‹ساھىبجامال› ئوغرىلار ‹‹فانتازىيلىك ھېكايە››

ئۆزقۇت

ئالىمجان نەسىردىن ئۆزقۇت
‹ساھىبجامال› ئوغرىلار
فانتازىيىلىك ھېكايە

ۋوگزال ئادەم دېڭىزغا ئايلانغانىدى.ئۆز مەنزىلىگە ئالدىراپ تۇرغان يولۇچىلار بېلەت ئېلىش ئورنىدا قاتار-قاتار بولۇپ نۆۋەت كۆتۈپ تۇرىشاتتى.بۈگۈن چاغاننىڭ ئاخىرقى مەزگىلى بولغاچقا پويىز ئستانسدا ئادەملەر ھەقىقەتەن كۆپ،بېلەت ئېلىش ئىنتايىن تەس ئىدى.
مەمەت ئۈزۈن كەتكەن ئۆچرەتتە بىردەم تۇرۇپ بىقىپ ئىچى پۇشتى بولغاي چىقىر كۆزلىرىنى تۆت ئەتراپقا يۈگۈرتتى.‹ئوغرىغا مال كەم بولمامتۇق›دېگەندەك  تۇيۇقىسز كۆزى قاتاردا نۆۋەت كۆتۈپ تۇرغان ئالدىدىكى قىزغا چۈشتى.
ئۇ قىزغا سىنچىلاپ قاراپ بىر يەردە كۆرگەندەك ھېس قىلىدىيۇ،تازا ئېسىگە ئالالماي،كاللىسىنى ئاللىقانداق خىياللار چىرمىۋالدى.
مەمەت ئۆتكەن ئايدا بۇ قىزنى بىر كىيىم-كېچەك تاللا بازىرىدا تۇنجى قېتىم كۆرگەنىدى. شۇ چاغدا قىز قۇندۇزدەك چېچىنى ئىككى تال قىلىپ ئۆرۈپ،ئالدىغا تاشلىۋالغان، ئۇچىسىغا ئاق نوركا چاپان كىيگەن، دولىسىغا ئاق سومكا ئاسقان، پۇتىغا چۇچۇلۇق يۇمشاق ئۇزۇن ئۆتۈك كىيگەن، يۈزى ئازراق تاتىراڭغۇ، كۆزلىرى قاپقارا، ئاغزى ئويماقتەك ئىدى.بىر كۆرگەن كشنىڭ دىققتىنى ئۆزگە تارتاتتى.
مانا بۈگۈن بۇ قىز مەمەتنىڭ ئالدىدا ئۆچىرەتتە تۇرغانىدى. مەمەت قىزنىڭ چىرايىنى كۆرۈشكە شۇنچە ئىنتىلىپ باقتى-يۇ، پەقەت قىز بېلەتنى ئېلىپ بولۇپ قايتقىنىدا ئۇنىڭ گۈزەل رۇخسارىنى كۆرۈش نېسىپ بولدى. قىزچاق مەمەتنىڭ ئۆزىگە دىققەت قىلىۋاتقانلىقىنى سېزىپ قالدى بولغاي، شۇ زامان يەرگە قاراپ ئۆتۈپ كەتتى.ئۇ قىزغا بىر نېمە دېمەكچى بولۋىدى،بۇ چاغدا بېلەت ساتقۇچى ئايال:
-سىزگە قەيەرنىڭ بېلىتىنى كېسىمەن؟-دەپ سوردى.
