ئۆتۈنۈش (نەسىر )

زەپەر

                                                 ئۆتۈنۈش

سوغاق قىش كۈنلىرىنىڭ بىر كېچىسى ، كۆڭلۈم نىمىشقىدۇر تولىمۇ يېرىم ، كۆزۈمگە زادىلا ئۇيقۇ كەلمەي سىرتقا چىقتىم ،كۈندۈزدىن بېرى ياققان قار دەل- دەرەخلەرنى ۋە ئەتراپنى ئاق لىباس بىلەن پۈركىگەن ئىدى .قاتار كەتكەن يول چىراقلىرى كېچىنى كۈندۈزدەكلا يۇرۇتۇپ تۇراتتى .مەن شۇنچە قېلىن كىيىنگەن بولساممۇ قىشنىڭ قاتتىق سوغىقى يۈزلىرىمگە نەشتەردەك سانچىلىپ ، پۈتۈن بەدىنىمنى شۈركەندۈرىۋەتتى.مەن بۇنىڭغا پەرۋامۇ قىلماي ، باش- ئايىغى يوق چىگىش خىياللار ئىلكىدە ئالدىمغا قاراپ نىشانسىز ، مەقسەتسىز مېڭىۋەردىم ........


      كۆڭلۈمدە بىر خىل تەنھالىق ، مەيۈسلىك  ھۆكۈم سۈرەتتى ، گەرچە يوللاردا ئاندا- ساندا ئادەملەر ، ماشىنىلار ئۆتۈشۈپ تۇرغان بولسىمۇ گويا مەن پۈتۈن دۇنيادا پەقەت ئۆزۈملا باردەك ھېس قىلاتتىم . ھاۋا شۇنچە سوغاق بولسىمۇ ئاسماندىكى ساناقسىز يۇلتۇزلار چاقناپ تۇراتتى ، شۇتاپ خىيال كەپتىرىم ، قىش شامىلىدا ئۇچۇپ يۈرگەن قار ئۇچقۇنلىرىدەك ھەر تەرەپكە پەرۋاز قىلماقتا . گەرچە بۇ كېچە شۇنچە يارقىن شۇنچە ئايدىڭ بولسىمۇ ، قەلبىم خۇددى گۇگۇم ۋاقتىدىن كېيىنكى قۇيۇقلىشىۋاتقان قاراڭغۇلۇقتەك ، كۆڭۈلسىز كەچمىشلەر قەلبىمنى پارا قىلماقتا . يۈرىگىم ئۈنسىز يىغلىماقتا ، كۆز ياشلىرىم يىپى ئۈزۈلگەن مارجاندەك ئېقىپ چۈشۈپ مەڭزىمنى يۇماقتا ، كۆكسۈمنى ئېغىر بىر تاش بېسىۋالغاندەك ، گېلىمنى ئاچچىق بىر نەرسە ئېچىشتۇرماقتا ........



         مەن ئازاپلىق خىيال دېڭىزىدىن ئۆزۈمنى قاچۇرۇپ كېچىدىكى يۇلتۇزلارغا قارىدىم ، ئۇلار مىنىڭ دوستۇمدەك تۇيۇلدى ،ماڭا قاراپ كۈلۈمسىرەۋاتقاندەك، ماڭا قاراپ قولىنى ئۇزىتىۋاتقاندەك بىلىندى .

         ئېھ ! ... كېچە مەلىكىلىرى   مەن سەندىن ئۆتۈنەي !

          مەندەك دەرتمەنگە سىرداش بولغىن   !  تەنھاغا ھەمرا بولغىن  !  يۈرۈگۈمگە داۋا بولغىن   !   مەجرۇھ قەلبىمگە ، كۆڭۈل يارىلىرىمغا شىپا بولغىن !  ..... بۈگۈن بارلىق ياشلىرىمنى تۆكۈپ تۈگىتىۋالاي  ،  تۆككەن  ياشلىرىمندىن قارلارمۇ ئېرىپ كەتسۇن  !  

سەن ئۇنى ئېلىپ يىراقلارغا تاشلىۋەتكىن ، ساڭا  ۋەدە بېرەيكى ؛ ئەمدى  ھەرگىز يىغلىمايمەن .  ئۆزۈمگە شۇنداق دەپ جاكالايمەنكى ؛ دۇنيا قانچە رەھىمسىز بولسىمۇ  ، ھايات ماڭا قانچە ئوڭۇشسىزلىقنى ، توسالغۇلارنى ، ئاچچىق ساۋاقلارنى  ئەكەلسىمۇ ، ياشاش يەنىلا  لەززەتلىك !  ... ئازاپمۇ ... بەختمۇ ئوخشاشلا لەززەتلىك ......



    ئويلاپ باقسام ھاياتلىق ھەممىدىن قىسقا ھەم قىممەتلىك ئىكەن ، بىز ھامان ئىلگىر- كېيىن  بولۇپ قانداق كەلگەن بولساق شۇنداق كېتىدىكەن ، ھەرگىزمۇ پۇل ، ئۆي ، مال - دۇنيا ، شان - شۆھرەتنى ئېلىپ كەتمەيمىز ، ئۇلار ھەممىسى قالىدۇ  . شۇنداق بولغان ئىكەن بىز نىمىشقا  ھايات قالغۇچىلارغا  مۇھەببەت ، ياخشىلىق ، خوشاللىق  قالدۇرماي ، ئەكسىچە ھەسرەت ، ساختىلىق ، رەزىللىك ، يامانلىق ، خاپىلىق ، كۆڭۈلسىزلىك قالدۇرۇپ كېتىمىز ؟؟؟.....

