شائىر بولماق تەس

سىرداش

پەخىرلىك  ئوغلانىمىز، ئاتاقلىق شائىرىمىز  رۇزى  سايىتنى  ھەر بىر ئەسلىگىنىمىزدە  ئۇنىڭ ‹‹ دىھقان بولماق تەس››  شىئېرى  قۇلاق تۈۋىمىزدە   جاراڭلايدۇ،   مەرھۇمنىڭ  قىسقىغىنە  بىزگە ئوچمەس   تۆھپىلىرىنى  قالدۇردى،   مەن  شائىرىمىزنىڭ  دىھقان بولماق تەس   دىگەن ئەسىرىگە تەقلىت قىلىپ يېزىلغان شائىر  ئېلى نىياز دەرمانى   نىڭ   ‹‹  شائىر بولماق تەس››  سەرلەۋىدىكى   بۇ  مۇخخەممىسىنى  ئوقۇپ  بەكمۇ  ھاياجانغا چۆمدۈم،  تورداشلار بىلەن ئورتاق بەھىرلىنىش  مەخسىدىدە   يوللاپ قويدۇم،  پىكىر قاتناشتۇرغايسىلەر

شائىر بولماق تەس

(روزى سايىتقا تەقلىد)

ئېلى نىياز دەرمانى

شائىرلىق نامىغا قىلغاچقا ھەۋەس ،
قەغەزنى بويىدىم بەزەن – ئېگىز پەس .
يازغىنىم كۆڭۈلگە ياقتىمۇ ئەمەس ؟
ئەل ئادىل تارازا چۈشەي بولدى – بەس ،
جاھاندا ھەممىدىن شائىر بولماق تەس .

                                              شائىر – ئۇ مىللەتنىڭ كۆزى – قۇلىقى ،
                                              مىللەتنىڭ پەخىرى ھەم پۈتمەس بۇلىقى ،
                                              گەر قىلىچ كەسسمۇ سوقار يۈرىكى ،
                                               ئەل غېمى ئەر غېمى ئارزۇ – تىلىگى ،
                                               جاھاندا ھەممىدىن شائىر بولماق تەس .


مەن قانداق ‹‹شائىر››مەن قويۇڭلار نومۇر ؟
ئاتەشمۇ ياكى كۈل بولغان كۆمۈر ؟
توققۇزۇم تەل غەمسىز سۈرىمەن ئۆمۈر ،
ھىسلىرىم ئويناقتۇر پۈتىمەن دەستۇر ،
جاھاندا ھەممىدىن شائىر بولماق تەس .

                                              ھاپىپازلىق پوچىلىق قىلىپ ھەر جايدا ،
                                              قاغجىراپ كەتكەننى كۆرسىتىپ مايدا ،
                                              يالغاننى راست قىلىپ ئالىمەن پايدا ،
                                              ھېيىت ۋە بايراملىق تىلەپ گاھىدا ،
                                              جاھاندا ھەممىدىن شائىر بولماق تەس .

يازمىشىم بىر مىسىرا داۋىرىڭى ئالەم ،
نوبىلنىڭ تاجىنى كىيگەندەك سايەم .
گاھ تېخى چۈشۈمگە كىرىدۇ ھاتەم ،
تىرىككە يازىمەن مەرسىيە – ماتەم .
جاھاندا ھەممىدىن شائىر بولماق تەس .

                                           شائوتى ئۇستازىم ‹‹تەقلىد››يازىمەن ،
                                           ئۇنىڭدىن بۇنىڭىدىن شىرنە قازىمەن .
                                           ‹‹مىۋىسى››چانسا گەردەيمەن: ئازىمەن ،
                                           بىلمىدىم تەنقىدكە ئاسان بازىمەن ،
                                           جاھاندا ھەممىدىن شائىر بولماق تەس .



دىلىمنى ئىپادە قىلالماس تىلىم ،
‹‹مۇھەرىر تاغام››غا ئىگىلىپ بېلىم ،
بىر ئون بولمايدۇ نېمىشقا ‹‹مېلىم››،
پاتمىسا قورساققا تۇرمۇش ۋە بىلىم ،
جاھاندا ھەممىدىن شائىر بولماق تەس .

                                         ھەق سۆزنى ئاڭلىسام قۇلاقلىرىم گاس ،
                                       يولۋاستىن قورقىمەن ‹‹جېنىم كىچىك راست››،
                                       چىقىرىپ قۇدۇقتا پاقىلارغا پاس ،
                                       دېدىم مەن : بۇ ئۇسلۇپ ئۈزۈمگىلا خاس ،
                                       جاھاندا ھەممىدىن شائىر بولماق تەس .




نامرات يوق دېھقاندا ھەممە باي بولدى ،
داغ سۇ يوق قازاندا چۈمۈچ ماي بولىدى ،
ئوردىدەك ئۆيلىرى گۈزەل جاي بولىدى ،
دەپ يازدىم : ئىچشى ھالۋا – چاي بولىدى ،
جاھاندا ھەممىدىن شائىر بولماق تەس .

                                          كۆرمىدىم نان غېمى ئەگكەن قەددىنى ،
                                          پۇلى يوق ئوقۇشسىز باققان پادىنى ،
                                        چىراقسىز گۆش – ياسىز چاك – چاك ھەر كۈنى ،
                                        مەزگىلسىز جاپالار قېرىتقان ئۇنى ،
                                        جاھاندا ھەممىدىن شائىر بولماق تەس .



نومۇسسىز پارىخور تۇرسا ماختىدىم ،
‹‹ئەل سۆيەر پاك باشلىق›› دەپلا ئاتىدىم ،
شەنىگە كۈي – غەزەل قېتىپ ھارمىدىم ،
قۇلۇمدىن ئىش كېلەر شۇڭا تاخلىدىم ،
جاھاندا ھەممىدىن شائىر بولماق تەس .

