مېنىڭ مۇھەببىتىم خەنزۇۋان

ئۆزياش

    مېنىڭ مۇھەببىتىم خەنزۇۋان



         مەمەتئابدۇللا  ئۆزياش


   ئۇچىرايلىق قىز ئىدى.ئۇنى تۇنجى كۆرگىنىمدە ئۇنىڭغا بىرخىل قىزىقىش ھېسسىياتى پەيدا بولغانىدى. ئۇنى يەنە بىر نەچچە قېتىم كۆرگەندىن كېيىن قىزىقىش ياقتۇرۇشقا ئايلاندى.راست، مەن ئۇنى ياقتۇرۇپ قالغانىدىم. ئۇنىڭ چىرايىدىن تەبەسسۇم كەتمەيتتى،بىر جۈپ يوغان كۆزى، ئانچە ئۇزۇن بولمىسىمۇ ئۆزىگە ماسلاشقان قارا چېچى مېنى ئۆزىگە مەھلىيا قىلىۋالغانىدى.ئۇنى يېقىن ئارىلىقتىن كۆرەلمەيتتىم،چۈنكى بىز بىر يىللىقتا ئەمەس، پەقەت يولدا ئۇچراپ قالسا يىراقتىن تازا بىر قارىۋېلىپ، يېقىنلاشقانسىرى ئالدىمغا قاراپ كېتەتتىم.گەرچە ئۇ بۇ مەكتەپكە كەلگىلى ئانچە ئۇزۇن بولمىغان بولسىمۇ لېكىن ئۇ بىزنىڭ يىللىقتىكى خېلى كۆپ ئوغۇللارنىڭ نىشانىغا ئايلانغانىدى.
             ۋاقىتنىڭ ئۆتۈشىگە ئەگىشىپ مەن ئۇنى راستىنلا ياخشى كۆرۈپ قالدىم. يولدا ئۇچراتسام بۇرۇنقىدەك بىر قاراپلا بولدى قىلماستىن تاكى يېنىمدىن ئۆتۈپ كەتكۈچە كۆزۈمنى ئۈزمەي قارايدىغان بولدۇم.بەزىدە بىزنىڭ كۆزلىرىمىز ئۇچرىشىپ قالاتتى ،بۇنداق چاغلاردا مەن دەرھاللا بىپەرۋا قىياپەتتە ئۆتۈپ كېتەتتىم. ئۇنىڭغا قىزغىن كۆيۈپ يۈرىۋاتقان مۇشۇنداق ۋاقىتتا كۆڭلۈمنى غەش قىلغان بىر ئىشقا يولۇقتۇم.بىزنىڭ ياتاقتىكى مېنىڭ يېقىن دوستۇم شىرزاتمۇ ئۇنىڭ پېيىغا چۈشكەنىكەن. شىرزات خېلى كېلىشكەن بالا ئىدى،ئەلۋەتتە مەنمۇ ئۇنىڭدىن قېلىشمايتتىم، بىراق نېمىشقىدۇر شۇنچىلىك ئەنسىرەيتتىم.
               بىركۈنى كەچلىك مۇزاكىرىدىن چۈشۈپ ياتاققا كىردىم، ياتاقتىكى ھەممىمىز ئۆز ئىشىمىزنى قىلىۋاتاتتۇق، شىرزات تۇيۇقسىز:
             --بالىلار ،ماڭا قاراڭلار،سىلەرگە بىر ئىشنى ئېيتاي ماڭا ياردەم قىلىڭلار،-- دېدى.ياتاقتىكى ھەممىمىز ئۇنىڭ ئاغزىغا قارىدۇق،--مۇنداق ئىش،تەييارلىق سىنىپتا كۆزۈم چۈشۈپ قالغان بىر قىز بار ئىدى،ئىسمى گۈلرەبا، ئۆزى بەك چىرايلىق،لېكىنزە ھازىرغىچە ھېچ تېلىفۇن نۇمۇرىنى بىلەلمەي بەك ئاۋارە بۇلۇپ كېتىۋاتىمەن،سىلەرنىڭ بىرەر ئامالىڭلار بارمۇ؟
           ئۇنىڭ گېپى ئەمدىلا ئاخىرلىشىشىغا مەن ئۇنىڭدىن:
            --سەنمۇ شۇقىزنى قوغلىشىۋاتامسەن؟--دەپ سورىدىم.چۈنكى گۈلرەبا دەل مەن ياخشى كۆرۈپ قالغان قىز ئىدى.ئۇ ھەيران قالغان ھالدا سورىدى:
             --نېمە؟سەن ئۇنى تونۇمسەن؟
             --ۋاي ياقەي،ئۇنى خېلى بالىلار قوغلىشىۋېتىپتۇ،شۇڭا مۇنداقلا دەپ قويدۇم.--ئامال يوق«مەن ئۇنى ياخشى كۆرەتتىم»دېگەن سۆزنى ئېغىزىمنىڭ ئۇچىدىنلا يۇتىۋەتتىم.چۈنكى مەندە ئۇنىڭدەك يۈرەك يوق.ئۇنداق ئوچۇق ئاشكارە سۆزلەپ يۈرەلمەيمەن.
            --ھە،باشقىلار بىلەن نېمە كارىم مېنىڭ،قاراپ تۇر،شۇلاردىن بۇرۇن قولغا كەلتۈرىۋالىمەن ئۇنى.
           ئۇنىڭ بۇ سۆزى قۇلىقىمغا ياقمىدى.ئىچىم ئاچچىق بۇلۇپ ئۇلارنىڭ پارىڭىغا قۇلاق سالدىم.
