مۇھەببەت قوشىقى

tursunjan

ئاق سارايدا ئاق ساندۇق ،
كۆك سارايدا كۆك ساندۇق .
بىزنىڭ يارلار دوختۇركەن ،
سۆيۈپ قويسا ساقايدۇق

ئايۋاننىمۇ سالارمىز ،
ساراينىمۇ سالارمىز .
قاچانلىققا ئۇز خېنىم ،
ناغرا-سۇناي چالارمىز ؟!

ھۆل چىۋىققا ئوت يېقىپ ،
ئوتۇڭ كۆيمىدى دەمسەن ؟
ئايدا يىلدا بىر كېلىپ ،
كۆڭلۈم قانمىدى دەمسەن ؟

قاشنىڭ قارىسى سەندە ،
ئاي يۈزۈڭگە مەن بەندە .
چىللىغاندا كەلمەيسەن ،
يۈزۈڭ قارا شەرمەندە .

قۇرغۇيمۇ ئۇچالايدۇ ،
لاچىنمۇ ئۇچالايدۇ .
مېنىڭ قارا كۆز يارىم ،
ھەجەپمۇ قۇچاقلايدۇ .

قۇرغۇيۇم ئۇچۇپ كەتتى ،
كۆكلىگەن تېرەكلەرگە .
بىر سۆيۈپ قويۇڭ يارىم ،
ئوت كەتسۇن يۈرەكلەرگە .

لاچىن بولۇپ قوندۇممەن ،
ھويلاڭدىكى تېرەككە .
بېلىق بولۇپ ئوينايمەن ،
مەيدەڭدىكى يۈرەكتە .

بېغىڭدىكى ئانارمۇ ،
بولار بىزگە پانارمۇ .
سۆيسەم ئانار تۈۋىدە ،
ساڭا يۈرەك قانارمۇ .

ئاق كەپتەر مېنىڭ بولسا ،
چىن تەخسىدە دان بەرسەم .
ياخشى يار مېنىڭ بولسا ،
قۇچىقىدا جان بەرسەم .

توقاچ ياقتىم تونۇرغا ،
ئۆرلەپ چىقتى ھۈپپىدە .
ئامرىقىمنى چاي بىلەن ،
يۈتىۋەتسەم گۈپپىدە .

كۆل بېشىدا چوكانلار ،
دۇتتارنى چالاي دەملا .
خۇدا بەرگەن بۇ جاننى ،
ئۆزلىرى ئالاي دەملا .

ئۆرۈك بارمۇ قاققىدەك ،
بالاڭ بارمۇ باققىدەك .
ئەجەپ تاتلىق خۇيۇڭ بار ،
قوغلاپ ئېلىپ قاچقىدەك .

ئالما شېخىنى ئېگىپسەن ،
ئالمىسى بار دەپ ئەگكەنمۇ ؟
كادىرغا تېگىۋاپسەن ،
شەپكىسى بار دەپ تەككەنمۇ ؟

يارىم بەردى بەش ئالما ،
بەشىلىسى قوينۇمدا .
ئوخلاپ چۆچۈپ ئويغانسام ،
يارنىڭ قولى بوينۇمدا .

باققا كىردىم باققىلى ،
پىستە-بادام چاققىلى .
گۈل تۈۋىدە يارىمنى ،
يۈرىكىمگە ياققىلى .

ئىرىقتىكى سۈزۈك سۇ ،
مۇز تۇتۇپتۇ ئەينەكتەك .
بىز ئىككىمىز يىقىن دوست ،
كاككۇك بىلەن زەينەپتەك .

كۆك ئاسمانغا تاش ئاتتىم ،
چىرايلىققا قاش ئاتتىم .
چىرايلىق ئۇخلاپ قالسا ،
بىرنى سۈيۈپ ئويغاتتىم .

يىڭى ئالغان ئاياقنىڭ ،
رىزىنكىدىن چەمى بار ،
يايرىم بەرگەن ناۋاتتا ،
مۇھەببەتنىڭ تەمى بار .

tursunjan

ئىچىم بەك پۇشۇپ كەتتى،
چالغىلى راۋاب يوقمۇ؟
ساڭا شۇنچە خەت يازدىم،
يازغىلى جاۋاپ يوقمۇ؟


يايرىم چالىدۇ راۋاپ،
تارىمنى ساز قىلىپ.
بىر سۆيۈپ قويۇڭ دېسەم،
ئۇنىمايدۇ ناز قىلىپ.

ئاقچى قوغۇن يېگەنمۇ،
كۆكچى قوغۇن يېگەنمۇ.
يۈرەككە ئوت سىلىپ قويۇپ،
دەرتتە ئۆلسۈن دېگەنمۇ.


خۇي دېسەم سېنىڭدە بار،
چىراي دېسەم سېنىڭدە بار.
قايرىلىپ سۆيگەنلىرىڭ،
ئۆلگۈچە يادىمدە بار.

مەرىپەت

ياخشى يېزىلىپتۇ جۇمۇ ، قوشاقچى دوستۇم يارايسىز

سىرداش

قۇشاقنى  بەك قاملاشتۇرۇپسىز  ، بەكمۇ  شىرىن زوق ئالدىم.

نونى

ئاجايىپ ئېسىل قوشاقلار ئىكەن . بىر پىيالە ناۋات چاي ئىچكەندەك ھوزۇرلاندىم ، رەھمەت سىزگە !

گۇلزار

تۇرسۇنجان ياخشىمۇسىز؟
بۇ مۇھەببەت قوشىقىڭىزنى ئاڭلىغان ھەر قانداق بىر قىز  مەھلىيە بولۇپ قالغىدەك . مۇھەببەت  كۈيلىرى مەڭگۈ ياڭرىسۇن . سىزگە قوشىقىڭىزدىكىدەك قىز  ۋە شېرىن ئەسلىمە نېسىپ بولسۇن . رەھمەت ئۇكام .