ئارزۇ-ئۈمىدلىرىڭىز يېڭىلىنىپ تۇرسۇن!

ئوغلانبەگ

ئارزۇ-ئۈمىدلىرىڭىز يېڭىلىنىپ تۇرسۇن!

بالىلىق چاغلىرىمدا خۇشناۋا غەزەلخان بولۇپ ئەلگە تونۇلسام دەپ ئارزۇ قىلاتتىم. شۇ ھەۋىسىمنىڭ تىپىرلىتىشىدا مەكتەپتىن يانغاچ ئېتىز - قىر بويلىرىدا ناخشا توۋلايتتىم. تولۇقسىز ئوتتۇرا مەكتەپكە چىققاندىن كېيىن داڭلىق رىياسەتچى بولۇشنى كۆڭلۈمگە پۈكتۈم ۋە دەرسىم يوق چاغلاردا مەكتەپ رادىيو ئۇزېلىدا قىزىقىشىمنى چېنىقتۇردۇم. ئوتتۇرا مەكتەپكە چىققاندىن كېيىن داڭلىق يازغۇچى بولۇپ ئەل خىزمىتىگە ئاتلىنىشنى ئارزۇ قىلدىم. بوش ۋاقىتلىرىمنى كىتاب كۆرۈش، ئانچە - مۇنچە قەلەم تەۋرىتىش بىلەن ئۆتكۈزدۈم. ئالىي مەكتەپتە بالىلىقتىن ياشلىققىچە بولغان بارلىق ئارزۇ - ئارمانلىرىمنى روياپقا چىقىرىش ئۈچۈن سىستېمىلىق ئۆگىنىشكە كىرىشتىم. ئەتراپلىق ئىزدىنىشىم قىزىقىشلىرىمدا ئۆزىگە يارىشا شان - زەپەرلەرنى قۇچۇشىمغا يول ئاچتى. رادىيو ئىستانسىلىرىدا تەكلىپ بىلەن ئىشلىشىم، گېزىت - ژۇرناللاردا ئېلان قىلىنغان ماقالىلىرىم قىزىقىشلىرىمنىڭ شاھىتى بولدى.
خىزمەتكە چىققاندىن كېيىن، ئەسلىدىكى ئارزۇ - ئۈمىدلىرىمنى خېمىرتۇرۇچ قىلىپ، زامانغا باپ ئارزۇ - ئۈمىد، قىزىقىشلىرىمنىڭ پىلتىسىگە ئوت ياقتىم. چۈنكى، بۇ دۇنيادا ھېچبىر ئارزۇ - ئىستەكسىز ياشاۋاتقان، جىسمىدا چەكسىز ئىشلىتىلىش بوشلۇقى تۇرۇپمۇ ئاشۇلارنى سېزەلمەي، ئۇلاردىن پايدىلىنالماي ئۈن - تۈنسىز قارا تۇپراققا قوشۇلۇپ كېتىۋاتقانلارنىڭ ھاياتىدىن شۇنداق خۇلاسىگە كەپ قالدىم. بۇ شۇنىڭ ئۈچۈنكى، ئادەم ھەر كۈنى يېڭىچە نەرسىلەرگە يولۇقۇپ تۇرسا كۈنلىرى خۇشال ئۆتكەندىن سىرت يېڭى بىلىم، يېڭى ئۇچۇرلارنىڭ ساھىبى بولالايدۇ. ھەر بىر كىشىدىكى ئارزۇ - نىشان شۇ كىشىنى ئالغا سىلجىتىدىغان ھەرىكەتلەندۈرگۈچ كۈچ، ئەلۋەتتە. ھەر قانداق نورمال بىر ئادەمنىڭ مەيلى چوڭ يا كىچىك بولسۇن، ئۆزىگە يارىشا قىزىقىشى بولىدۇ. كىشىلەر ئاشۇ روھىي روزىغارلىرىنى روياپلاندۇرۇش يولىدا ئۈزلۈكسىز ئىزدىنىدۇ ۋە تىرىشىدۇ. بىز ھاياتلىق سەيناسىغا چېچىلغان رىزىق - نېسىۋىمىزنى دەل ئاشۇ ئارزۇ - ئۈمىدلىرىمىزنىڭ ئەمەلگە ئېشىشى بىلەن تېپىپ يەيمىز. بۇ جەريان ھاياتلىققا گۈزەللىك ۋە مەنە بېغشلايدۇ. تۇرمۇشقا ئارزۇ - ئۈمىد يانداشمىسا، تۇرمۇشنىڭ ھېچقانداق مەنىسى بولمايدۇ. تۇرمۇشتا نىشان، ھاياتتا ئارزۇ - ئارمان بولمىسا، كىشى ھاياتىنى روھسىزلىق، چۈشكۈنلۈك قاپلايدۇ. چۈشكۈن ئادەملەرنىڭ بىر ئىشنى باشقا ئېلىپ چىقىشى قىيىن. بۇ ھال شۇ كىشىنى تۇرمۇشتىكى يېڭىچە نەرسىلەرگە قىزىقمايدىغان، ياشاشنى بېسىم ھېس قىلىدىغان، كونىچە تۇرمۇش يوسۇنىدا ياشاۋېرىشىنى خالايدىغان قىلىپ قويىدۇ. ئەلۋەتتە، تۇرمۇش كۈلگەنلەرگە كۈلۈپ، يىغلىغانلارغا يىغلاپ قارايدۇ. بۇنىڭدىن ئايانكى، تۇرمۇشقا باشتىن - ئاخىر ئىشەنچ بىلەن بېقىپ، جۇشقۇن، تېتىك ياشاش ئەۋزەل. نائۈمىد، چىركىن، بىر رامكا ئىچىدە ياشايدىغان كىشىلەرنى باشقىلار نەزەرىگە ئالمىغىنىدەك، تۇرمۇشمۇ ياقتۇرمايدۇ. ئېنىقكى، تۇرمۇشقا ئىنىتىلىش ئىچىدە كۈلۈپ باقالايدىغان ئۈمىدۋار كىشىلەرلا قەلبىدىكى ئارزۇ - ھەۋەس، ئارمان - ئىستەكلىرىنى ناچار مۇھىتتىمۇ شاخلىتىپ، ئۇنى روياپقا چىقىرالايدۇ. مانا بۇلار جەمئىيىتىمىزدىكى قىيىنچىلىققا باش ئەگمەيدىغان، قانداق ئىش بولسۇن، ئۆز ئىرادىسىدىن يانمايدىغان، ئۆزگىرىشچان مۇھىتقا بېقىپ ئارزۇ - ئۈمىدلىرىنى يېڭىلاپ تۇرىدىغانلاردۇر.
بىز تۇرمۇشتا تۈرلۈك ماددىي نەرسىنىڭ يېڭىسىنى ئالماشتۇرۇپ ئىشلىتىشىنى بەكمۇ ياقتۇرىمىز. خۇددى تۇرمۇشىمىزدىكى نۇرغۇن ماددىي نەرسىنىڭ يېڭىلىنىپ رەڭگارەڭ بولۇپ تۇرۇشىغا ئىنىتىلگىنىمىزدەك، قەلبى−مىزدىكى ئارزۇ - ئارمان، ئىستەك - ھەۋەسلىرىمىز يېڭىلىنىپ تۇرسا، شۇ نىشانغا يېتىشكە يەكدىل ئىنتىلسەك، سىرتقى دۇنيادىن قوبۇللىغان بىلىم جاۋاھىرىياتلىرىمىز موللىشىپ، بىزنى مەقسەتلىرىمىز ساھىلىغا يەتكۈزىدۇ، تۇرمۇشىمىز مەنىلىك، رەڭدار تۈس ئالىدۇ. شۇنداق ئىكەن، ھەر بىرەيلەن ئارزۇ - ئىستەك، قىزىقىش - ھەۋەسلىرىمىزنى قېزىپ، قېنىمىزدا بار بولغان قىزغىنلىق بىلەن ئۇنى نەتىجىگە ئۇلاشتۇرۇشىمىز، شۇنداقلا ئارزۇ - ئۈمىدلىرىمىزنى ماكان ۋە زامانغا ماس ھالدا يېڭىلاپ، ئۇنىڭدىن ئۆزگىچە پۇراق ۋە نەپىسلىك تېپىشىمىز زۆرۈر. ئۆزىنىڭ يېڭىلىقى بىلەن نەتىجىسى جىپسىلاشقان ھەقىقىي مەنىدىكى ئارزۇ - ئۈمىدلىرىڭىزنى قېزىپ تۇرۇڭ ۋە شۇلارنىڭ ھەقىقىي خوجايىنىغا ئايلىنىڭ. مۇبارەك نام - نىشانىمىز ھايات - ماماتلىقتا نۇر چېچىپ جۇلالانسۇن دېسەك، قەلبىمىزدىكى ئارزۇ - ئارمانلار كۆمۈلۈپ قېلىپ كونىراپ كەتمىسۇن. ئۇ ھەر ۋاقىت يېڭىلىنىپ تۇرۇشقا ھەم مۇئەييەن نەتىجىسىنى تېپىشقا موھتاج!

