يۈرىكىمنى ياشلاپ كەلدىم
ــــــــــــ سابىق ئۈرۈمچى كۆمۈركان مەكتىپىنى پۈتكۈزگەنلىكىمىزنىڭ 25 يىللىقى مۇناسىۋىتى بىلەن ئۇيۇشتۇرۇلغان ساۋاقداشلار يىغىلىشىغا ئاتاپ
ئالاھىدىن ئابدۇرېشىت
ئەسسالام ئۇستازلىرىم، پەدەرلىرىم،
كۆز ئەمەس، يۈرىكىمنى ياشلاپ كەلدىم.
باغرىمدا سىلەر ئۈچۈن ئۆركەشلىگەن،
بىر دەريا مۇھەببەتنى باشلاپ كەلدىم.
ئەسسالام ساۋاقداش، جان-جىگەرلىرىم،
قىرانلىق تىلىكىم بار سىلەر ئۈچۈن.
كۆكسۈمدە سوقۇپ-سوقۇپ قىرىق بەش يىل،
قانىغان يۈرىكىم بار سىلەر ئۈچۈن.
ئۈرۈمچى ئاسمىنىدا ئۇچۇم بولغان،
ئون بەش ياش چاغلىرىمنى ئەسلەپ كەلدىم.
يېڭىسارنىڭ تاغلىرى بار، دارلىرى بار،
ئۇچتۇما، ئۇچتۇم يەنە پەسلەپ كەلدىم.
مېھرىمىز تامچىپ-تامچىپ دەريا بولغان،
ئايرىلدۇق، ئۇچۇپ كەتتۇق يىراقلارغا.
سېغىنسام بىر چوققىنى سىزدىم ھەيۋەت،
بۈركۈتلەر ئۇچۇپ كەتكەن قاراقلارغا.
سايرامنى كۆزلىرىمدە تاشقىنلىتىپ،
تەلكىنىڭ داۋىنىدىن ئاشالمىدىم.
سادىردەك بەش بالامنى ئەگەشتۈرۈپ،
ئىلىنىڭ تاغلىرىدا ياشالمىدىم.
خوتەننى شاھ مەشرەپتەك تاۋاپ قىلىپ،
ئاتۇشنى قەشقەر بىلەن كۆرۈپ تۇردۇم.
ئاقسۇنىڭ سۇلىرىدا ئاقتىم گاھى،
تۇرپاننىڭ ئوتلىرىدا كۆيۈپ تۇردۇم.
باش ئەگىم بويلىرىنى كېزەلمىدىم،
چايقىلىپ ھەسرىتىمدەك باغراش قالدى.
سېغىندىم قۇمۇلۇمنىڭ تاغلىرىنى،
بىر كېچە مۇڭدىشالماي باغداش قالدى.
چۆچەكنى چۆچەكلەردىن ئىزدەپ يۈردۈم،
ئالتايغا ئاتلانغىلى تۇلپار بولدۇم.
يىگىرمە بەش يىل ئۆتتى ئارمان بىلەن،
قازاقنىڭ جىرلىرىغا خۇمار بولدۇم.
تاشئېرىق، تاش دەپ قالما يۈرىكىمنى،
سەن ئۈچۈن تىلىم-تىلىم يارالمىدىم.
مېڭىپتۇق قىرىق يىگىت قىرىق يولغا،
سېغىندىم، ئەمما ئىزدەپ بارالمىدىم.
× × ×
ئەسسالام ساۋاقداش، جان-جىگەرلىرىم،
بىغۇبار تىلىكىمنى ئېلىپ كەلدىم.
يېڭىسارنىڭ كۆكرىكىدىن يۇلۇپ ئېلىپ،
سېغىنغان يۈرىكىمنى ئېلىپ كەلدىم!
2012-يىلى، 10-ئاينىڭ 1-كۈنى، ئۈرۈمچى. | 
قىزغىنلىق
تىللا
تۆھپە
شۆھرەت
يوللىغان ۋاقتى 2012-11-1 09:48:19
يوللىغان ۋاقتى 2012-11-1 10:35:33
يوللىغان ۋاقتى 2012-11-1 22:23:01
يوللىغان ۋاقتى 2012-11-1 23:29:46
