كارىۋات چۆلدەرەپ كەتكەن ئازابلىق

سىرداش

كارىۋات چۆلدەرەپ كەتكەن ئازابلىق

بىر چوكان ھەسرەتلىك خىيال سۈرمەكتە،
كارىۋات چۆلدەرەپ كەتكەن شۇتاپتا.
غېرىپلىك چوۋلايدۇ بۇلۇڭ-بۇلۇڭدا،
ئاھ ۋاقىت ئۆتمەكتە تولىمۇ ئاستا.

بىر شەپە كەلمەكتە ،كەتمەكتە يىراق،
بەزىدە ئۆگزىگە چۈشەر تاش-چالما.
بەزىدە چىكىلەر ئىشىك-دەرىزە،
« كەل! مېنى قوغدىغىن ، نەدە سەن ، لالما ؟...»

چوكاننىڭ يۈرىكى يېشىدا ئاقار،
كارىۋات چۆلدەرەپ كەتكەن شۇتاپتا.
سۆزلەيدۇ دەردنى ئاپپاق كىرلىككە،
تۆكىدۇ سىرىنى غېرىپ ياستۇققا.

يۈرىكى چۆللەردەك چاڭقىغان چاك-چاك،
لەۋلىرى يېرىلغان ، ھىسلىرى زار-زار.
قەلبىنى ۋاراقلاپ يىغلايدۇ چوكان،
بىر تونۇش شەپىگە بولۇپ ئىنتىزار.

ياپيېشىل تىلەكتە ھەسرەت ئۆركىشى،
تاقەتسىز ھاياجان سۇنار قاراسلاپ.
ئۆتمەكتە كۈن-ئايلار ، چاڭقاپ ، زارىقىپ،
دەز كەتكەن بىر يۈرەك كۆيەر لاۋۇلداپ.

ھوۋلايدۇ سەرسانلىق چۆلىدە خىيال،
قايغۇ ۋە كۆز ياشنى ئىچمەكتە كېچە.
سۆيگۈگە ئاسىيلىق قىلىش بەرباتلىق،
يەر شارى كۆز ياشقا تولۇپ كەتمەكتە.

ئالدىنىپ كەتمەكتە يالغان قۇياشقا،
بىر تالىق ھىجراندا كۆيىدۇ يۈرەك.
قەلبىنى تىڭشايدۇ باھار قۇشلىرى،
باھار دەپ يىغلايدۇ ئۈششۈگەن چېچەك.

شامال دۈمبىسىدە ئاينىڭ شولىسى،
قۇياشنىڭ كۈلكىسى چولپان قايغۇسى.
بىر چوكان ئازابلىق خىيال سۈرمەكتە،
كارىۋات چۆلدەرەپ ئاشماقتا دەردى.

غەملىرى بەك ئۇزاق ، مۇڭلۇق ئەجەپمۇ ،
مۇزلىغان كارۋاتتا ھەسرەتنىڭ قىشى.
يىغلىغان يۈرەكنىڭ چاڭقاشلىرىدا،
ياغماقتا شاقىراپ قايغۇنىڭ يېشى

مەنبە:  يازغۇچىلار تورى

گۇلزار

   ھەسرەتكە تولغان ئاچچىق كەشمىش بىلەن سېغىنىش ئارلىشىپ  بۇ كېچە . بەزىدە ئاشۇ گۈزەل ئەسلىمىلەر ئىچىگە غەرىق قىلسا بەزىدە   ھەسرەتلىك ئەسلىمىلەر دېڭىزىغا ئاپىرىپ ئازاپلىماقتا .  سېغىنىش ، ئازاپ، كۈتۈش ،  ھەسرەت  ...

alahidin

سىرداش: ياخشى بىر شېئىرنى مۇنبىرىمىزگە يوللاپسىز. بىراق، ئەسەر ئاپتورى تۇرغۇن پەيزۇللا(يۇلغۇن)دېگەننى ئەسكەرتمەپسىز. يەنە بىرى«غېرىپلىك چوۋلايدۇ بۇلۇڭ-بۇلۇڭد»دېگەن مىسرادىكى«چۇۋلايدۇ»دېگەن سۆز ئەسلى«ھۇۋلايدۇ»، «غېرىپلىك»بولسا«غېرىپلىق» بولۇشى كېرەك، خاتا ئۇرۇلۇپ كەتكەن چېغى، بۇنى تۈزىتىپ قويماپسىز!

زەپەر

ئالاھىدىن ئەپەندىم نىڭ دىگىنى توغىرا چۈنكى ئۇ كوپ شىئىرلانى ئۇقۇغان ھە . مەنبەسىنى ئەسكەرتىڭ. بولمىسا چاتاق چىقىدۇ. بۇلامدۇ