            --مېنىڭ يۇرتدېشىمغۇ ئۇ،--دېدى ئادەتتە كۆپ ئىشقا ئارىلاشمايدىغان ياتاقدېشىمىز ئوسمان،--ئالدىنىقى قېتىم يۇرتداشلار يېغىلىشىدا ھەممىمىز ئۆز-ئارا ئالاقىلىشىش نومۇرلىرىمىزنى يېزىۋالغان.
            --ۋاھ!نېمىشقا بالدۇرراق دېمەيسەن ئادىشىم، قېنى تېز دېگىنە ئۇنىڭ نۇمۇرىنى،--خۇشاللىقىدىن ئۆزىنى تۇتالمايلا قالغان شىرزات ئالدىراپ سورىدى.«مۇشۇ پۇرسەتتە مەنمۇ ئاڭلىۋالايچۇ،كىم يامان بولسا شۇ يېڭىپ چىقىدۇ ئاخىرىدا»دېگەن ئويدا دىققەت قىلىپ تۇردۇم.ئوسمان تېلىفۇننى ئاختۇرۇپ ئەمدى ئىككى خانىسىنى دېيىشىگە شىرزات ھەييار قىياپەتتە:
            --توختا،توختا، ما گۇيلار ئاڭلاپ قالسا ئىش بۇزۇلمىسۇن يەنە،ماڭىلا دەپ بەرگىن،--دېدى.
            «ھەي...»دەپ قالدىم ئىچىمدە،ئۇنىڭ بۇ تۇيۇقسىز كەلگەن ئەقلىگە ئازراق ھەيرانمۇ بولدۇم.مەنمۇ ئوسماندىن سوراپ بىلىۋالاي دەپمۇ ئويلىدىم،بىراق مېنىڭمۇ ئۇنى قوغلىشىۋاتقانلىقىمنى بىلدۈرۈپ قويماسلىق ئۈچۈن تېزلا بۇ ئويۇمدىن ياندىم.شۇنىڭدىن باشلاپ شىرزاتقا بۇرۇنقىدىنمۇ بەك نەزەر سالىدىغان بولدۇم، بىرەر يېڭى خەۋەر بارمۇ يوق ئاڭلىۋېلىشقا تىرىشاتتىم،لېكىن بىرەر كۆڭۈلدىكىدەك خەۋەر ئاڭلىيالمايتتىم.
           ئارىدىن بىر ھەپتە ئۆتتى،شەنبە كۈنلۈكى كەچلىك مۇزاكىرە بولمىغانلىقى ئۈچۈن بالىلار ئاساسەن ياتاقتا ئىدى. بىزنىڭ ياتاقتا پەقەت شىرزاتلا يوق، چۈنكى ئۇ بۈگۈن گۈلرەباغا تەلەپ قويماقچىكەن،بۇ خەۋەرنى مەنمۇ تېخى بايىلا ئۇققانىدىم،شۇنىڭدىن باشلاپ ئولتۇرالمايلا قالغانىدىم،بىرەر ئىش قىلىش خوشياقماي كارىۋېتىمدا ھاڭۋاقتىدەك ئولتۇراتتىم.ئارىدىن كۆپ ئۆتمەي شىرزات خاپا بولغاندەك ھالەتتە ياتاققا قايتىپ كەلدى.ئۇنىڭ بۇ ھالىتىدىن كۆڭلۈم ئازراق ئارامىغا چۈشكەندەك بولدى،بىراق ئەھۋال تېخى ئىنىق بولمىغاچقا ئۇنىڭدىن سورىدىم:
          --ۋوي،نېمە بولدى ساڭا؟رەت قىلىۋەتكەن ئوخشىمامدۇ؟
          --ماڭەۋاي،ئىككىمىز ئۆزئارا رەت قىلدۇق،--دەپ جاۋاپ بەردى ئۇ سوغۇقلا.
         --ئۆز-ئارا رەت قىلدۇق؟بۇ قانداق گەپ ئەمدى؟
           --قىزىق نېمىكەن ئۇ، مېنى كۆرۈپ «ئەسسالامۇ ئەلەيكۇم» دېمەي، «ياخشىمۇسىز» دەپ يۈرمەسمۇ، ھەيرانلا قاپتىمەن، ئەسلى خەنزۇۋانكەنغۇ. باشتىن ئاخىرى خەنزۇچىنىڭ ئارىسىغا ئۇيغۇرچە قېتىپ سۆزلىدى،بىزغۇ ئېھتىياتسىزلىقتىن ئانا تىلىمزنىڭ ئارىسىغا خەنزۇچىنى قېتىپ سۆزلەپ سالىمىز،ئۇنىڭ مۇشۇ تەرىپىگە قاراپ سەل يالتايغانىدىم،مەن تېخى مەقسىتىمنى دېگۈچە «بۇ نىيتىڭىزدىن يېنىڭ،مېنىڭ كۆڭلۈمدە باشقا بىرسى بار،ئۇمۇ سىلەرنىڭ يىللىقتا،لېكىن سىز ئەمەس»دەيدۇ،توۋا دەپ قالدىم.قىز بالا دېگەنمۇ مۇشۇنداق بولىدىكەن،مەن خىجىل بولۇپ دىيەلمەي يۈرسەم مەندىن بۇرۇن ئېغىز ئاچىدىغان گەپ.
ئۇنىڭ بۇ گەپلىرنى ئاڭلاپ نېمە قىلىشىمنى بىلەلمەيلا قالدىم.رەت قىلىۋېتىپتۇ،كۈلەيمۇ؟ياق،مېنىڭ كۈلۈشكە ھەققىم يوق،چۈنكى مەن ياخشى كۆرگەن قىز ئانا تىلىنى بىلمەيدىكەن،مەن بۇنى قوبۇل قىلالمايمەن،ۋاز كىچەيمۇ؟ياق،مەن ئۇنى ياخشى كۆرىدىغان تۇرسام……
