ئەجەل يېتىپ كەتتىڭىز ئۇستاز

hawas

ئەجەل يېتىپ كەتتىڭىز ئۇستاز
بالىلىقىمدىكى سۆيۈملۈك ئۇستازىم ھەسەن دۆلەت مۇئەللىم 2013-يىلى 11-ئاينىڭ 22-كۈنى (جۈمە) بۇ ئالەم بىلەن مەڭگۈلۈك خوشلاشتى.
ھەسرەت چېكىپ يىغلايدۇ گۈللەر،
سوغۇق تۇمان ئۆرلىگەن كۈزدە.
جىلۋە قىلار بەرگىدە ئازاب،
سەرسان بولۇپ خۇشپۇراق تۈزدە.

ئەگىپ يۈرەر مۇڭلىنىپ شامال،
دەردلىك كۆزى ئېچىشىپ نەمدە.
چۈشۈپ كېتەر ئەلەمدە بېشى،
قايناپ كەلگەن مۇسىبەت-غەمدە.

سالۋا تۇماق كېيىشكەن ھاۋا،
ئاستا كېلىپ يوقلايدۇ چىمەن.
جىمىپ قالار ناۋاگەر قۇشلار،
بېقىپ بوزرەڭ تۇپراققا تىمەن.

ئەسنەپ ياتار قۇرىغان شىۋاق،
ئەلۋەك باھار چۈشىنى كۆرۈپ.
شۈرمەل ئاقار دەريادا غېرىپ،
مۇزلاپ كەتكەن قىرغاقنى سۈرۈپ.

نۇرغا چۆمگەن قەدىمىي دەرەخ،
تاشلاپ تۇرار پەرۋاسىز سايە.
ئۆمۈر دېگەن تېپىشماق بولۇپ،
قىلار دۇنيا مېھرىنى زايە.

داڭقى چىققان دانىشمەن ئەردىن،
قالار ئەلگە پەخىرلىك زامان.
ياخشى نامدىن سۆيۈنۈپ ئىنسان،
ئۈمىد بىلەن ياشايدۇ ھامان.

ئۆكسۈپ تۇرار يارىدار كۆڭۈل،
ئۆتۈپ ئەجەل سورىقى جاندىن.
نېمە قالدى، نېمىلەر كەتتى؟
سىرى غايىپ تىلسىم جاھاندىن.

لەيلەپ ئۇچقان ئاخىرقى ياپراق،
سۈكۈت باسقان قەبرىگە چۈشەر.
قىلغاچ باقى ئالەمگە سەپەر،
ئۇلۇغ ھېكمەت قۇچاقلىغان ئەر.

ئەركىن پەرۋاز قىلارمۇ روھى،
بولۇپ گۇناھ-كەبىردىن ساقىت؟
ئۇستاز دېگەن، ئۇستازغۇ ئاخىر،
دەرمۇ شۇنداق ئاخىرقى ۋاقىت؟

تەندىن چىققان ئامانەت جاندىن،
قالدى مەسۈم يۈرەككە بەلگە.
ئەجەل يېتىپ كەتتىڭىز ئۇستاز،
ھەسسە قوشۇپ باھادىر ئەلگە...
مەنبە: ئىجادىيىتىم

hawas

ئۇستازىم ھەسەن دۆلەت 1980-يىلى  سىياسەت دەرسى بەرگەن ئىدى. شۇ دەرسنىڭ تەسىرىدىن بولسا كېرەك،مەندە ئىجتىمائىي پەنلەرگە ئالاھىدە ئىشتىياق قوزغالغان ئىدى....
ئۇستازىمنىڭ ۋاقىتسىز ئۆلۈمى كۆڭلۈمنى بەكمۇ يېرىم قىلدى. بۇ شېئىردا ھەسەن دۆلەت دېگەن ئىسىمنى چىقىرىش جەريانىدا بۇ سۆيۈملۈك ئۇستازىمنىڭ كۈلكە كەتمەيدىغان چىرايىنى كۆز ئالدىمغا كەلتۈردۈم.

arkinjuma

مەرھۇم ئۇستازنىڭ ياتقان يېرى بىھىش بولسۇن!

دولان2

مەرھۇمنىڭ ياتقان يىرى جەننەتتە بولسۇن.ناھايتى ياخىشى چىقىپتۇ

ئەلتبەر

مەرھۇمنىڭ ياتقان يىرى جەننەتتە بولسۇ ن،   شېرىڭىزغا باركاللا