دەللال
(ساتېرا)
ئالاھىدىن ئابدۇرېشىت
بولۇپ كەتتى تالاي قىزلار سېنىڭ قۇربانلىقىڭ دەللال، ئەقىلدىن ئازدۇرۇپ ئىپلاس ھۆنەر-شەيتانلىقىڭ دەللال، ئاتاڭغا نېمىمۇ دەرسەن، قېنى ئوغلانلىقىڭ دەللال؟ ئاناڭنى شەرمىسار قىلدى مانا ھايۋانلىقىڭ دەللال، قېنى ئۇ سەندىكى ۋىجدان، قېنى ئىنسانلىقىڭ دەللال؟
پالاقلاپ، ئۆمىلەپ باشتا چوڭاملار پېشىنى تۇتتۇڭ، ئايالىڭ تاللىدى بولغاي، ئويۇنچى-يېشىنى تۇتتۇڭ، ھاراققا تۇتمىسا تاۋى، چېكىشكە نېشىنى تۇتتۇڭ، كۆڭۈل ئۇتماق ئۈچۈن بەزى ئېشەكنىڭ بېشىنى تۇتتۇڭ، پۇلۇڭ بولدى، يولۇڭ بولدى، يوقاپ ۋەيرانلىقىڭ دەللال.
تۈزۈپ سورۇن، كۈتۈپ مېھمان، يەنە ھاجەتكە قىز تاپتىڭ، ئۇرۇپ تېلېفۇننى ھارماستىن، بولۇپ ئاپشاركا ئىز تاپتىڭ، تۆلەپ ھور مۇنچىغا پۇلنى، ياتاقنى شۇنچە تېز تاپتىڭ، ئۇيالماي «ھەق» بېرىپ «قىز»غا، زاكالەت پۇلدا يۈز تاپتىڭ، ئاھانەت بولدى ئەرلىككە سېنىڭ گۇمرانلىقىڭ دەللال.
ئېچىپ مېھمانساراي ئاندىن، تىجارەت باشلىدىڭ ھەيھات، ئۆيۈڭنىڭ پەكىرى ئۇچتى، بالاڭنى تاشلىدىڭ ھەيھات، خېرىدار كۆڭلىنى ئىزدەپ خوتۇننى ياشلىدىڭ ھەيھات، چوڭاملارنى كۈتۈپ كاتتا، ئېغىزمان قاشلىدىڭ ھەيھات، يوقالدى دەككە-دۈككەڭ ھەم يېرىم-نىمجانلىقىڭ دەللال.
قىلىپ كۆز-كۆز ئۆزۈڭنى سەن، ئاۋام ئالدىدا ھال تارتىپ، جاھاننى ئايلىنىپ چىقتىڭ تېخى ياتلارغا«مال»تارتىپ، بولۇپ رەسۋا، سېتىپ قىزنى، سېتىپ ئىپپەت، ئايال تارتىپ، ئېلىپ كەلدىڭ ئېلىڭگە سەن قاباھەتلىك زاۋال تارتىپ، بىلىنمەي ساڭا بۇ ئىپلاس كۈنۈڭ-سەرسانلىقىڭ دەللال.
مانا، سەن كاتتا باي بولدۇڭ، «يوقالدى» شوۋىكەش نامىڭ، يۈزۈڭدىن قارىنى «يۇيدى»، يەنە شۇ پۇل بىلەن دامىڭ، بىراۋغا ئاي كېرەك بولسا ئېلىشقا يېتىدۇ چامىڭ، «سولامچى»دەپ تۈكۈرسە ئەل، ئاڭا يوق«جىم»ۋە يا«لا»مىڭ، ساڭا ئامەت ئېلىپ كەلدى ئەشۇ پايخانلىقىڭ دەللال.
بىلىپ قوي، قۇلىقى ئەللىك ئاۋامنىڭ، بۇ ھەقىقەتتۇر، رەزىل قىلمىشلىرىڭ، پەسكەش ھاياتىڭ ئەلگە ئىبرەتتۇر، ياشاش ئىنسانغا ئىنساندەك پەقەت تۆت كۈن غەنىمەتتۇر، ھىدايەت يولىغا قايتماق ساڭا ھەقتىن دەلىلەتتۇر، دوزاقنىڭ تۆرىدە يوقسە① «ئەزىز مېھمان»لىقىڭ دەللال!
يوقسە①-بولمىسا دېگەن مەنىدە. بۇ يازمىنى ئاخىرىدا alahidin تەھرىرلىگەن. ۋاقتى 2012-9-25 12:59
|