     -ئۇيغۇرچىنى بىلەمسىز دەپ سورىسام،-دەپ سۆزىنى داۋاملاشتۇردى شىرزات خىيالىمنى بۆلۈپ،-نورمال ئالاقە قىلالايمەن،بەزى ھەرپلەرنى تونۇيمەن،لېكىن يازالمايمەن،دەيدۇ.نېمىشقا دەپ سورىسام،كىچىكىمدە ئازراق ئۈگەنگەن،كېيىن خەنزۇچە مەكتەپكە كىردىم،ھازىرغىچە ئۇيغۇرچە بىلەن كۆپ ئۇچراشمىغاچقا ئاساسەن ئۇنتۇپ كېتىپتىمەن،دەپ جاۋاپ بەردى.شۇلارنى ئاڭلاپ مۇشۇنداق قىزنى ياخشى كۆرۈپ قالغىنىمغا مىڭ پۇشايمان قىلدىم.
       -ئەمدى قانداق قىلماقچىسەن؟-سورىدىم يەنە ئۇزۇن قۇلاقلىق قىلىپ.
      -نېمە قىلاتتىم،ئانا تىلنى راۋان سۆزلىيەلەيدىغان بىرىنى تاپارمەن،-دەپ جاۋاپ بەردى دە كارىۋاتقا بېشىنى قويدى.ئۇنىڭغا تازا ئوبدان نەزەر سالدىم،قارىماققا ئۈجمە كۆڭۈلدەك كۆرىنىدىغان بۇ دوستۇمنىڭ ئەسلى قىزلارغا بولغان تەلىپى بەك جايىدا ئىكەن.ئۇدۇلۇمدا ياتىدىغان بۇ مىللەت قارىشى كۈچلۈك ياتاقداش دوستۇمنى قايتىدىن تۇنۇدۇم.
     -ھە راست،ئۇ كۆڭلىدىكى ئادەمنىڭ كىملىكىنى ساڭا دەپ بەردىمۇ؟-سورىدى باياتىن بېرى گەپ قىلماي تۇرغان ياتاقدېشىمىز تۇرغۇن.
     -ياتاققا كىرگەندە ئۇچۇر يوللاڭ،ئاندىن دەپ بېرەي دەيدۇ،نېمە قىلىمەن ئەمدى ئۇنىڭ كۆڭلىدىكى ئادەمنىڭ كىملىكىنى بىلىپ،-دېدى شىرزات قىزىقمىغاندەك.
      -ۋاي سوراپ باققىنە،سەن قىزىقمىغان بىلەن بىز قىزىقىمىز،بىزنىڭ يىللىقتا دەپتۇغۇ،-دېدىم مەن.
      -ھە ماقۇل،ھازىر سوراپ باقاي،-دېدى ئۇ ۋە تېلىفۇننى قولىغا ئېلىپ بىر نېمىلەرنى يازدى ئاندىن يوللىۋەتتى.ھەممىمىز بەك تەقەززالىق بىلەن كۈتتۈق،ئەمەلىيەتتە ئەڭ تەقەززا بولغىنى مەن ئىدىم،«ئۇ زادى كىمدۇ بىزنىڭ يىللىقتىكى»دەپ خېلى پەرەز قىلىپ باقتىم،بىراق مۇۋاپىق بىرەرىنى تاپالمىدىم.بىردەمدىن كېيىن شىرزاتنىڭ تېلىفۇنى سايرىدى،ھەممىمىز تەڭلا يۈگۈردۇق.شىرزات تېلىفۇنىغا بىر قارىدى دە قاقاقلاپ كۈلۈپ كەتتى.
      -ھا ھا ھا…ئەڭ ياخشىسى سىلەر كۆرمەڭلار،ھا ھا ھا…-ئۇ كۈلگىنىچە ماڭا قارىدى،مەن تېخىمۇ قىزىقىپ تېلىفۇننى ئۇنىڭ قولىدىن تارتىپ ئالدىم.تېلىفۇن ئېكرانىغا قارىدىم دە ھاڭ تاڭ قالدىم،چۈنكى ئۇچۇر«سىزنىڭ سىنىپىڭىزدىكى نىجات»دەپ قايتۇرۇلغانىدى.ئۇنىڭ كۆڭلىدىكى كىشىنىڭ مەن بولۇپ قېلىشىمنى ئەسلا خىيالىمغا كەلتۈرمىگەنىدىم.
         -بەخت قۇشى قونۇپتۇ ساڭا.
        -ھا ھا ھا،تازا چىرايلىق بىر قىز ئىدى ئۆزى،زايا كېتىدىغان بولدى بۇنىڭغا.
       -ۋاي نەدىكىنى ، تازا قاملىشىپتۇ،«نىجات-گۈلرۇخ»ئىسىملىرىمۇ تاھىر-زۆھرە ، غېرىپ-سەنەملەرنىڭكىدەك بەك ماس كەپتۇ.
        ياتاقتىكىلەر بىر تەرەپتىن كۈلەتتى،بىر تەرەپتىن ماڭا قاراپ ھەرخىل چاقچاقلارنى قىلىشاتتى.لېكىن مەن شىرزاتنىڭ تېلىفۇنىنى تۇتقىنىمچە ئولتۇرۇپ قالغانىدىم.بىردەمدىن كېيىن شىرزات تېلىفۇنىنى قولۇمدىن ئالدى ۋە ئۇچۇر قايتۇرۇشقا تەمشەلدى.
      -نېمە دەپ قايتۇرماقچى؟-سورىدىم ئۇنىڭدىن.
      -سېنىڭ تېلىفۇن نومۇرۇڭنى دەپ بىرەي دەيمەنمۇ،-دېدى ئۇ مۇغەمبەرلەرچە كۈلۈپ.
