ئىلاھىي سىماھ

alahidin

ئىلاھىي سىماھ
(مۇۋەششەھ)

ئالاھىدىن ئابدۇرېشىت

دېڭىزلار يالمىغان تاشلار ئۈنۈپ چىقتى قاراقىڭدىن،
نىگاھلار سەتھىدە دەۋرەر ئۇچۇپ تاغلار قۇچاقىڭدىن.

ئېچىلدى قەلبسىرى ئالەم، سامالار كۆزنىكى پارلاپ،
شەپەقلەر يالقۇنى ئۆرلەپ ئۈزۈلدى نۇر ساداقىڭدىن.

ھايات بىخ سۈردى قانلار دولقۇنىڭدىن تۇپرىقىڭ ئۆزرە،
قۇياشنىڭ چېچىكى بەرق ئۇردى روھ كۈلگەن سىياقىڭدىن.

قىران پەسلىدە سۆيگۈڭنىڭ ئەسىرلەر كۈيى ــ يادىڭ بار،
ئاقار بىر ئىزگۈلۈك بەرھەق تېنىڭ تۆككەن بۇلاقىڭدىن.

ئاداشتىممۇ سېنى بار دەپ ئىلاھلار سىنچىدا ھەتتەڭ،
بېھىشنى سەيلىتىپ تۇرغان چېغىم تەختۇ - راۋاقىڭدىن؟

نىدالار كەلدى قەلبىمگە پايانىدىن سۈكۈتلەرنىڭ :
رىياكارسەن ئىلاھلارغا ئوقۇلغان كۈي ــ قوشاقىڭدىن!

بۇ شېئىر«قەشقەر ئەدەبىياتى»ژورنىلىدا ئېلان قىلىنغان.

زەپەر

ئالاھىدىن ئاكا ياخشىمۇ  سىزنىڭ بۇ شىئىر يېزىشتا ئىشلەتكەن تىللىرىڭىز ئۆزگۈچە ئىكەن .راستىنلا  ئۇبدان تەپسىلى  ئۇقۇپ چۈشەنمىسە چۈشەنگىلى بولمايدىغان تىللارنى ئىشلىتىدىكەنسىز . سىز ھازىرقى زامان يازغۇچىللىرى ئىچىدە تىلغا ئىنتايىن باي بۇلۇپ يازمىللىرىڭىزدا پاساھەتلىك تىللارنى قوللىنىپ يازغانلىقىڭىزنى قىزغىن قارشى ئالىمەن .شىئىر ئەسەرلەردە تىل ئىشلىتىش ئىنتايىن مۇھىم ئۇرۇندا تۇردۇ.
، رەخمەت سىزگە

ئامان

‹‹ دېھقان ››!!! .....  شېئىر مىسرالىرىڭىزدىن ‹‹دېھقان›› سۆزى ئىپادىلەنسە، ئىپادىلىگەن پىكىرلىرىڭىزدىن جاپاكەش دېھقاننىڭ چىدام-غەيرەتلىك، مىننەتسىز، جاپاكەش دېھقاننىڭ سىماسى جىلۋىلىنىپ تۇرۇپتۇ. رەخمەت سىزگە دوستۇم.

كەۋسەر

شۇغىنىسى مۇقەددەس سۆزلەرنى قالايمىقان ئىشلىتىش ئۆزىمىزنىڭ ئېتىقادىغا ماس كەلمەيدىغان ئىش ئىدى .

alahidin

شۇغىنىسى مۇقەددەس سۆزلەرنى قالايمىقان ئىشلىتىش ئۆزىمىزنىڭ ئېتىقادىغا ماس كەلمەيدىغان ئىش ئىدى .
رىياكارسەن ئىلاھلارغا ئوقۇلغان كۈي ــ قوشاقىڭدىن!
كەۋسەر، بىلىپ تۇرۇپتىمەن،  سىز يۇقىرىقى مىسرانى دېمەكچى، دېگىنىڭىز تامامەن توغرا! بۇ شېئىرنى ئەقىلسىز،  بالىچاق چاغلىرىمدا يازغان ئىكەنمەن، كېيىن شۇ بويىچە ئېلان قىلىنىپ كەتكەنىكەن. ھەلىھەم بولسىمۇ تۈزەتمەيلا مۇنبەرگە يوللاپ قويۇپتىمەن، ئۆزرىلىكمەن! گۇناھىمنى ياراتقان ئىگەم كەچۈرگەي...