-ئۈرۈمچىنىڭ بېرىپ-كېلىشنىڭ بېلىتىنى ئالىمەن،-دېدى مەمەت بېلەت ساتقۇچى ئايالغا ئالىيىپ قاراپ.ئۇ ئۈرۈمچىگە بېرىپ-كېلىشنىڭ بېلىتىنى سېتىۋىلىپ پويىزنىڭ يەنە بىر يېرىم سائەتتىن كېيىن يولغا چىقىدىغانلىقنى ئۇقتى-دە، ۋاقىتنى ئۆتكۈزۈش ئۈچۈن ۋوگزال ئەتراپىدىكى بىر ئاشپۇزۇلغا كىرىپ، قورسىقىغا ئازراق بىر نەرسە يەپ پويىز كۆتۈش زالغا يېنىپ چىقىتى. ئۇ بىر ‹‹قىزىل كالا ئېچىملىكى›› ئېچكەچ ئۇياق-بۇياققا مۇكىدەك ئۆتۈشۈۋاتقان يولۇچىلارغا، بولۇپمۇ مودا كىيىنگەن،چىرايىلىق قىزلارغا قاراپ ئولتۇراتتى. تۇيۇقىسز كۆز ئالدىدا ھېلىقى قىز زاھىر بولدى-دە،يۈرىكى ئەنىسز سوقۇشقا باشلىدى.
قىز پويىز كۆتۈش زالىنىڭ بىر بولۇڭىدا چىرايلىق كېيىنگەن بىر قىز بىلەن ئاللىقانداق ئشلار ئۈستدە قىزغىن پاراڭلىشىۋاتاتتى.بۇ چاغدا مەمەتنىڭ كۆڭلىگە شەيتان كىردى-دە، بىر ئامال قىلىپ قىزنىڭ دىققىتىنى ئۆزىگە تارتىپ،پويىزغا چىقىشتىن بۇرۇن ئشنى توغرىلىماقچى بولدى. ئەمما،قىزچاق ئۆزىنىڭ پارىڭى بىلەن بەند ئىدى.مەمەتكە قاراشقا ھەپسلى يوق ئىدى.
بىردەم ئۆتكەندىن كېيىن قىز يېنىدىكى قىزدىن ئايرىلىپ،پويىزدا يېيىش ئۈچۈن ۋوگزال تاللا بازىرىغا كىرىپ كەتتى.مەمەتمۇ دەرھال ئورۇندىن تۇرۇپ،تاللا بازىرىغا قاراپ ماڭدى.قىز تاللا بازىرىدىن بىر خالتا يېمەكلىكىنى ئېلىپ چىقىپ كەتتى.مانا ئەمدى مەمەت ئۇنىڭغا سايىگە ئوخشاش ئەگەشكەنىدى.قىز ئېرەنسىز ھالدا پويىز توختايدىغان ئورۇنغا قاراپ ماڭدى.مەمەتىمۇ ئەگىشىپ پويىز توختايدىغان ئورۇنغا كىردى.دەل مۇشۇ چاغدا، بىرسى مەمەتنى سوقۇۋەتكەندەك قىلدى،ئۇنى سوقۇۋەتكەن ئادەم مودا كېيىنگەن بىر قىز ئىدى.
مەمەت بۇ قىزنى بىر يەردە كۆرگەندەك قىلاتتى.لېكىن قەيەردە كۆرگەنلىكىنى دەرھال ئېسىگە ئالالمىدى. قىز تاتلىق بىرنى كۈلۈپ قويۇپ:
ـ كەچۈرۈڭ،خىيال بىلەن مېڭىپ قاپتىمەن،-دېدى قىزارغان ھالدا.
- ھېچ ۋەقەسى يوق.بۇنىڭدىن كېيىن دىققەت قىلىپ مېڭىڭ،-دېدى مەمەت قىزنى قەيەردە كۆرگەنلىكىنى ئەسلەپ. ‹‹كىمىدۇر بۇ،ئەجەب چىرايلىق قىز ئىكەن،قەيەردە كۆرگەندىمەن؟››دېگەندەك خىياللار ئسكەنجىسدە كېتىۋاتقان قىزنىڭ كەينىدىن قاراپ تۇراتتى. ساھىبجامال قىز بولسا تېز-تېز قەدەملىرى بىلەن ئادەملەر توپىغا سىڭىپ كەتتى.بۇ قىز پويىز كۆتۈش ئۆيدە ئۆچرەتتە تۇرغاندا كۆرگەن قىز بىلەن پاراڭلىشىپ تۇرغان قىز ئىدى.
