بەخت بىر خىل تۇيغۇ

1چىچەك

بەخت بىر خىل تۇيغۇ

بەخت دېگەن زادى نېمە؟ كىشىلىك ھاياتتا ئىنتىلىدىغان بەخت زادى نەدە؟ ئېھتىمال بىز بۇ مەسىلە ھەققىدە ئىزچىل ئويلىنىپ كېلىۋاتقاندۇرمىز. ‹‹بەخت بىر خىل تۇيغۇ›› دېگەن كىتابتا 205 پارچە كىشىلىك ھايات ھەققىدىكى ھېكايە، شۇنداقلا ھېكايىنىڭ ئارقىسىدا پەيدا بولغان قەلبىنىڭ چوڭقۇر يېرىدىكى تەسىرات ئارقىلىق دانىشمەنلىككە تولغان نۇرغۇن ھاياتلىق قانۇنىيەتلىرى ھەققىدە مەنتىقىي يول بىلەن ئومۇمىيلىقتىن جۈزئىي خۇلاسە چىقارغان.

　　كىتابتىكى بىر ھېكايە ئادەمنى ئۆزىگە بەكلا جەلپ قىلىدۇ. ئۇ ھېكايىدە ئېيتىلىشىچە، ئۆمرى ئاخىرلىشاي دەپ قالغان بىر باي بولۇپ، قىش كۈنى ئىللىق قۇياش نۇرىدا دېڭىز بويىغا بېرىپ سەيلە قىلىۋېتىپ بىر بېلىقچىنىڭ ئاپتاپسىنىۋاتقانلىقىنى كۆرۈپ، ئۇنىڭدىن: ‹‹نېمىشقا بېلىق تۇتقىلى بارمىدىڭ؟ ئۇنداقتا سەن باي بولغاندىن كېيىن بېلىق تۇتمايسەن، بەخت دېگەن مۇشۇ يەردە ئاپتاپسىنىشمۇ›› دەپ سوراپتۇ. ‹‹مەن ئاپتاپ سۇنىۋاتمايمەنمۇ؟›› دەپ ياندۇرۇپ سوراپتۇ بېلىقچى. باي بىر ھازاغىچە گەپ-سۆز قىلماپتۇ. ھېكايە ئىنتايىن ئاددىي بولسىمۇ، لېكىن ھېكايىدە ئوتتۇرىغا قويۇلغان مەسىلە بىزنى تەسىرلەندۈرىدۇ: ھەركىمنىڭ بەخت ھەققىدىكى چۈشەنچىسى ئوخشاش بولمايدۇ ھەم ئوخشاش بولمىغان ئۆلچىمى بولىدۇ. ئالتۇن تاۋاق، كۈمۈش قوشۇق، يىپەك كىيىم، ئېسىل غىزالاردىن بەختنى كۆرگىلى بولمايدۇ. يىرتىق (جۇلدۇر) چاپان، كونا ئاياق، يىرىك تاماق، گۆشسىز قورۇمىلاردىن بەختسىزلىكنى كۆرگىلى بولمايدۇ. چۈنكى بەختنىڭ يۇقىرى تۆۋەن مەرتىۋىسى بولمايدۇ، دەرىجىسىمۇ بولمايدۇ.

　　ئەمەلىيەتتە، بەخت بىر خىل سىمۋول، بىر خىل تۇيغۇ، سىز ئۇنى ھېس قىلالىسىڭىز سىزنىڭ بولىدۇ. ئۆزىدە بارنىڭ ھەممىسىنى قەدىرلىگەنلەر دەل ئەڭ بەختلىك كىشىلەردۇر ھەمدە بەخت يەنە كېلىپ بەك ئاددىي بولىدۇ. ئۇ ھەرگىز بىزنىڭ تەسەۋۋۇرىمىزدىكى كۆز يەتسىمۇ قول يەتمەيدىغان نەرسە ئەمەس، نۇرغۇن ۋاقىتلاردا بىزنىڭ يېنىمىزدىلا بولىدۇ، تۇرمۇشىمىزنىڭ ھەر بىر دەقىقىسىدە، ھەر بىر كىچىك ھېكايە ئىچىدە بولىدۇ.

　　ئەگەر قولغا كەلتۈرگەننى بىر خىل بەخت دېسەك، ئۇنداقتا، بەدەل تۆلەشمۇ بىر خىل بەخت. چۈنكى سىز بەدەل تۆلىگەن چاغدا باشقىلارنى خۇشال قىلىسىز. چۈنكى سىز خۇشال بولسىڭىز، مەنمۇ خۇشال بولىمەن-دە، بۇ بەخت ئەمەسمۇ؟ ئۆزئارا ئىززەت قىلىشىپ ياشاشمۇ بىر خىل بەخت دېيىلسە، ئۇنداقتا، بىر-بىرى بىلەن دېۋىنىشىپ، ئۇنى-بۇنى تالىشىپ، غۇدۇراپ ئۆتۈشمۇ بىر خىل بەخت، ۋالاقلاش ئىچىدە كۆيۈنۈش، غۇدۇراش ئىچىدە بىر خىل ھەقىقىي ھېسسىيات بار ئەمەسمۇ؟ شۇڭا، بىزنىڭ تۇرمۇشىمىزدا بەخت كەم بولمايدۇ، بەلكى ئۇنى بايقاش كەم بولىدۇ، خالاس. پەقەت سىز ئۇنى چىن كۆڭلىڭىزدىن ھېس قىلالىسىڭىزلا، ئۇ ھەممىلا يەردە بار. (ئۇنىڭ يوق يېرى يوق)، پەقەت ئۇنى سېزەلىسىڭىزلا، سىز كىشىلىك ھاياتقا ئاكتىپ روھىي ھالەت بىلەن مۇئامىلە قىلالىسىڭىزلا نۇرغۇن ۋاقىتلار سىزنىڭ خۇشال بولغان ۋاقىتلىرىڭىز بولىدۇ.