      -يوق گەپنى قىلماي جىم ئولتۇرە لاۋزا!-دېدىم مەن ئازراق تېرىكىپ.
     -ۋاي ۋۇي،چاقچاق قىلىپ قويدۇم.
           كاللام قۇپقۇرۇق،بىردەم كۈلگۈم كېلەتتى، بىردەم تېرىكەتتىم.نېمە قىلىشىمنى بىلەلمەي ھاڭۋاقتىدەك تورۇسقا تىكىلگىنىمچە كارىۋېتىمدا ياتتىم.ئارىدىن يېرىم سائەتچە ۋاقىت ئۆتتى،تۇيۇقسىز تېلىفۇنۇم سايرىدى.قارىسام ناتونۇش بىر نومۇردىن كەلگەنىكەن.
    -ئەسسالامۇ ئەلەيكۇم،-دېدىم مەن تېلىفۇننى ئېلىپ ، قارشى تەرەپتىن بىر قىزنىڭ ئاۋازى ئاڭلاندى.
     -ياخشىمۇسىز؟
     -ھە،ئۆزىڭىز…؟
     -سىز بىرىنچى يىللىقتىكى نىجاتمۇ؟-قايتۇرۇپ سورىدى مەندىن.
     -ھەئە،مەن شۇ،ئۆزىڭىز كىم بولىسىز؟
     -مەن تەييارلىقتىكى گۈلرەبا،مېنى تونۇمسىز؟
     -ھە…؟-مەن ھەيرانلىقتا شىرزاتقا قارىدىم،ئۇ ماڭا قاراپ مەغرۇر كۈلدى،مەن دۇدۇقلىغىنىمچە سۆزۈمنى داۋاملاشتۇردۇم،-ھە…ئە،تو…تونۇيمەن،ئىسمىڭىزنى…ئاڭلىغان.
     -ھە ئۇنداقتا ياخشى،سىزگە دەيدىغان گېپىم بار ئىدى…
     -ئاۋۇ…ھېلىقى،بۈگۈن مېنىڭ ئازراق ئىشىم بار ئىدى،خاپا بولماي ئەتە تېلىفۇن قىلسىڭىز…
        -ھە…مەيلى ئەمىسە،ئەتە قىلاي.
       -تېلىفۇننى قويۇۋەتتىم.مەن بىر نەرسە دەپ بولغۇچە شىرزات:
      -خاپا بولما ئاداش،ئۇ ئۆزى مەندىن سوراپ تۇرۇۋالدى،مەندىمۇ ئامال يوقتە،-دەپ  ئۈلگۈردى.بولدىلا…مەن ئۇنىڭغا بىر نەرسە دېمىدىم.چۈنكى بۇ بىر ھېسابتا ياخشى ئىش ئىدى.لېكىن راست ياخشى ئىشمۇ ئەمەسمۇ تېخى ئىنىق بولغىنى يوق.«قانداق قىلىش كېرەك؟»كاللامدا مۇشۇنىڭدىن باشقا ھېچنېمە يوق،ئەگەر شىرزات ئۇنىڭ خەنزۇۋان ئىكەنلىكىنى دېمىگەن بولسا بۇ مەن ئۈچۈن ئالەمچە خۇشاللىق ئىش بولاتتى،بىراق ھازىر ئەھۋال ئۇنداق ئەمەس،،،مەن ئۇنى ھازىرمۇ شۇنداق ياخشى كۆرىمەن ،بىراق ياخشى كۆرۈش دېگەن باشقا،مۇھەببەتلىشىش دېگەن باشقا،ھازىرقى ياخشى كۆرۈش ئۇنىڭ سىرتقى قىياپىتىنى ياخشى كۆرۈش خالاس.ئۇنىڭغا ئېيتمىسا بۇ كۆڭلىدىلاقېلىپ قالىدۇ.بىراق مۇھەببەتلەشسىچۇ؟ئەلۋەتتە بىللە بولىدىغان گەپ،بىراق مەن ئۇيغۇرچە بىلمەيدىغان بىرسى بىلەن بىللە بولسام بولمايدۇ.كاللام پارتلاپ كېتەيلا دەپ قالدى،رەت قىلىش كېرەكمۇ ياكى قوبۇل قىلىش كېرەكمۇ؟مەن زادى بىر قارارغا كېلەلمىدىم.ئاخىرى ئامال يوق شىرزاتقا گۈلرەبانى مېنىڭمۇ ناھايتى ياخشى كۆرىدىغانلىقىمنى،بىراق مەنمۇ ئۇنىڭ ئانا تىل بىلمەيدىغان بۇ تەرىپىنى ياقتۇرمايدىغانلىقىمنى دېدىم.ئۇ ھەيران قالغاندەك بىردەم بېشىنى تۆۋەن قىلىپ ئولتۇردى،ئاندىن:«بۇنىڭغا مەنمۇ بىر نەرسە دېيەلمەيمەن ئاداش،سەن ئۆزۈڭ بىلىپ بىر ئىش قىل»دېدى.ئاخىرىدا مېنىڭ مىللىي ھېسسىياتىم مۇھەببەتتىن ئۈستۈن كەلدى،مەن ئۇنىڭدىن ۋاز كېچىش قارارىغا كەلدىم.ئەلۋەتتە بۇقارارغا ئۇنچە ئاسان كەلمىگەنىدىم.مەن ئۇنىڭغا نېمە دەپ رەت قىلىمەن؟سىز ئۇيغۇرچە سۆزلىيەلمەيدىكەسىز دەيمۇ؟ياق،بۇنداق دېسەم بولمايدۇ،بۇ بىرخىل ئۇنىڭغا نىسبەتەن ئادىل بولمىغان باھانە.مەن ئويلا ئويلا ئاخىرى مۇۋاپىق باھانىدىن بىرنى تاپتىم

