ئۇپۇقۇمدا پارلاق بىر سەھەر

alahidin

ئۇپۇقۇمدا پارلاق بىر سەھەر

ئالاھىدىن ئابدۇرېشىت

ئۇيقۇلۇق تۈن شىرىن چۈشكە قۇت-
ئىستەر رەت-رەت تىۋىنىشىدە.
تۇيغۇلىرىم ياندى بولۇپ ئوت،
قىزغۇچ شەپەق كۆرۈنىشىدە.

لەيلەپ يۈرەر نېپىز ئاق تۇمان،
يۇلتۇزلارغا سالغانچە گىرە.
چەت گىرۋەكتە ھىلال ئاي شۇئان،
چاقنار كۆزنىڭ ئېقىدەك بىرە.

مەسۇم ئورمان قالار تەۋرىنىپ،
شامال تىترەپ ئۇچقاندا ئاستا.
بىھۇشلۇقتىن ئەتراپ يېشىنىپ،
ئۇپۇقلارغا زەن سالار ھەتتا.

تۆپىلىكلەر ياتار لوغۇلداپ،
قارچۇقلارغا سىغماس بىر سۈرەت.
نۇر تۆكۈلەر دەم-دەم ھالسىراپ،
چەكسىزلىكىڭ ئېھ، بۇ تەبىئەت!

دەريا ئاقار كۆككە ئۆرىدەپ،
ئويغاق دولقۇن شاۋقۇنلۇق تەۋرەر.
بوشلۇقلارنى كېلەر چۆرىدەپ،
بوشلۇقۇمدا پارلاق بىر سەھەر.

تاۋلىنىدۇ بىر دالا گۈلدەك،
يانتاق چېچەك تاشلىغان دالا.
قىر باغرىدا بوز تورغاي سەگەك،
تۇنجى كۈيدە كۈيلىنەر سەھرا....

1985-يىلى، 8-ئاي، ئۈرۈمچى.

بۇ شېئىر«قەشقەر ئەدەبىياتى»ژورنىلىدا ئېلان قىلىنغان.

زەپەر

ئالاھىدىن ئاكا ئۈزىڭىزنىڭ بۇرۇندىن تارتىپ تولاپ قويغان ياخشى شىئېلىرىڭىز باركەندە. رەخمەت سىزگە

admin

راس گەپنى دىسەم خۇدايىم سىزگە بۇ تالانتنى ئايماي بېرىپتكەن. شىئېرلىڭىز بىر-بىرىسىدىن ئېسىل يېزىلىپتۇ.  سالامەتلىك سىزگە  يار بولغاي، شۇنداق ئېسىل شىئېرلىڭىز ئۈزۈلۈپ قالمىغاي.

نونى

لەيلەپ يۈرەر نېپىز ئاق تۇمان،
يۇلتۇزلارغا سالغانچە گىرە.
چەت گىرۋەكتە ھىلال ئاي شۇئان،
چاقنار كۆزنىڭ ئېقىدەك بىرە.

مەسۇم ئورمان قالار تەۋرىنىپ،
شامال تىترەپ ئۇچقاندا ئاستا.
بىھۇشلۇقتىن ئەتراپ يېشىنىپ،
ئۇپۇقلارغا زەن سالار ھەتتا.

يۇقارقى تەسۋىرلەر ئاجايىپ يەڭگىل ھەم يېقىشلىق چىقىپتۇ.