مەمەت خىلى بىر ھازاغىچە تۇرغان جايدا قاققان قوزۇقتەك تۇرۇپلا قالدى.ئۇ جىلە بولغان ھالدا بىر تال تاماكا چېكىش ئۈچۈن يانچۇقىغا قولىنى سالغانىدى، يانچۇقى قوپقۇرۇق بولۇپ چىقتى. يانچۇقىدا پورتمالىمۇ كۆرۈنمەيتتى.ئۇنىڭ چىرايى بىردىنلا تاتىرىپ كەتتى. ‹‹پورتمالىنى قەيەردە چۈشۈرۈپ قويغاندىمەن›› دەپ ئويلىدى. پورتمالدا پۇل، ئىناۋەتلىك كارتا، مائاش كارتىسى، كىملىك،خىزمەت كىنىشكىسى قاتارلىقلار بار ئىدى. ئۇ توساتتىن بايا ئۆزىنى سوقۇۋەتكەن ھېلىقى قىزنى يادىغا ئالدى-دە، كاللىسىغا: ‹‹ شۇ قىز پورتمالىنى ئوغرىلىۋالدى››دېگەن خىيال كەلدى.
مەمەتنىڭ كاللىسغا: ‹‹ئەمدى قانداق قىلىش كېرەك؟ ھېلىمۇ ياخشى پويىز بېلىتى يەنە بىر يانچۇقۇمدا ئىكەن›› دېگەن خىياللار كەلدى.لېكىن بۇ چاغدا ئاللابۇرۇن كېچىككەنىدى.
ئۇ دەرھال ۋۇگزال ساقچىسىنى تېپىپ ئەھۋالىنى مەلۇم قىلدى.ساقچىلار بولغان ۋەقەنى، قىزنىڭ تەقى-تۇرقىنى بىر قۇر سۈرۈشتۈرۈپ خاتىرىلەپ قويدى.
پويىز بېكەتكە كىرىپ ئاستا توختىدى.يولۇچىلار ئالدىراش ھالدا پويىزغا چىقىۋاتاتتى.مەمەتمۇ بېشغا كەلگەن بۇ پىشكەللىكنى ئويلىغاچ پويىزغا قاراپ ماڭدى.ۋاگۇن ئىچىدە ئولتۇرغۇدەك ئورۇنمۇ يوق ئىدى.ئۇ ئورۇن ئىزدەپ كۆزلىرىنى ۋاگون ئىچىدىكى بوش جايلارغا يۇگۇرۈتتى.
تۇيۇقىسز ئارقا رەتتە تېلېفۇن ئويناپ ئولتۇرغان بىر قىزنى كۆردى-دە،يۈرىكى ئەنىسز سوقۇشقا باشلىدى.بۇ قىز دەل بايا ئۇنى سوقۇۋەتكەن قىز ئىدى.ئۇ بىر بېسىپ-ئىككى بېسىپ قىزنىڭ يېنىغا كەلدى. قىزچاق پۈتۈن زېھنى بىلەن ئويۇن ئويناۋاتقاندەك قىلاتتى. قىزنىڭ يېنىدا بىر بوش ئورۇن بولۇپ، مەمەت ئاستا كېلىپ ئولتۇرۇپ قىزغا:
-مەن باياتىندىن بېرى سىزنى ئىزدەۋاتاتتىم، - دېدى. قىز بىر خىل ئىپادىسىز ھالدا مەمەتكە قارىۋېتىپ:
- مەن سىزنى تونۇمايمەن،- دەپ جاۋاب بەردى.
- تونۇيسىز،باياملا كۆرۈشكەن ئىدۇق،-دېدى مەمەت ئىزتىراپلىق خىياللار بىلەن.  