　　ئەلۋەتتە، بەختنىڭ بولۇش-بولماسلىقى تامامەن ئۆزىمىزگە باغلىق، ئۆزىمىزنىڭ ئىقتىدارى، پەزىلىتى، پۇرسىتىگە نىسبەتەن ئوبيېكتىپ تونۇشتا بولساق، ئۆزىمىزنىڭ جەمئىيەتتىكى تېگىشلىك ئورنىمىزنى تاپالايمىز، بىر ئۈلۈش يەڭگىلتەكلىكنىڭ كەم بولغانلىقى بىر ئۈلۈش تىنچلىقنىڭ كۆپ بولغانلىقى ئەمەسمۇ؟

　　دوستلار، كىشىلىك ھايات ھەققىدىكى ھېكايىلەرگە چىن قەلبىمىزدىن قۇلاق سالساقلا، كىشىلىك ھاياتنىڭ چىنلىقى ۋە گۈزەللىكىنى بايقىيالايمىز، سۆيگۈ، مېھىرگە تولغان قەلب بىلەن دۇنيانى بايقىساق، تولۇپ-تاشقان ئىشەنچىگە تولغان دۇنيانى كۆرەلەيمىز (دۇنيا كۆز ئالدىمىزدا نامايان بولىدۇ).

　　بىز قەلبىمىزنىڭ ئەڭ پىنھان جايىدا بەختنى ھېس قىلايلىچۇ، بۈگۈننىڭ ئۆزىدىلا، مۇشۇ پەيتتىلا.

‹‹ياشانغانلارنىڭ كەيپىيات پىسخىكىسىنىڭ ئۆزگىرىشى ۋە ئۇنىڭغا تاقابىل تۇرۇش›› ناملىق كىتابتىن

دىلرۇس

بەخت، ھەركىمنىڭ ئۆز قولىدا بولىدۇ. مېنڭچە بەخت بىر تۇيغۇ بولۇپلا قالماستىن، يەنە ئۇ بىر سىزىم (ئۇنى سەزگەنلەر ئۈچۈن).
ئەمەلىي تېما ئېلىپ كەلگىنىڭىزگە رەھمەت.

زەپەر

مەن ئويلايمەن مەخىت ھەر قانداق كىشىنىڭ ئۆز قۇلىدا بۇلىدۇ دەپ ئويلايمەن

بەختىيار(بايقاش

مېنىڭچە روھيىتىمىزنى شادىلاندۇرغان ھەر قانداق ئىشتىن شەكىللەنگەن بىۋاسىتە تۇيغۇ،سىزىم بولسا بەخىتتۇر،بەختنىڭ ئۆلچىمى بولمايدۇ،مەزمۇنى دائىرىسى ھەر قانداق چەكلىمىگە ئۇچرىمايدۇ...
تېمىڭىزغا رەھمەت.

ئامان

بەخت بىر خىل تۇيغۇ، سىز ئۇنى ھېس قىلالىسىڭىز سىزنىڭ بولىدۇ. ئۆزىدە بارنىڭ ھەممىسىنى قەدىرلىگەنلەر دەل ئەڭ بەختلىك كىشىلەردۇر ھەمدە بەخت يەنە كېلىپ بەك ئاددىي بولىدۇ. ئۇ ھەرگىز بىزنىڭ تەسەۋۋۇرىمىزدىكى كۆز يەتسىمۇ قول يەتمەيدىغان نەرسە ئەمەس، نۇرغۇن ۋاقىتلاردا بىزنىڭ يېنىمىزدىلا بولىدۇ، تۇرمۇشىمىزنىڭ ھەر بىر دەقىقىسىدە....

پاھ، نىمە دىگەن ئېسىل دۇردانىلەر-ھە!.... بەخت ھامان ئاددىلىق ئىچىدە بۇلىدۇ، ئۇنى ھىس قىلىش بىزدىن سەۋرى-تاقەت ۋە قانائەتچانلىقنى تەلەپ قىلىدۇ، شۇندىلا ئۇ سىزگە نىسىپ بۇلىدۇ.
رەھمەت سىزگە، بەخت ئۈستىدە تۇرۇپ، بەختنى ھىس قىلالمايۋاتقانلار ئۈچۈن ناھايىتى ئەھمىيەتلىك ئوقۇشلۇق ئىكەن. مۇشۇنداق ئەھمىيەتلىك تېمىلىرىڭىز ئۈزۈلۈپ قالمىغاي.

گۈلزار

بەخت - بەختنى بىلگۈچىلەرگە ھەم ئاشۇ بەختىنىڭ قەدرىگە يەتكۈچىلەرگە مەنسۈپ  . رەھمەت سىزگە
来自: Android客户端

ئىلغار

بەخىت ئۆز قەدرىنى بىلگۈچىلەردە، ۋاقىتنىڭ قەدرىنى بىلگۈچىلەردە،ۋاختىڭ كەتتى -بەختىڭ كەتتى