ئايلىناي

alxir

ئايلىناي

نى زامانلار دوپپىسىز يۈرگەنلىرىڭدىن ئايلىناي.
نەق بۈگۈن بايرام ئۈچۈن كىيگەنلىرىڭدىن ئايلىناي.

توي-تۆكۈن، بايرام ئارا يۈردى بېشىڭدا پارقىراپ،
كەتسىلا مىخقا ئېسىپ قويغانلىرىڭدىن ئايلىناي.

باشقا چاغ كەيسە بىرى كۆز يۇمدى كىم دەپ سورىدۇق،
ئىشەنمەي ھەر خىل گۇمان قىلغانلىرىڭدىن ئايلىناي.

كەيسە گەر يات بىر كىشى مەمنۇن بولۇپ گۈللەر تۇتۇپ،
ئۆز ئېلىڭنىڭ تۇرقىغا كۈلگەنلىرىڭدىن ئايلىناي.

باغدا ئۆسكەن گۈل ئىدى ئەجدادلىرىم پەرۋىش قىلىپ،
ۋە لېكىن ئازغانغا قول سوزغانلىرىڭدىن ئايلىناي.

مىڭ ئېغىز داڭگال پاراڭدىن بىر ئەمەل ئەۋزەل دېسە،
تېرىكىپ ئاندىن قاپاق تۈرگەنلىرىڭدىن ئايلىناي.

ئۆز قەلىمىم

نەۋرۇز

ھەجەپ ياخشى يېزىپسىز. دوپپىنى بايرام توي نەزىر چىراقتىلا كىيىپ باشقا ۋاقىتتا توپا باستۇرۇپ قويدىغان يامان ئىللەت كۆپىنچىمىزدە بار.

نۇرلان

ئەلشىر ئەپەندىمنىڭ بۇ غەزىلى ھەقىقەتەن پاساھەتلىك چىقىپتۇ. شېئىردا بولۇشقا تېگىشلىك گۈزەللىكنىڭ ھەممىسى تولۇق ئىپادىلىنىپتۇ.
ئەمما، بۈگۈنكى كۈندە، دوپپىنى بىر كۈن بولسىمۇ كەيگەنلەرگە رەھمەت دىمەي ئامالىمىز يوق. ئىشەنمىسىڭىز دوپپىسىز يۈرگەنلەر بىلەن دوپپىلىقلارنىڭ نىسبىتىگە قاراپ بېقىڭ.

ئىدرسجان

مەنمۇ بۇگۇن بازارنى ئايلىنىۋىتىپ، دوپپا كىيىپ ئەسلىگە قايتقان كىشلەرنى كۆرۇپ شۇنداق خوش بولدۇم .

ئىدرسجان

نەگە بارماڭ دوپىلىق ياشلار ئوتتۇرا ياشلار قىزلار خۇشال يۇرگەن دوپپا سودىسىمۇ بۇگۇن ئاجايىپ جانلىنىپتۇ ھەممەيلەندە خوشال كەيپىيات كۆتۇرەڭگۇ روھ .

ئىدرسجان

ئاپلا سىزنىڭ يازغان غەزلىڭىزنى بىر ئىغىزمۇ ماختىماتىمەنغۇ كەچۇرۇڭ بەك ھاياجالىنىپ كىتىپتىمەن ،شۇنداق ياخشى يىزىپىسز  قولىڭىزغا دەرىت كەلمىسۇن.

غىلاپ

بۇ  شېئىرنى  ئوقۇپ ، بەك  خىجىل  بولدۇم . چۈنكى ، بۇ شېئىر ماڭىلا  قارىتىلىپ  يېزىلىپتۇ .

oygan9

زامان مۇشۇنداق بولۇپ قالغاچ دوپپا بايرىمى دەيدىغان ئۇقۇم بارلىققا كەلدى. خانىم قىزلىرىمىز ياغلىقىڭىز  نى ئوبدان چىگىۋىلىڭ ياغلىق چىگىش بايرىمى دەيدىغان ئۇقۇم ھەرگىز بارلىققا كىلىپ قالمىسۇن

360

يارايسىز ياخشى يېزىپسىز

360

يارايسىز ياخشى يېزىپسىز ..!