ئەتىسى ئەمدى تاماق يەپ بولۇپ ياتاققا قايتاي دەپ تۇرىشىمغا تېلىفۇنۇم سايرىدى،مەن تېلىفۇنۇمنى قولۇمغا ئېلىپ قارىسام گۈلرەبا ئىكەن.ئىككىلىنىش ئىچىدە خېلى ئۇزۇندا ئاندىن تېلىفۇننى ئالدىم،چۈنكى ئۇنىڭغا قانداق ئۇسۇلدا دېيىشنى بىلەلمىگەنىدىم.
      -ئەسسالامۇ ئەلەيكۇم،-دېدى ئۇ.
     -ۋەئەلەيكۇم ئەسسالام.
     -ھازىر ۋاقتىڭىز بارمۇ؟-سورىدى ئۇ بىرخىل قىزغىن ئاھاڭدا.
     -نېمە دەيدىغانلىقىڭىزنى بىلىمەن،مەن تېزلا ئاخىرلاشتۇرۇش ئۈچۈن ئۇنىڭ ئېغىز ئېچىشىنى كۈتمەيلا سۆزلەشكە باشلىدىم،-مېنىڭچە مۇمكىن بولمامدىكىن،مېنىڭ قىز دوستۇم بار…
       بۇ گەپنى نەقەدەر تەستە ئېغىزىمدىن چىقارغىنىمنى ئۆزۈم بىلىمەن.
    -سىزنىڭ قىز دوستىڭىز بار؟-ناھايىتى ھەيران بولغان ھالدا سورىدى مەندىن.
     -ھەئە…
     -ئۇنداق ئەمەستۇ،مەن ئۇنداق ئاڭلىمىغانغۇ.
     -مەن قىز دوستۇم بار دەپ ھەممە ئادەمگە دەپ يۈرمەيمەندە…
      -ھە…ئۇنداقتا كەچۈرۈڭ،مەن بۇنى بىلمەپتىمەن، ھە راست،خاپا بولماي شىرزات ئاكاشقا دەپ قويسىڭىز،ھېلىقى ئۇچۇرنى يۇيىۋەتسۇن…-ئۇنىڭ ئاۋازىدىن بەك ئۈمىدسىزلەنگەنلىكى چىقىپ تۇراتتى، ئويلىغىنىمدەك پارىڭىمىز تېزلا ئاخىرلاشتى.كۆڭلۈم بىر قىسما بولۇپ قالدى،نېمىلا دېگەن بىلەن ئۇ مەن تۇنجى ياخشى كۆرگەن قىز ئىدى.لېكىن ئۇنىڭ ئۇيغۇرچە بىلمەيدىغانلىقىنى بىلگەندىن باشلاپ كۆزۈمگە بۇرۇنقىدەك چىرايلىق كۆرۈنمەيدىغان بولۇپمۇ قالغانىدى، شۇڭا بۇ قېتىمقى ئازاپلىق سۆھبەت ماڭا ئۇنچە ئېغىر تۇرمىدى.
       شۇنىڭدىن كېيىن ئۈگۈنۈشكە كىرىشىپلا كەتتىم،سىرتتا كۆپ يۈرمىگەچكە گۈلرەبانى ئانچە ئۇچراتمىدىم.بۇمۇ خېلى ياخشى بولدى،ئۇنى كۆپ ئۇچراتمىسام ئۇنتۇپ كېتىشىممۇ ئاسان بولاتتى.بىرەر ئايچە ئاساسەن دېگۈدەك ئۈگۈنۈشتىن باشقىنى قىلمىدىم.
       بىر كۈنى كەچلىكتە شىرزات ماڭا:
     -ئاداش، گۈلرەبا خەنزۇ بىلەن ئارىلىشىپتۇ،-دېدى.
      -خەنزۇ بىلەن؟!-ھەيرانلىقتا سورىدىم.
     -سەن تېخىچە بىلمەيدىكەنسەن ئاداش،مەنمۇ ئۈچ تۆت كۈننىڭ ئالدىدا بىلدىم. ئۇنىڭغا گەپ قىلاي دېگەنتىم،بىراق بۇرۇن ھېلىقى ئىشلار يۈز بەرگەچكە ئەپسىز كۆردۈم، ئەڭ ياخشىسى ئۆزۈڭ گەپ قىلساڭمىكىن.
       بۇ تۇيۇقسىز خەۋەر يەنە ئارامىمنى بۇزۇپ قويدى.راست،ئويلاپ باقسام ئۇنىڭغا گەپ قىلىش ماڭىلا مۇۋاپىق كېلىدىكەن.راستىنى دېگەندە مەن ئۇنىڭ خەنزۇ بىلەن بىللە ماڭغىنىنى كۆرۈپ باقمىدىم، شۇنداقتىمۇ شىرزات بۇنداق ئىشتا يالغان ئېيتماس دەپ ئويلاپ ئۇنىڭغا گەپ قىلىش قارارىغا كەلدىم. شەنبە كۈنى ئۇنىڭغا تېلىفۇن قىلدىم.
      -ئەسسالامۇ ئەلەيكۇم، مەن نىجات،سىزگە دەيدىغان گېپىم بار ئىدى،ھەرقانداق ئىشىڭىز بولسا قۇيۇپ سىرتقا چ ىققان بولسىڭىز،-دېدىم مەن ناھايىتى كەسكىن ھالدا.
     -ھازىرما؟-سورىدى ئۇ ھەيران بولۇپ.
     -ھەئە،ھازىرلا،سىزنى ئاشخانىدا ساقلاپ تۇراي.
ئۇ كەلدى، يۇشۇرمايمەن،ئۇ راستلا چىرايلىق ئىدى،ئۇنى بۇنچىلىك يېقىن ئارىلىقتىن تۇنجى كۆرىشىم.لېكىن ئۇنىڭ ھازىر قىلىۋاتقان قېلىقى ئۇنىڭ چىرايلىقلىقىغا ماس كەلمىگەن ئىدى.
     -خەنزۇ بىلەن يۈرگىنىڭىز راستمۇ؟-دېدىم تۈزۈت قىلىپ ئولتۇرمايلا.
     -ھەئە،-تەمكىن ھالدا جاۋاپ بەردى ئۇ، بۇ ماڭا نىسبەتەن سەل ئېشىپ كەتتى.
    -ئۇنى چاقىرىڭ،سۆزۈم بار.