          ھايات مۇھەببەت بىلەن گۈزەل . مەن دۇنيادىن مۇھەببەت بىلەن ياشاپ مۇھەببەت بىلەن كەتسەم دەيمەن .

         تەڭرىم ،  مەن سەندىن ئۆتۈنەي ؛ بىزگە مۇھەببەتنى ، مۇھەببەتتە بەخت ۋە خوشاللىقنى بىزدىن ئايىمىغىن ! سىنىڭدىن ئەتىكى قۇياش نۇرىنىڭ تېخىمۇ نۇرلۇق چىقىشىنى  ئۆتۈنىمەن !

        چۈنكى مەن قۇياش نۇرىنىڭ پارلاپ چىققىنىنى كۆرەلمىگىچە گۈللەرنىڭ رەڭمۇ - رەڭ ئېچىلغىنىنى كۆرەلمەيمەن ............

        سەندىن ئەڭ ئاخىرىدا ئۆتۈنىدىغىنىم ؛ بىزگە ساغلام تەن ، پاك قەلب ئاتا قىلغىن ! شۇنداق بولغاندىلا بىز ھايات مۇساپىسىنى داۋاملاشتۇرۇپ ، ئارزۇ- ئارمانلىرىمىزغا يىتەلەيمىز !!!

       مەن ئويلاپ مۇشۇ يەرگە كەلگەندە ،  خۇددى چۈشتىن ئويغانغاندەك ، ئۆتۈنۈشلىرىم ئىجاۋەت بولىۋاتقاندەك ، قەلبىمدىكى قارا تۇمانلار تاراپ ، دىلىم بىردىنلا يورۇپ ، ئازاپ ئىسكەنجىسىدىن قۇتۇلغاندەك  بولدۇم ، ئىزگۈ خىياللىرىم مۇڭ كۈيلىرىنى ياڭرىتىپ ، ھايات كەچمىشلىرىمدىكى بەخت ئەلبوملىرىنى ماڭا ۋاراقلاتقۇزۇپ ، قەلبىمگە شاتلىق ئاتا قىلىپ ، مىنى ئۈمۈتۋار ياشاشقا دەۋەت قىلدى  .... مەن ساپ ھاۋادىن چوڭقۇر نەپەس ئېلىپ يىنىك قەدەملەر بىلەن ئۆيگە قاراپ يۈرۈپ كەتتىم ..........
مەنبەسى : ئەل كۈيى تورىدىن

◤pari◥

زەپەر ئەپەندىمنىڭ ، بۇ نەسىرىنى ئوقۇپ ئىلھاملىرىم ئۇرغۇپ تاشقان ،زەپەر ئەپەندىمگە ئاتاپ شېىرىي كۈيلىرىم يېلىنجاپ تۇرغان، ئوقۇپ ئاخىرىغا كەلسەم  بۇ ئەسلىدە ئەلكۈيى تورىنىڭكەن ئەمەسمۇ ؟؟
ئىسىت!، بۇ تېما ئەلكۈيىنىڭ ئەمەس سىزنىڭ بوپكەتكەن بولسىدى !؟

گۇلزار

بۇ نەسىرنى ئوقۇپ كېتىۋېتىپ:«ئەپەندىمنى مۇنچە ئازاپقا قويغان زادى نىمىدۇ ؟»دەپ ئاخىرىنى ئوقۇشقا تەقەززا بولدۇم .ھەم ئوقۇپ كېتىۋېتىپ تەسەللى بولغىدەك سۆزلەرنى ئويلاپ يېزىشقا تەمشەلدىم شۇ ۋاقىتتا كۆزۈم مەنبە « ئەلكۈيى » گە چۈشۈپ بۇ  ئويلىغانلىرىم بىردىنلا غايىپ بولدى  ، ھەم بىردىنلا يىنىكلەپ قالغاندەك بولدۇم .

سىرداش

مەندەك دەرتمەنگە سىرداش بولغىن   !  تەنھاغا ھەمرا بولغىن  !  يۈرۈگۈمگە داۋا بولغىن   !   مەجرۇھ قەلبىمگە ، كۆڭۈل يارىلىرىمغا شىپا بولغىن !  ..... بۈگۈن بارلىق ياشلىرىمنى تۆكۈپ تۈگىتىۋالاي  ،  تۆككەن  ياشلىرىمندىن قارلارمۇ ئېرىپ كەتسۇن  !  

نىمىدىگەن تەسىرلىك  قۇرلار بۇ ،  

قەدىناس

زەپەر ئەپەندىگە نەدىن كەلدى بۇدەرت -ئەلەملەر؟ ئاغىينە، سىلەرگە بۇ كۈنلەر دە  نىمە بولدى،ئەمدى؟ ياشلىقىڭدا تارمىغان دەرت- ئەلەملەرنى ئەمدى تارتىۋالاي  دەۋاتامسەن؟

گىياھى

بىز ھامان ئىلگىر- كېيىن  بولۇپ قانداق كەلگەن بولساق شۇنداق كېتىدىكەن
بىرىنچى شەخىس كۆپلۈك بىلەن ئىككىنچى شەخس ئارلىشىپ قالغان ئەھۋاللار بار. ياخشى يېزىلىپتۇ!

tarhanbag

نىمەدىگەن تەسىرلىك ھەم ھىسياتلىق نەسىر بۇ؟ ھەقىقەتەن كىشىنى چۇڭقۇر ئويلارغا سېلىپ قويدى........