مۇدىر مەن

alahidin

مۇدىر مەن

(ساتېرا)

ئالاھىدىن ئابدۇرېشىت

تەستىقىم بار مۇدىر دەپ، ئىناۋەتلىك مۇدىر مەن،
باشقۇرۇشقا مەكتەپنى ئىجازەتلىك مۇدىر مەن،
مۇدىرلىققا يارالغان سالاپەتلىك مۇدىر مەن،
خىزمەتلەردە جۈرئەتلىك-جاسارەتلىك مۇدىر مەن،
ھۆنىرىم كۆپ بىلسىڭىز، پاراسەتلىك مۇدىر مەن.

تۆت كۈن بولدى خىزمەتكە ئورۇنلاشتىم يول تېپىپ،
مۇناسىۋەت تورىدىن ئۆزۈم ئۈچۈن ھۇل تېپىپ،
ئۈندۈرمەستىن بىر گىياھ، دەستە-دەستە گۈل تېپىپ،
چىقماي تۇرۇپ مۇنبەرگە مۇدىر بولدۇم پۇل تېپىپ،
پۇلۇممۇ بار، گېپىم ھەم پاساھەتلىك مۇدىر مەن.

ئوقۇتۇشقا رايىم يوق، مالىيەنى تۇتىمەن،
تۇتىمەنۇ، ھەممىنى ئۆزەم يالماپ يۇتىمەن،
پارا بېرىپ چوڭلارغا كۆڭۈللەرنى ئۇتىمەن،
ئاڭلىمايمەن«مىش-مىش»نى،بۇتخانىنىڭ بۇتىمەن،
ئالتە يەردە داچام بار تاپاۋەتلىك مۇدىر مەن.

توغرىلايمەن ھۆججەتنى قەغەز بىلەن سىياغا،
تام ئاقارتىپ كۈندە بىر، «ئوسما»قويۇپ بىناغا،
مېھمان كۈتۈپ، يەپ-ئىچىپ، تاۋكا تۈزۈپ قىماغا،
بۇزۇپ-چېچىپ پۇلنى مەن ئەيشى-ئىشرەت، زىناغا،
تېخى يەنە ھەممىدىن قانائەتلىك مۇدىر مەن.

چىقىم بولار باغچىغا، تىكسەم تۆت تۈپ جىرىمنى،
كاكۇل بىلەن پەدازلاپ ئىككى غۇلاچ قېرىمنى،
تۈگىتىمەن بىر يىللىق تاماق پۇلى-كىرىمنى،
تۇتالمايدۇ ھېچكىممۇ مېنىڭ ئاجىز يېرىمنى،
نەپسى يوغان، يالماۋۇز قىياپەتلىك مۇدىر مەن.

ئۆيگە گۆشنى، ئۇن، ياغنى، ناننى پۇلغا ئالمايمەن،
كەپتىرىمگە، توخامغا داننى پۇلغا ئالمايمەن،
مەكتەپ دېگەن پۈتمەس كان، كاننى پۇلغا ئالمايمەن،
لازىم بولسا ھەتتاكى قاننى پۇلغا ئالمايمەن،
ئايالىمغا، ئۆيۈمگە ئىتائەتلىك مۇدىر مەن.

كالتا ئىشتان، ئاتلاڭگا، پايپاق دېسە ئايالىم،
بايرام دېسە، ھېيت دېسە، باردۇر ئاڭا ئامالىم،
ھېسابچىنى بۇيرۇيمەن نەشتەر سانچىپ ھەر دائىم،
«پۇل يوق مۇدىر!»دېگەنگە يوقتۇر مېنىڭ پەرۋايىم،
يىڭنىگىمۇ، يىپقىمۇ خىيانەتلىك مۇدىر مەن.

تىجارەتكە ئايرىسام مۇئەللىمدىن بىرىنى،
چۆنتىكىمگە سالىمەن مائاشىنىڭ دىرىنى،
تۆت مۇئەللىم ياللايمەن، (دېمەي بۇنىڭ سىرىنى)،
سالالمايدۇ ھېچكىممۇ ماڭا كۆزنىڭ قىرىنى،
  ئىشنى شۇنداق جۆندەشكە ماھارەتلىك مۇدىر مەن.

جەرىمانە يىغىمەن مۇئەللىمدىن گەپ تېپىپ،
تۇماق دېسە باش ئېلىپ پۇرسەت تېپىپ-ئەپ تېپىپ،
دوپپا بىلەن بۇرۇتتىن ئېۋەن تېپىپ، نەپ تېپىپ،
ئوروقىنى ئورۇق دەپ، سېمىز ئۈچۈن«خەپ!»تېپىپ،
ماڭا«خوش-خوش»دېگەنگە شاپائەتلىك مۇدىر مەن!

نونى

ياخشى يېزىپسەن ، پۇلپەرەس مۇدىرلارنى پۇخادىن چىققۇدەك بىر قامچىلاپسەن.مۇشۇنداق ئېسىل شېئىرلىرىڭ ئۈزۈلمىسۇن!