    -نېمىشقا؟
    -ئۇنىڭدىن ئايرىلىپ كېتىسىز!
    -كۈنلەۋاتامسىز؟
    -قىزىقكەنسىز،مەن سىزنى كۈنلەپ نېمە قىلاي،مەن يات بىر مىللەتتىن ئۆز مىللىتىمدىن بولغان سىڭلىمغا ئوخشاش بىرىنى كۈنلەۋاتىمەن!-سەل ئاچچىقىم كېلىپ قالغانىدى.
      -ئەينى چاغدا نېمىشقا مېنى ئالدايسىز؟-تۇيۇقسىزلا سورىدى ئۇ.
      -مەن سىزنى قانداق ئالدىدىم؟
     -سىزنىڭ قىز دوستىڭىز يوق تۇرۇپ نېمىشقا ماڭا قىز دوستۇم بار دەپ يالغان ئېيتىسىز؟
     -بۇ…
     -سىز مېنى ئالدىغاچقا مەنمۇ سىزنى ئالدىدىم.
    -مېنى ئالدىدىڭىز؟قانداق؟
    -مەن ھېچقاچان خەنزۇ بىلەن ئارىلاشمىدىم،ھەم ئۇنداق قىلىشىممۇ مۇمكىن ئەمەس،-ئۇ ئازراق ھاياجانلىنىپ سۆزلەشكە باشلىدى،-سىز ماڭا قىز دوستۇم بار دېگەن ۋاقتىڭىزدا تازا ئىشەنمىگەنىدىم، شىرزاتتىن سورىدىم، ئۇ ھەممىنى سۆزلەپ بەردى.سىزنىڭ قىز دوستىڭىز يوقلىقىنى،ھەم سىزنىڭ بۇرۇن مېنى ياخشى كۆرۈپ قالغانلىقىڭىزنى ، مېنىڭ ئۇيغۇرچە بىلمەيدىغانلىقىمنى ئاڭلاپ ئاندىن مېنى رەت قىلغانلىقىڭىزنى…ھەممىنى بىلدىم.
     -شىرزات نېمىشقا بۇلارنى سىزگە دەپ بەرگۈدەك؟
     -مەن ئۇيغۇرچە يازالمايمەن، ئازراق ھەرپلەرنىلا تونۇيمەن، بۇ ئۆزۈمگە ئېنىق. كىچىكىمدە مەنمۇ ئۇيغۇرچە ئۈگەنگەن، بىراق ئاتا ئانام مېنى خەنزۇچە مەكتەپكە بەردى، مەندىمۇ ئامال يوق.بۇلارنى شىرزاتقا چۈشەندۈردۈم، ئۇ گەپلىرىمنى ئاڭلاپ مېنى چۈشەندى، ئاندىن مېنىڭ سىزنى ياخشى كۆرىدىغانلىقىمنى ھەم سىزنىڭمۇ ماڭا كۆڭلىڭىز بارلىقىنى بىلگەچكە ماڭا ياردەم قىلىشقا قوشۇلدى ھەمدە ماڭا ئەقىل كۆرسەتتى.شىرزات ماڭا سىزنىڭ «خەنزۇ بىلەن يۈرگەنلىكىم»دەك ئىشنى ئاڭلىسىڭىز ھەرگىز پەرۋاسىز يۈرمەيدىغانلىقىڭىزنى سۆزلەپ بەردى،شۇنىڭ بىلەن ئۇنىڭ ياردىمىدە بۇ يالغاننى ئويدۇرۇپ چىقاردىم ھەم ئۇ ئارقىلىق سىزگە يەتككۈزدۈم. ئىشلار مۇشۇنداق.
       ئۇ سۆزلەپ بولۇپ يەرگە قارىۋالدى. بۇ چاغدا ئۇ كۆزۈمگە بەك چىرايلىق كۆرۈنۈپ كەتكەنىدى،بىراق ئۇ يەنىلا ئانا تىلنى بىلمەيدۇ، بۇ تەرىپى ئەڭ چوڭ توسالغۇ، شۇڭا مەن ئۇنى يەنە رەت قىلماقچى بولدۇم.
       -دېمەك سىز ھازىرمۇ مېنى ياخشى كۆرىسىز شۇنداقمۇ؟
      -ئۇنداق بولمىسا بۇنچە ئىشلارنى قىلىپ كەتمەس ئىدىم،-ئۇ خىجىل بولغاندەك ئېيتتى.
      -بىراق…
     -بىراق مەن ئانا تىلنى بىلمەيمەن، شۇنداق دېمەكچىمۇ؟-گېپىمنى دەپ بولغۇچە ئۇ مەندىن ئاۋال دەۋالدى.
     -ھەئە،مۇشۇ سەۋەب بولغاچقا مەن سىزنى قوبۇل قىلالمايمەن.
     -سىز ئىلگىرى مېنى ياخشى كۆرگەن شۇنداققۇ؟
     -ھەئە،ياخشى كۆرگەن، بىراق ئۇ چاغدا مەن سىزنىڭ ئانا تىلنى بىلمەيدىغانلىقىڭىزدىن خەۋەرسىز ئىدىم.
     -مەن ئانا تىلنى بىلمەيمەن، بىراق مەن ئۈگەنمەيمەن دېمىدىمغۇ!-ئۇنىڭ بۇ خىيالىمغىمۇ كەلتۈرۈپ باقمىغان جاۋابى مېنى ھەيران قالدۇردى، ھەم كۆڭلۈم يورۇغاندەك بولدى.
     -سىز…ئۇيغۇرچە ئۈگەنمەكچى؟
     -شۇنداق، سىز ئۈچۈن ئانا تىلنى ئۈگەنمەكچى.
     -ياق ياق!مەن ئۈچۈن ئەمەس، ئۆزىڭىز ئۇيغۇر بولغانلىقىڭىز ئۈچۈن ئۆگىنىشىڭىز كېرەك! ئانا تىلنى بىلسىڭىز مەنلا ئەمەس، يەنە  نۇرغۇن ئادەملەر سىزنى ياخشى كۆرىدۇ،-مەنمۇ سەل ھاياجانلىنىپ سۆزلەپ كەتتىم.
     -دېمەك ئانا تىلنى بىلسەم سىزمۇ مېنى بۇرۇنقىدەك ياخشى كۆرىسىز توغرىمۇ؟
 
