېنىقنى تاللاش لازىم.
غەيرىي پۇراق بارلار: يۇمغاقسۈت، ئارپىبەدىيان قاتارلىق ئەسلىدىلا پۇراقلىق كۆكتاتلارغا ئوخشىمىغان ھالدا، دېھقانچىلىق دورىلىرىنىڭ قالدۇقى كۆپ ياكى ناچار دېھقانچىلىق دورىسى ئىشلەتكەن كۆكتاتلاردا بۇرۇننى ئېچىشتۇرىدىغان غەيرىي پۇراق بولىدۇ، سېتىۋېلىشتىن بۇرۇن ئاۋۋال قولغا ئېلىپ پۇراپ بېقىش كېرەك.
يۇيۇپ بولغان كۆكتات: ھازىر بازاردا لاي، توپا بار تۇرۇپ، نىلوپەر يىلتىزى قاتارلىقلارنى ناھايىتى تەستە كۆرگىلى بولىدۇ، سېتىقچىلار ئوچۇقلا «پاكىز ئەمەس كۆكتاتلارغا قىزىقىدىغان ئادەم يوق» دەيدۇ، يۇيۇپ بولغان كۆكتاتلاردا دېھقانچىلىق دورىسى ئەمەس، باكتېرىيە بولىدۇ، باكتېرىيەنى تۇز سۈيىگە چىلىسىمۇ ياكى سۇدا چايقىسىمۇ چىقىرىۋېتىش بەك قىيىن.
خەنزۇچە «ھەمراھ» ژۇرنىلىدىن ئىپارگۈل ئوبۇلقاسىم تەرجىمە قىلغان.
بۇ يازمىنى ئاخىرىدا نەسىمى تەھرىرلىگەن. ۋاقتى 2012-6-12 12:00 
يوللىغان ۋاقتى 2012-6-11 22:26:50