ZAMRAN

ئالاھىدىن مۇئەللىم :ئۆتكۈر  ساتىرىك تىللىرى بىلەن جەمىيەتنىڭ ھەر قايسى قاتلاملىردىكى ئادىمىلىك ئەخلاقىدىن چەتنىگەن كىشىلەرنى قاتتىق قامچىلاپ كىلۋاتىلا،بۇ ساتىرىك شىېردىكى مۇدىرنى قايسى مەكتەپتە يوق دەپ قارىغىلى بولسۇن؟بۇ شىېرلىرنى ئوقۇغان مائارىپ ساھەسىدىكى ھەر بىر ئوقۇرمەن، ئۆزىنىڭ قوساق كۆپۈگىنى چىقىرىۋىلىپ ،يەڭگىللەپ قالغاندەك بولۇپ قالىدىكەن.ھەققانىيەت ئۈچۈن ئىشلەيدىغان ،پاك-دىيانەتلىك مۇدىرلار تۇغۇلغىچە سىلىنىڭ ساتىرىك ئەسەرلىرى ئارقىلىق تەسەللى تېپىپ تۇرايلى.يازسىلا كۆپلەپ يازسىلا!ئىجادىيەتلىرگە يەنىمۇ بەركەت تىلەيمەن.كۆپتىن-كۆپ رەھمەت!ئامان بولغايلا!!

قەدىناس

ھوقۇقنى پۇلغا سېتىۋېلىپ،پۇل تېپىشنىڭ كويىدا يۈرۈۋاتقان مۇدىرلار نى ئەجەپمۇ قامچىلاپسىز. جەمىيەتنىڭ ھەرقايسى قالاملىرىدىكى پۇل پەرەس ھوقۇقدارلارنى داۋاملىق قامچىلاپ تۇرۇشىڭىزنى ئۈمىت قىلىمەن. رەھمەت سىزگە، ئالاھىدىن مۇئەللىم.

سىرداش

ئۇھ،  ئەجەپ  ئىچىم  بۇشاپ  قالدى............

نىلۇپەر

بەزى مەكتەپ مۇدىرلىرىنىڭ جان يېرىگە ھۇجۇم باشلاپسىزغۇ؟لىكىن بەك ئەمەلىيەتچىل بوپتۇ،بەك ياخشى چىقىپتۇ.!!!!!!!

زەپەر

جەمىيەتتە مەكتەپلەردە مۇشۇنداق پۇلغا چۇقىنىدىغان مۇدىرلارنى ياخشى قامچىلاپسىز . رەخمەت سىزگە بولسا مۇشۇ ساتىرانى مائارىپ ئۇرۇنلىرى ۋە نازارەتلىرنىڭ چچ تۇپىغا ئەۋەتەيلى . بەك ياخشىكەن
مەن ئەۋەتەي دىگەنتىم . بىراق سەۋيەم  كىچىكلىك قىلدى. مەسىلەن  تۇلۇق كىسىپ  چ چ تۇپىغا يوللىيالمىدىم. بىر مىسرادىنلا يوللىغىلى بۇلىدىكەن . باشقىلار بىلسەڭلار يوللاپ قۇيشىڭلارنى ئۈمۈد قىلىمەن

دىنار

بۇ ساتىرانى ئوقۇپ بىر ئىشنى ئەسلەپ قالدىم ،مەلۇم بىر مەكتەپتە بىللە ئىشلەيدىغان بىر مەھەللىدە بىرگە ئولتۇرۇپ كىچىكىدە بىللە ئوقۇغان دوستلار بار ئىدى ، بىرىنىڭ يولدىشى مائارىپ ئورۇنلىرىدا ئىشلەپ باشلىقمۇ ، مەكتەپ مۇدىرىمۇ بولغان، خىزمەتنى ھەقىقەتەن ياخشى ئىشلىگەن ، قول ئىچىگە ئېگىلگەندەك دوستىنىڭ يولدىشىنىمۇ يۆلەپ رەھبەرلىك ئورنىغا چىقارغان ، ئۆرلىگىسى كەلگەن دوستىنىڭ يولدىشى دوستىنىڭ  كەينىدىن غاجاپ ، ئۆزىنىڭ ئورنىغا قانائەت قىلماي بارمىغان باشلىق، كىرمىگەن ھۆكۈمەت ئورگانلىرى قالماي دوستىنى يىقىتىپتۇ ، بۇرۇن ئۇلار بىر قازاننىڭ ئېشىنى يەيدىغان دوستلار ئىدى .ئەمدى ئۇنىڭغا ھوقۇق ئەمەس كىشىلەرنىڭ غەزەپ نەپرىتى تىگىپتۇ ، ھەتتا بىر بىرى بىلەن گەپلەشمەيھىكەن ، ھوقۇق پەرەسلىكنىڭ نېمىگە پايدىسى باردۇر ....ھە ، بىلسە ھوقۇق دىگەن بىر چاكارلىق ..

tursun123

بۇنداق مۇدىرلار ھەممە يەردە بار، ئۇلارنىڭ مەقسىتى كەلگۈسى ئۈچۈن ئەمەس ،بەلكى يانچۇقىنى توملاش.يوقالسۇن ئۇنداق مۇدىرلار !

قەدىناس

نىلۇپەر نىڭ ئىنكاسى غا قۇشۇلىمەن . ھوقۇقنى پۇلغا سېتىۋالغان مەكتەپ مۇدىرلىرى يۇقالسۇن.بۇنداق ياخشى ساتىرالارنى چوڭ-چوڭ ئەمەلدارلار  مۇ ئوقۇپ كۆرسە بولاتتى.