   -مېنىڭچە شۇنداق،-مەنمۇ ئازراق قىزاردىم. ئۇ خۇشال بولغاندەك قىلاتتى. بىراق مەن ئۇنىڭ ئۇيغۇرچىنى قانداق ئۆگىنىدىغانلىقىنى بىلمىگەنىدىم، ئۇنىڭدىن سوراي دەپ تۇرىشىمغا:
     -ئۇنداقتا ماڭا ئانا تىلنى سىز ئۆگىتىڭ،-دېدى ئۇ بىرخىل شوخ كەيپىياتتا. بۇ گېپى مېنى سەل ھەيران قالدۇردى.
     -مەن؟ مەن ئۆگىتىمەن؟
     -ئەلۋەتتە، سىزدىن باشقا يەنە كىم ئۆگىتەتتى، ئەمدى سىز ئوغۇل دوستۇم بولغاندىكىن …-توۋا، نېمانداق يۈزى قىزارمايدىغان قىز بالا ماۋۇ، ئازراق تېرىككەندەك بولدۇم، قىز بالا نەدە مۇنداق قېلىن بولغىنى بار، ئوغام قايناپ ئۇنىڭغا دېدىم.
      -ئوغۇل دوستىڭىز؟ ئەمدى مەن قاچاندىن باشلاپ سىزنىڭ ئوغۇل دوستىڭىز بولۇپ قالدىم؟
      -سىز مەن ئانا تىلنى بىلسەم مېنىڭ ئوغۇل دوستۇم بۇلۇشقا ماقۇل بولدىڭىزغۇ، ماڭا سىز ئۆگىتىسىز، شۇ جەرياندا تېخىمۇ ئوبدان ئوبدان تونۇشىمىز، بۇنداق بولسا تېخىمۇ ياخشى ئەمەسمۇ.
      يا ئاللا، ما قىز بالىنىڭ پىلانىنى، مۇشۇ يەرگىچە ھەممىنى پىلانلاپ بولغان گەپ. ئۇنىڭ سۆزلىرىدىن ئۆزۈمنىڭ نامەلۇم بەختىمنى كۆرگەندەك بولدۇم.
       ئۇنىڭغا قايتىدىن بىر قاراپ چىقتىم، ئۇ ماڭا قاراپ كۈلۈپ تۇراتتى.
     شۇنداق قىلىپ مەن ئۇنىڭغا ئىشتىياق بىلەن ئانا تىلىمنى ئۆگىتىشكە باشلىدىم.


