كۈي كۈيلەيدۇ خىلۋەتتە بىر چال

alahidin

كۈي كۈيلەيدۇ خىلۋەتتە بىر چال

ئالاھىدىن ئابدۇرېشىت

كۈي كۈيلەيدۇ خىلۋەتتە بىر چال،
چانىقىدا مۇڭلىنار دەريا.
نەم تۇپراقنى تىلغايدۇ بەزەن،
كەتتى قايان ئۇ سۆيگەن بەرنا؟

گاھ سىلايدۇ ساتار تارىنى-
ياشلىقىنى ئېسىگە سالغان؛
ۋە ئەسلەتكەن قۇتلۇق چاغلارنى،
گۈزىلىنى-كۆڭلىنى ئالغان.

سەزمەيدۇ ئۇ، سەزمەيدۇ پەقەت،
كۈيى ساما بېتىنى سۆكەر.
چاقماق بىلەن ئېقىپ ئالدىدىن،
شۇدەم كەچمىش كۈنلەرلا ئۆتەر.

ئۆتەر شۇدەم ئۇنىڭ ئالدىدىن،
مۇھەببەتلىك يىگىتلىك گېزى.
ئۆتەر سۆيۈپ يۈرىكىنى ھەم،
ئايدىڭلاردا قالدۇرغان ئىزى.

گۈزەل ئىدى كەمپىرى بىر چاغ،
يۈرىكىگە ھەل بەرگەن چېھرى.
سۆيگەنىدى چال ئۇنى دىلدىن،
دولقۇتلاتقان دەريانى مېھرى...

نەم تۇپراقنىڭ قوينىدا ياتار،
چالنى تاشلاپ كەمپىر خىرامان.
چال كۈيلىسۇن ئۇندا كۈيىنى،
جۈپتى بارلار بولسۇن تېچ-ئامان!

1985-يىلى، 8-ئاي، ئۈرۈمچى.

بۇ شېئىر«قەشقەر گېزىتى»دە ئېلان قىلىنغان.

admin

بۇ شىئېرىڭىزمۇ بەك ياخشى چىقىپتۇ. شىئېرلىڭىزنى توپلام قىلىپ رەتلەش ئىشلىرىڭىز قانداق بۇلاۋاتىدۇ؟

نونى

بۇ شېئىرىڭنى بۇرۇن بىز ئوقۇۋاتقان چاغلاردا ساڭا قايتا-قايتا ئوقۇتۇپ ئاڭلايتتۇق. ھەتتا خاتىرىمىزگىمۇ كۆچۈرۈپ ئالغان ئىدۇق. بۇ قېتىم قايتا بىر زوقلىنىش پۇرسىتى ياراتقىنىڭغا رەھمەت!