كېچىدىكى سەپەر

alahidin

كېچىدىكى سەپەر

ئالاھىدىن ئابدۇرېشىت

سەن سەپەرداش بىر كۈنلۈك ماڭا،
پەقەت بىر كۈن بولسىدى ھايات.
بۇ كېچىدە ئۇچسامدىم تەنھا،
ئالقىنىڭدا چىقىرىپ قانات.

بۈگۈن نەگە كەتكەندۇ ئاسمان؟
يۇلتۇزۇڭنى سانىيالمىدىم.
كۆزلىرىمدە چېقىلدى ئەينەك،
بۇلدۇق-بۇلدۇق قانىيالمىدىم.

ئۈرۈمچىدىن قايتتىم قەشقەرگە،
قەشقەر دېگەن كۆزۈڭدە ئىدى.
پىچىرلىدىم كۆزۈڭگە ئاستا،
جېنىم بىرلا سۆزۈڭدە ئىدى!

ئاپتوبۇسنىڭ ئىچىدە كېچە،
مەن يېنىڭدا تۈنىدىم جىمجىت.
ئاي باغرىڭغا چاقىرسا ئۈنسىز،
مەن ئۆزۈمنى ئەيلىدىم بىتچىت.

ئىككى كارۋات، بىر غىرىچ ئارىلىق،
بىزنى ئايرىپ تۇرغىنى پەقەت.
كۆزنى يۇمدۇم، كېچىنى يۇمدۇم،
كۆزى ئوچۇق قالدى مۇھەببەت.

خىيال سۈردۈم لېۋىڭدەك تاتلىق،
قوللىرىڭنى تۇتۇۋاتقاندەك؛
ئەينەكلەرنى چېقىپ قاپقارا-
كېچە بىزنى يۇتۇۋاتقاندەك.

مەن بىلىمەن: بۇ دۇنيا ماڭا-
ئاپتوبۇسنىڭ ئىچىدەكلا تار؛
كۆزلىرىڭدە يورۇيدۇ ھېلى،
ئاسمىنىڭدا بىرلا قۇياش بار!...

2012-يىلى، 10-ئاينىڭ8-كۈنى.