مەنبە: ‹‹شىنجاڭ گېزىتى››

ئامان

ھەر بىر ئادەم بىر قېتىم ئوقۇپ چىقىشقا تېگىشلىك، تەسىرچانلىقى ۋە تەربىيەۋى ئەھمىيىتى كۈچلۈك ياخشى ماقالىكەن، رەخمەت سىزگە. ئېسىل يازمىلىرىڭىز ئۈزۈلۈپ قالمىغاي بۇرادەر!

گۇلزار

بۇ تېمىنى ئوقۇپ كېتىۋېتىپ سىزنى كىچىكىدىنلا ئارزۇ - ئۇمۇدلەرگە تولغان ئۈمۈدۋار ،   ھەم ئارزۇلىرى ئىچىدىكى ئەڭ ياخشى ئارزۇسىنى ئەمەلگە ئاشۇرۇپ . داڭلىق يازغۇچى بولۇپتۇ دەپ ئويلاپتىمەن.  ئەپسۇس ماقالىنىڭ ئاخىرىغا كەلگەندە كۆزۈم بۇ تېمىنىڭ كېلىش مەنبەسىگە چۈشۈپ قالدى . ئىسىت بۇ تېما سىزنىڭ بولسىچۇ  تېخىمۇ ياخشى بولاتتى دەپ ئويلىدىم . شۇنداق بولسىمۇ ناھايتى ياخشى تېما ئېلىپ كەپسىز رەھمەت سىزگە .