رۇبائىيلار

سۈربۆرە

ئىنسان دېگەن ھەممە قۇۋلۇق،شۇملۇقلارنىڭ پىرىمۇ؟
زىمىن ئاشۇ شۇملۇقلارنىڭ ئۈنۈپ چىققان يىرىمۇ؟
بوزەك قىلىش بىر-بىرىنى كۈچلۈكلىرى كۈچسىزنى،
ئەييۇ  ھەنناس،ھاياتلىقنىڭ  ماھىيىتى  سىرىمۇ؟

.                                         غازنى ئاتماستىن تۇرۇپ  قورداق ئۈچۈن قىلما سانا،
                                         جۇل دىمەي كىي كىيمىڭنى،ئۇنى پات-پات يۇياما.
                                         تاج كىيسەڭمۇ ئوغۇرلاپ سېنى ھېچكىم شاھ دېمەس،
                                         باشقىلارنىڭ  نەرسىسدىن  قىلمىغىن  شۆھرەت تەمە

‹‹غادايغانغا غادايغىن بېشىڭ كۆككە يەتكۈچە،
ئېگىلەنگە ئېگىلگىن بىلىڭ سۇنۇپ كەتكۈچە››
دىگەنىكەن دانالار تەتقىق قىلپ ئىنساننى ،
مېڭىش لازىم شۇ يولدا بۇ دۇنيادىن كەتكۈچە.

                                         چېقىلغان  چۈشسە  بىردىنلا،خوشامەتنىڭ بىناسىغا،
                                        ۋابا  تەگسە  ئۇنىڭ  ھەتتا  ئاشنالىرى   خۇداسىغا.
                                        تۇلاتتى  بارچە  كائىنات، كىشلىك  ئالىمى  شۇندا،
                                        ھاياتلىقنىڭ خوشال-ياڭراق ھۇزۇرلۇق كۈي ناۋاسىغا.



ئۈزۈڭنىڭ ئەسلى بىر تۇرسا ئۇنى ئون دەپ جاكار قىلما،
كىشنىڭ   ئونىنى ‹‹بىر›› دەپ ئاڭا جەبرۇ جاپاقىلما.
خەلق سەزگۈر،گۇۋاھ تارىخ،ھامان بىركۈن بۇلۇرسىر پاش،
نىيەتنى  رۇسلا،   بۇباپتا   يەنە   قايتا   خاتا   قىلما.

                                         تەمە قىلما ئەجىر قىلماي ھۇسۇلدىن كۆپ دارامەتتىن،
                                     ‹‹خىزىرنىڭ سۇپرىسى››يەڭلخ ئىلاھى غايىپ ئامەتتىن.
                                      ئۇتۇنچى قىسمىتى ياكى كېسەكچى‹‹شۈكرىسى››ئەلا،
                                     خوشامەتچى ئاتا قىلغان تاغارلاپ‹‹ئالىي››ھۆرمەتتىن.

كىشى ئېيتقاننى تەكرارلاش تېخى ھاجەت ئەمەس جايدا،
قۇياش  چىققاندا  ئۆگىزىگە  چىراق  ياققانچىلىك پايدا.
نەھاجەت  يالتىراقلاتماق  ئۈچۈن  ئالتۇنغا ھەل ئىزدەش،
ھامانە  پارقىرار  ئالتۇن  ئۇزۇن   يىل   ياتسىمۇ   لايدا.

                             ‹‹دېھقان››دەيمەن سورالسا گەر‹‹جھاندا نېمە ئەڭ چىڭ››دەپ،
                             ئۇ چىڭلىق بابىدا ئۈستۈن  قۇيۇچ-گاڭدىن  ئۇئەڭ  جىڭ گەپ.
                           ئەگەردە   ئاشۇ   نەس   يىللار  دېھقان  بېشىغا  چۈشكەن  كۈن،
                         چۈشەر   بولسا   تەڭىر   تاغمۇ   كېتەتتى   يۈز   مېتىر   پەسلەپ.

                      ‹نەس يىل –مەدىنىيەت زور ئىنقىلابى يىللىرى›

ئۈزەمنى   قانچە   كۆپتۈرسەم   ئەمەلدە   ئىگىلدىم   شۇنچە،
سۇلۇپ  ياپراقلىرىم   چۈشتى، لېكىن  دېدىمكى  مەن غۇنچە.
ئىشەندۈرمەك  ئۈچۈن  بارلىق   ھىلەمنى   ئىشقا   سالساممۇ،
بىلىپ قالدى نتەي ئەل-يۇرت ئىكەن ئەخمەق ئەمەس ئۇنچە.

                                                     بۇدۇنيا ئىنسانغا  قۇنالغۇ-ئۆتەڭ،
                                                      بەزىگە  بەكمۇتار بەزىگە بەك كەڭ.
                                                      شۇقىسقا ئۆتەڭدە ھاياتلىق ئۈچۈن،
                                                    بۇلىدۇئۈزلۈكسىزتوختىماستىن جەڭ.

ماختانغاندائۇچىمەن گوياكى بىر پەي بۇلۇپ،
نۇرلىنىپلا كىتىمەن خۇددىي تۇلۇن ئاي بۇلۇپ.
دەپ  تاشلىسا  بىرلىرى  ئەگەر نوقسانلىرىمنى ،
يەپلا ۋەتكۈم كېلىدۇ شىردەك غەزەپكە كېلىپ.

