ئابدۇرېھىم ئۆتكۈر شېئىرلىرىدىن ھوزۇرلىنىڭ

نۇرانە

         ئابدۇرېھىم ئۆتكۈر شېئىرلىرىدىن ھوزۇرلىنىڭ

            

     
                        قەلەمگە!

   بەس قەلەم ، كۆرگەن مۇقامغا يورغىلاشتىن توختا سەن ،
   بارنى سۆزلە ، ھەقنى كۈيلە ، سەپسەتىلەر ساتما سەن .

  نە كېرەك يوق نەرسىلەردىن باش قاتۇرماق شۇنچىلىك ،
  ساپلىقىڭنى بۇلغىتىپ ، ياشلار ئاققۇزماق شۇنچىلىك .

  مەن سېنى كۈرەش ئۈچۈن قىيدىم بوۋامنىڭ تىغىدا ،
  بول ماڭا ئۆتكۈر قىلىچ ،ياتما مەزلۇملىق قېنىدا .

  قەغىزىم ئۈستىدە ماڭساڭ ، كۈتكىنىمدىن ئىز ياسا ،
  ھەر چېكىتتە ھۆرىيەت _ ئىقبالىغا نېگىز ياسا .

  كۈيلە تاغ باشىدا بولساڭ ، تاغۇ _ تاشلار تىتىرىسۇن ،
  ھەيۋىتىڭدىن ئەزگۈچى ھاكىم سىنىپ قان يىغلىسۇن !

  قەغىزىم ئۈستىگە ئەمدى چۈشمىگەي ياش ئىزلىرىڭ ،
خوش _ خوش ئېيتىپ ، كەتسۇن ئەمدى بۇ يىغىچان گەزلىرىڭ .

  مەن سېنى ماۋزۇ قىلىپ ، چوڭ جەڭ ئۈچۈن ئاتىدىم ،
  بىر كېچە گويا خىيالدا ياۋ كۆزىگە قادىدىم .

جەڭدە يەڭگەچ قەبرىمە < لەۋھە > بولۇپ ياتماقچىسەن ،
تۈنلىرىمنى كۈن ياساپ ، گۆھەر كەبى يانماقچىسەن .

قېنى ئەمدى كۈيلىگىن ئەسىرىمگە لايىق ناخشىنى ،
مەنمۇ تاللاپ يۈرمىدىم سەندىن بۆلەك بىر ياخشىنى !

           

                       ئايلىناي!

   ئەي ئەزىز يۇرتۇم سېنىڭ باغچا _ سارايلىرىڭدىن ئايلىناي ،
  زەپىران تۈسلۈك سېنىڭ غەمكىن چىرايىڭدىن ئايلىناي .
   قوينۇڭدىكى ئالتۇن _ كۈمۈشلۈك تاغلىرىڭدىن ئايلىناي ،
   كۆكسۈڭدىكى لەختە _ لەختە قان داغلىرىڭدىن ئايلىناي .

   دەريايىڭدا مۇڭلىنىپ ئاققان سۈيۈڭدىن ئايلىناي ،
  قايغۇ _ ماتەم ، غەمگە چۆككەن ناخشا _ كۈيۈڭدىن ئايلىناي .
  سۇمبۇل چاچلىق ، قەلەمقاشلىق قىزلىرىڭىدىن ئايلىناي ،
  ئانىلىق دەردىدە قالغان قان ئىزلىرىڭدىن ئايلىناي .

   تىلى باغلىق ، دىلى داغلىق شائىرلىرىڭدىن ئايلىناي ،
   زۆھراسى يوق ناتىۋان تاھىرلىرىڭدىن ئايلىناي .
   ئايلىاي يۇرتۇم ئايلىناي ، ئالىملىرىڭدىن ئايلىناي ،
  تىلى يۇمشاق دىلى قاتتىق زالىملىرىڭدىن ئايلىناي !

         

گۈلزار

  ئابدۇرېھىم ئۆتكۈرنىڭ شېئىرلىرىنى مەنمۇ بەك ياقتۇرىمەن . بۇ شېئىرلارنى ئوقۇش پۇرسىتى يارىتىپ بەرگىنىڭىزگە رەھمەت .

tarhanbag

يېڭى دەۋر ئۇيغۇر شىئېرىيىتىدىكى نەمۇنە ئىدى. مەن بۇ مۆھتىرەم ئۇستازنىڭ شىېرلىرىنى سۇيۇپ ئوقۇيتۇم. قايتا كۆرگەنلىكىمدىن ناھايىتى خوشالمەن.

زەپەر

ئابدىرەھىم ئۆتكۈرنىڭ شىئېرلىرىدىن خەۋەردار قىلغانلىقىڭىزغا كوپ تەشەككۈر . رەخمەت سىزگە