          ئاپتورى:مەمەتئابدۇللا مەتتوختى ئۆزياش
2013-يىلى 3-ئاي
  بېيجىڭ

timtas

ئوقۇۋېتىپ مېنىڭ يۇزلىرىم قىزىرىپ كەتتى! مەن بەك نېپىزمۇ نېمە؟

Muhsin_Turki

kayniqu  kayni yokma  kayni nimu  dawamlax tur wat kan bulsigiz....... hai.....
روھلان تورى Android يانفون تېرمىنالىدا يېزىلغان ئىنكاس

ئۆزياش

timtas يوللىغان ۋاقتى  2013-06-20 16:22:18
ئوقۇۋېتىپ مېنىڭ يۇزلىرىم قىزىرىپ كەتتى! مەن بەك نېپىز

نېمىشقا يۈزلىرىڭىز قىزىرىپ كەتتى؟
روھلان تورى Android يانفون تېرمىنالىدا يېزىلغان ئىنكاس

ئۆزياش

timtas يوللىغان ۋاقتى  2013-6-20 16:22
ئوقۇۋېتىپ مېنىڭ يۇزلىرىم قىزىرىپ كەتتى! مەن بەك نېپىز ...

نېمىشقا قىزىرىپ كەتتى؟

ئىدرسجان

خىلى ياخشى يىزپسىز قولڭزغا دەرت كەلمىسۇن مۇشۇنداق ياخشى ھىكايلەر ئۇزۇلۇپ قالمىسۇن.

ئىدرسجان

ئىشقىلىپ تەربىۋى ئەھمىيتى خىلى زور ھىكەيە ئىكەن

miskin

ھەققىقەتەن ياخشى يېزىلىپتۇ.... ئاشۇ ئۇيغۇر تۇرۇپ ئۇيغۇرچىنى بىلمەيدىغانلارغا بىزلەرنىڭمۇ تەربىيە قىلىپ ئانا تېل ساۋادىنى چېقىرى قويۇش بىزنىڭمۇ مەسئۇلىيىتىم .

روھلان

ئۇيغۇر ئاتا-ئانىسى ئۇيغۇر قىلالمىغانلارنى باشقىلار بولسىمۇ ئۇيغۇر قىلىپ قويۇپتۇ ، شۈكرى...

روھلان

تېمىدىكى بەزى يەرنى ئوقۇپ ھازىرقى زامانغا قارىتا پىكىرىمنى ئوتتۇرغا قويغۇم كېلىپ قالدى .
ھازىر مۇشۇ قىزنى كەلتۈرىمەنغۇ دەپ بىرلا ۋاقىتتا بىر نەچچىنى ئەخمەق قىلىدىغان ...لار ئىنتايىن كۆپىيىپ كېتىۋاتىدۇ... ، بەك ياقتۇرۇپ كەتسە بىرسىگە ئېسىلسا ھە دېسەك،ئەمما ئۇ قايسىسى ئۇچىرسا شۇنىڭغا ، شۇنىڭ چىرايىغا ئېسىلىپ كېتىۋېرىدىغان بالىلارنى نېمە دېيىش كېرەككىن تاڭ؟  ئاندىن قىزلارمۇ بەسلەشكىلى تۇرغان ھازىر...
بىر چاغدا خېلى چوڭ بولۇپ قالغان ئايالنىڭ قىزىنىڭ كۆپ ئەرلىك بولغانلىقى توغۇرلۇق قىلۋاتقان پاراڭلىرى قولۇقۇمغا كىرىپ قالدى ، شۇ چاغدا «قىزىم ئاران ئىككىگە تەگدى ، تېخى ياش، يەنە زاماننىڭ پەيزىنى سۈرۈپ يەنە تېگىۋالسا بولىدۇ، ھەي ئاداش سەن قانداق قىلىپ شۇ بىر ئېرىڭ ئۆتۈپ كەتكىڭ كەلگەندۇ ۋىيېېېي»  دىگەن لىرىنىڭ ئاڭلاپ توۋا چاقچاق قىلۋاتقانمىدۇ راسمىدۇ دەپ ئويلاپ خىيالدا كېتىپ قالغان ئىدىم.
شۇڭا ئادەمدە ئازراق ئىمان، غورور ۋە ھايا بولمىسا بىكار!