رەشىكنامە

alahidin

رەشىكنامە

ئالاھىدىن ئابدۇرېشىت

كۆزلىرىڭنى يۇم، يېنىشلاپ تاڭدا چولپان كۆرمىسۇن،
ئاي يۈزۈڭنى ئامرىقىم، يۇلتۇزمۇ پىنھان كۆرمىسۇن.

چۈشمىگەي شولاڭ زېمىنغا، چىقمىسۇن ئاپتاپلىرىڭ،
كۈنگە باقما، سەن ئۆزۈڭ كۈن، سېنى ئاسمان كۆرمىسۇن.

چاچمىغىن جىلۋەڭنى چوغدەك سۇ، ھاۋا، تاشلارغا ھەم،
ئوتلىرىڭنى مەن يۇتاي، تەپتىڭنى گۈلخان كۆرمىسۇن.

ھىدلىرىڭنى ھىدلىغان گۈللەرنى رەشكىم چەيلىگەي،
لەۋلىرىڭنىڭ غۇنچىسىنى لالە-رەيھان كۆرمىسۇن.

چاچلىرىڭ ئۆركەشلىسۇن خىلۋەتلىرىڭدە مەن ئۈچۈن،
قاشلىرىڭ ئويناقلىغاندا ھۆرى-غىلمان كۆرمىسۇن.

ئەيلىمە ئاھۇنى مەست رەپتارى سېھراتىڭ بىلەن،
قىلما ناز، تەبەسسۇمىڭنى نۇرى ئەپشان كۆرمىسۇن.

قىزغىنارمەن كۆز ئەمەس، ھەتتاكى سۆزلەردىن سېنى،
ھەق ماڭا ئەگكەن بويۇڭنى زاتى ئىنسان كۆرمىسۇن!

2012-يىلى، 11-ئاينىڭ1-كۈنى، يېڭىسار.

saba007

پاساھەتلىك شائىرىمىز ئالاھىدىن ئەپەندىم، سېنىڭ يالقۇنلۇق شىئېرلىرىڭ بىلەن سۆيۈملىك ئانا تىلىمىز  ئۆز گۈزەللىكىنى  تېخىمۇ جۇلالاندۇرۇپ، قىممىتىنى نامايەن قىلىۋاتىدۇ.  
بولۇپمۇ بۈگۈنكى دەۋىردە بۇ خىل تىل ئۇسلۇبىنىڭ نۇرلىنىشى بىزنى ھەقىقەتەنمۇ سۆيۈندۈرىدۇ...
يېقىندىن بىرى توردا ئېلان قىلغان ‹مۇھەببەت كۈيلىرىڭ› ئۆزگىچە تىل  خاسلىقى بىلەن ئوقۇرمەنلەردە يېڭى ئىنكاس پەيدا قىلدى. بۇ كەيپىيات  ئانا تىلىمىزنىڭ نە قەدەر سۆيۈملىك ئىكەنلىكىنى ھىس قىلدۇرماقتا....

قوللىرىڭغا دەرت كەلمىسۇن، ھاياجانلىق نەزمىللىرىڭ بىلەن ئانا تىلىمىز ۋىسال تاپسۇن.....

نونى

كىرپىكىڭ نازۇك چىمەندۇر ، بويلىرىڭ گۈلدىن لېۋەن،
چىقما باغقا دىلبىرىم ، ساچىڭنى بوستان كۆرمىسۇن.

كۆزلىرىڭ جادۇسىدىن جان گاھ كىرىپ ، گاھ يوقىلۇر،
سېھرىدىن دورا ياساشقا زاتى لوقمان كۆرمىسۇن.

بەك ياخشى يېزىپتىكەنسەن ، دورايمەن دەپ بۇزۇپ قويدۇم. ئىلھاملىرىڭغا بەرىكەت تىلەيمەن !

Ziba

ھۆرمەتلىك ئالاھىدىن ئەپەندىم ‹‹رەشىكنامە›› نى بەك ياخشى يېزىپسىز،قوللىڭىزغا دەرت بەرمىسۇن،مۇشۇنداق ئېسىل شېئرلارنى بىز بىلەن يۈز كۆرۈشتۈرگىنىڭىزگە كۆپتىن-كۆپ تەشەككۈر!!!

سىرداش

تىلى ئۆتكۈر، پاساھەتلىك شىئېر   يوللاپسىز. رەھمەت سىزگە.