غەزەللەر

زەپەر

                                       غەزەللەر  


                         ئابدۇلئەھەت قادىرى


                               (1)

مېنى بىرسى سوراپ قالسا  غېرىپ ئول بىناۋا دەڭلەر ،

نىگارى ئىشقىدا دائىم ۋۇجۇدى ئوت - لاۋا دەڭلەر .

كۆزىدە ياش،لېۋىدە گەز، دىلىدا بىھېساپ ئەپغان ،

چىرايى زەپىران ،جىسمى گويا قاخشال چاۋا  دەڭلەر .

مىگەر بىرلەھزە ئاھ ئۇرسا شۇئان ئالەمگە ئوت كەتكەي،

قىلىپ يال - يال كۆيەر ھەتتا زېمىندا ھەننىۋا دەڭلەر .

كۈنۈ- تۈن يار پىراقىدا  يۈرەر مەجنۇن سىياقىدا ،

ئۆزىگە يادى غەپلەتنى ئەجەپ كۆرمەس راۋا دەڭلەر .

ئەھەدى مۇپتىلا بولدى ساقايماس بىر ئېغىر دەرتكە ،

نىگارى ۋەسلىدىن ئۆزگە  تېپىلماس ھېچ داۋا دەڭلەر

                                 (2)

مەن سۆيەتتىمغۇ سېنى سۆيگۈمنى ئەرزان قىلمىساڭ ،

مىس قاماقتەك ئەۋرىشىم كۆڭلۇڭنى لەرزان قىلمىساڭ .

سەرگە سال ، مىسقالغا سال ئىككى يۈرەكنىڭ ۋەزنى تەڭ ،

سەن ئۆزۇڭنى شاھى سۇلتان ، مېنى ئۇلتان قىلمىساڭ .

مەيلى ئىشلەت قۇل قىلىپ  ۋەياكى ساتقىن پۇل قىلىپ ،

بىر ئۆزۇڭدىن ئۆزگىگە  پالانى - پۇستان قىلمىساڭ .

ئاي يۈزۈڭنى ئايدا كۆرسەت،مەيلى كۆرسەت يىلدا بىر ،

ياخشىسى دىل ئامبىرىڭنى  سىرى پىنھان  قىلمىساڭ .

ئەھەدى سۆيگەي سېنى بىر جان ئەمەس مىڭ جان بىلەن ،

بۇ بېشىمغا تارتقۇلۇقنى  دەردى - ھىجران قىلمىساڭ .

                               (3)

ھاياتلىق قەۋمىدە بولغان ئۇچۇن سەن ، مەنمۇ ھەم بار مەن ،

مىگەر يوقسەن ، شۇئان جاننى نىسار ئەتمەككە تەييارمەن .

ياشاشتىن مۇددىئايىم شۇ - سېنىڭ ۋەسلىڭنى قۇچماغلىق ،

بۇ يولدا كەچمىسەم جاندىن نىچۇك ئاشىققا ئوخشارمەن ؟

مۇرادىم سەن بىلەن مەڭگۈ  ھايات - ماماتتا بىر بولماق ،

كويۇڭدا نە بالا كۆردۇم ،  يەنە كۆرمەككە   خۇشتارمەن.

كۈلەرمەن سەن ئەگەر كۈلسەڭ ،سېنىڭ كۈلكەڭ مېنىڭ بەختىم ،

مىگەر كۆرسەم كۆزۇڭدە نەم ، رەقىبنىڭ بوينىغا دارمەن .

نىگارا ، سەن مېنىڭ  سۆيگۈ - ئەقىدەم تەختىگە شاھسەن ،

ۋەلەيكىن  بىلمىدىم شۇنداق تۇرۇپمۇ مەن نېچۇك  خارمەن ؟ !

tursunjan

ئاللا  ائاللا    ناخشىچى بوپ كىتىپتۇ   ئەمەسما   زەپەر  ئەپەندىىىىىىىىىى