                                     ئۇستىسى  مەن  ئۆزگىنى  شۇتا   قىلىپ،  ئۆرلەشنىڭ،
                                      ھەممە   يەردە، ھەرۋاقىت   مەنپەئەتنى   كۆزلەشنىڭ.
                                     خەقنىڭكىنى‹‹مېنىڭ››دەپ كەلتۈرۈپ ئىسپات-دەلىل،
                                    مۇشىتلاپ  تۇرۇپ  مەيدەمگە  مۇنبەرلەردە  سۆزلەشنىڭ.



باشقىلار ساڭا گەر قىلسا خوشامەت،
دېمىگىن‹‹ماڭابۇكەلگەن بىرئامەت››.
خوشامەت بولمايدۇ ھېچقاچان قۇرۇق،
بار ئۇنىڭ كەينىدە چۇقۇم نادامەت.

                                           كۈچلۈك مەن دەپ ئاجىزنى قىلما بوزەك ،ھاقارەت،
                                           دەپ ئويلىما  ‹‹ئۇندا يوق قارشىلىققاجاسارەت››.
                                        بارھاياتلىق     يولىدا     ھەتتا      چۆمۈلىدىمۇ،
                                        نى - نى  يوغان  نەرسىنى  سۆرەيدىغان  ماھارەت.

ھۇقۇقدەيدۇكى‹‹مەن كۈچلۈك،بۇيرۇقۇمدىن پۇل چىقار››،
پۇل دەيدۇكى‹‹مەن كۈچلۈك،ھۇقۇقمۇ پۇلغا چىقار››.
ۋىجدان دەيدۇكى:‹‹بەك شەيدا بۇلۇپ كەتمە ئۇلارغا،
ئۇلارغا  بەك  شەيدالىق  تىگى  يوق  ھاڭغا  تىقار .››

                                           ھەقىقەت ئۇ كەش ئەمەس ئۇخلاپ قۇپۇپ ساپقىلى،
                                         پۇل   ئەمەس   بولىدىغان   ئوغۇرلاپمۇ   تاپقىلى.
                                       بۇس  چىقىرىپ  سېسىتىپ ‹‹ئىپار چاچتىم››دەۋالما،
                                       بولمايدىغۇ    يەل    بىلەن   نىجاسەتنى  ياپقىلى.



دوستلۇق   ئۈچۈن   بەزىلەر  ھە دەپ  قوشاق   قاتىدۇ،
‹‹دوسىت››دەپ تۇرۇپ دوستىنى تۇيدۇرماستىن ساتىدۇ.
بۈگۈن   سېتىپ   ئەگەردە   چۈشسە   ئەتە   ھاجىتى،
غىڭىشىپ    كېلىپ   كۈچۈكتەك   ئايىغىدا   ياتىدۇ.

                                                   ماختاپ سېنى ئۇچۇرسا ئۇ پوتۇڭغا كىرىپ،
                                                  سۆزلىرىگە سېرىقمايدەك كەتمىگىن ئىرىپ.
                                                 پەيتى كەلسە تۆھمەت بىلەن سېنى ئۈلۈمگە،
                                                 ئۇزىتىدۇ   ئۆز   ئۈيۈڭدە زىياپەت  بېرىپ.

چۈشەنمەك تەس تولىمۇ تەس ئىكەن ئىنساننى ،
ئاۋال چۈشەن ئاندىن ئۆيگە باشلا مېھماننى.
دوستۇم دېسە قاراقچىغا كەتمە ئىشىنىپ،
بۆرە قاچان بېقىپ بەرگەن ئىدى پاقلاننى.

                                             راۋاج تاپماس ئۆزھەققىنى چۈشەنمىگەنلەر،
                                            خەق  قىلغاننى  قىلىشىغا ئىشەنمىگەنلەر،
                                            ئۆزنېنىنى  ئۆزگىلەرگە  تارتقۇزۇپ قۇيۇپ،
                                            ئاچ قالغاندا ئاشۇ ناننى تىلەپ يىگەنلەر.



ھەيۋە  قىلىپ   قول   كۆتۈرمە   بوزەككە،
غەزەپ  بىلەن  سالدىڭ  ھەتتا تەستەككە.
‹‹ۋاي...››دېمىدى بىر ئالايدى،ئويلىما،
شۇ  ئالىيىش  كەلمەيدۇ  دەپ  كېرەككە.

                                                   يوق  ئىكەن  قېلىپى  ئادەم  بۇلۇشنىڭ،
                                                   قايسى خىل تۇغۇلۇش،قانداق ئۈلۈشنىڭ.
                                                  بارمىكىن  ئادەمدە    قىممىتلىك  نەرسە.
                                                 قىممىتىدىن   ئارتۇق   ئۆزنى  بىلىشنىڭ.

قاقاقلار  بىر  تۇخۇم  تۇققاندا  مېكيان،
ھەقلىق ئۇ،ئۇنىڭدىن بەھرىمەن ئىنسان.
بەزىلەر  ئىنسانغا  شاكال  بەرمەستىن،
سۈرىدۇ  شۇ ئىنسان  ئۈستىدە  دەۋران.

                                                  بېرىۋەرمە كىچىك بۇ دەپ دىل ئازار،
                                                    قانۇن بارمۇ كىچىك بولسۇن دېگەن خار.
                                                   خارلىق،ئازار،بوزەك بۇلۇشنىڭ ئەمەس.
                                                 ھەتتا شۇ كەڭ ئاسماننىڭمۇ چىكى بار.