                                          پۈتسە گەر بىر شېئر شۇئان يوللايمەن ،
                                          ژۇرنال ۋە گېزىتنى تەڭلا گوللايمەن ،
                                        ھەققىدىن قوش – قوشلاپ ھەمىيان توملايمەن،
                                        ھەتتەڭەي بولارمۇ ئاز دەپ ئويلايمەن .
                                        جاھاندا ھەممىدىن شائىر بولماق تەس .

ئوبزورچى دوستەكنى دەرھال تاپىمەن ،
رېستۇران – قاۋاققا ئۇدۇل چاپىمەن ،
دوست تارتىپ ئىككىمىز رومكا قاقىمەن .
ئۈستۈمگە‹‹پادىشاھ كىيمى››پاپىمەن ،
جاھاندا ھەممىدىن شائىر بولماق تەس .

                                             قۇلۇمغا قەلەمنى ئالساملا شېئر ،
                                             ئاغزىمنى يوغانراق ئاچساملا شېئر ،
                                             پۇتۇمدا تۈز سىزىق سىزساملا شېئر ،
                                             ئىككى سۆز قاتارغا تىزساملا شېئر…
                                            جاھاندا ھەممىدىن شائىر بولماق تەس .




يېزلىدى دۇنيادا تالايلاپ كىتاب ،
قىلىندى جاھانغا جاراڭلىق خىتاپ ،
ساقايدى سېھىرىدىن يېرىمجان بىتاپ ،
ياد ئەتتۇق شۇلارنى سۆيۈپ ئولۇغلاپ ،
جاھاندا ھەممىدىن شائىر بولماق تەس .



                                           ھاجىپى قەشقەرى نېمىشقا ھايات ؟
                                          تەۋىپىقى ئۇيغۇرى غورۇرغا قانات ،
                                          ئۇيغۇرنىڭ قېنى بار جىسمىدا قات – قات ،
                                          شۇ سەۋەب يادلىنار ئەۋلاتمۇ – ئەۋلات ،
                                          جاھاندا ھەممىدىن شائىر بولماق تەس .




مىللەت ئۇ شائىرنىڭ يۈرىكى – قېنى ،
ئەل غېمى – كۈلكىسى شېئىرنىڭ جېنى ،
سەن ئۆلمەس شائىرسەن چۈشەنسەڭ ئۇنى ،
ئەجىرڭ ئۈچۈن تارتۇقلار خەلقىم ھەر كۈنى ،
جاھاندا ھەممىدىن شائىر بولماق تەس .

                                             ئويلىسام شېئرمۇ سۆز ئويىنى ئەمەس ،
                                             شائىرلىق نامىغا قىلمايمەن ھەۋەس ،
                                             نام – ئاتاق قىلمىسۇن مېنى مەس – ئەلەس،
                                             شېئرنى شائىرلار يازسۇن بولدى بەس ،
                                             جاھاندا ھەممىدىن شائىر بولماق تەس !

ئامان

بەك ئېسىل شېئىركەن.
‹‹دىخان بولماق تەس››، ‹‹كادىر بولماق تەس››، ‹‹خانىم بولماق تەس››، ‹‹ ........ بولماق تەس›› ........
مېنىڭچە ھەممىمىدىن ئادەم بولماق تەس!

زەپەر

ئادەم بولغاندا . ئۇنىڭ ئىچىدىن . كادىر دىھقان . يازغۇچى. ئالىم ئىنجىنىرلار مەيدانغا كىلىدۇ.  مەزمۇنى ياخشى تىمىكەن

سىرداش

ئامان يوللىغان ۋاقتى  2013-1-18 00:15
بەك ئېسىل شېئىركەن.
‹‹دىخان بولماق تەس››، ‹‹كادىر بولم ...

توغرا  دىدىڭىز.

سىرداش

زەپەر يوللىغان ۋاقتى  2013-1-18 00:18
ئادەم بولغاندا . ئۇنىڭ ئىچىدىن . كادىر دىھقان . يازغۇچى.  ...

رەھمەت.

يۈسەن

بەك ياخشى يېزىلىپتۇ....قەلىمىڭىز توختاپ قالمىسۇن......

نونى

«.....بولماق تەس» تىن يەنە بىرسى بىلەن ئۇچراشتۇرغىنىڭىزغا رەھمەت !

گۇلزار

ئادەم شۇنداق  چىدامسىز ئوخشايدۇ ، مەيلى قايسىلا ئىشنى قىلايلى ئۇنىڭ تەسلىكىدىن ۋايساپلا يۈرگەن .
شۇڭا ئالدى بىلەن چىدامچانلىقنى يېتىلدۇرۇپ ئاندىن بىرەر ئىشنى قىلسا بولارمدۇ يا ؟ ئۇ ۋاقىتتىمۇ بۇمۇ تەسكە توختاپ قالۇرمۇ يا ؟ ئەڭ ئاخىرىدا ياشىماقمۇ تەس بولۇپ قالىدىغان ئوخشايدۇ ...

   

گۇلزار

ئادەم شۇنداق  چىدامسىز ئوخشايدۇ ، مەيلى قايسىلا ئىشنى قىلايلى ئۇنىڭ تەسلىكىدىن ۋايساپلا يۈرگەن .
شۇڭا ئالدى بىلەن چىدامچانلىقنى يېتىلدۇرۇپ ئاندىن بىرەر ئىشنى قىلسا بولارمدۇ يا ؟ ئۇ ۋاقىتتىمۇ بۇمۇ تەسكە توختاپ قالۇرمۇ يا ؟ ئەڭ ئاخىرىدا ياشىماقمۇ تەس بولۇپ قالىدىغان ئوخشايدۇ ...