قىز ئېغىر بىر ئۇھسىنىۋېتىپ، تېلېفۇننى يانچۇقىغا سېلىپ قويۇپ:
- بۇ سىزنىڭ قىزلارنى ئوۋلاشتىكى ئۇسۇلىڭىزمۇ ؟ مېنى ئەخمەق قىلماقچىمۇ، مېنى نېمە كۆرۈپ قالدىڭىز؟-دېدى ئاچچىقلانغان ھالدا.
- مېنىڭ پورتمالىنى خاتا ئېلىپ قويۇپسىز، - دېدى مەمەت قىزنىڭ كۆزگە مىختەك تىكىلىپ تۇرۇپ.
- نېمە دېدىڭىز،مەن سىزنىڭ پورتمالىڭىزنى ئېلۋالىدىغان ئوغرى بولمىسام،قانداقسىگە ئېلىپ قويدىكەنمەن؟-دېدى قىز تېخمۇ ئاچچىقلانغان ھالدا.
- پورتمالىمنى سىز ئالدىڭىز، ئەگەر قايتۇرۇپ بەرسىڭىز بۇ ئىشلارنى ساقىچغا دەپ يۈرمەيمەن، قايتۇرۇپ بەرمىسىڭىز سىزنى ساقچىغا تاپشۇرۇپ بېرىمەن،-دېدى مەمەت پوپوزا قىلىپ.
-ماقۇل،سىزنىڭ پورتمالىڭىزنى قايتۇرۇپ بېرەي، -دېدى قىز.
قىز ئاق سومكىسىنى تىزىغا قويۇپ ئىچىدىن بىر پورتمالنى چىقىرىپ مەمەتكە تەڭلىدى.
مەمەت پورتمالنى قولغا ئېلىپ:
-ياق، بۇ مېنىڭ پورتمالىم ئەمەس، - دېدى.
بۇ چاغدا پويىز تېخى قوزغالمىغانىدى.تۇيۇقىسز قىز بىر نەرسىدىن ئۈركىگەن كېيىكتەك ئورنىدىن تۇرۇپلا قاچتى،مەمەت تاپ بېسىپ قىزنىڭ كەينىدىن قوغلىدى.قىز پويىزدىن چۈشۈپ بېكەت ئىچىگە قاراپ يۈگۈردى.مەمەتمۇ ھاسىراپ-ھۆمىدەپ قىزنىڭ كەينىدىن قوغلاپ كېلىۋاتاتتى. تۇيۇقسىز ئارقا تەرەپتىن بىر ئايالنىڭ ئەنسىز ۋارقىرىغان ئاۋازى ئاڭلاندى.
-ئوغرىنى تۇتۇڭلار، ئاۋۇ ئادەم پورتمالىنى ئېلىپ قاچتى.
مەمەتنىڭ ئالدىدا قېچىپ كېتىۋاتقان ھېلىقى قىز تۇيۇقىسز كۆزدىن غايىب بولدى. دەل مۇشۇ چاغدا ئالدى تەرەپتە بېكەت ئىچىنى چارلاۋاتقان پويىز ساقچىسى مەمەتنى تۇتىۋالدى.بۇ چاغدا مەمەت قولىدا ئۆزىگە تەئەللۇق بولمىغان ھېلىقى پورتمالنى مەھكەم تۇتۇۋالغانىدى.
بۇ بىر ئايالچە پورتمال بولۇپ، پورتمال پارچە-پۇرات پۇل، ئىناۋەتلىك كارتا دېگەندەكلەر لىق تولغانىدى.
-مېنىڭ پورتمالىنى ئالغان دەل مۇشۇ ئادەم ،- دېدى قىز.
مەمەت ئۆزىنى قوغلاپ كەلگەن بۇ قىزنىڭ باشقا بىرىسى ئەمەس بېلەت ئېلىش ئورنىدا ئازراق مۇڭداشقان نازىنىن ئىكەنلىكىنى بىلدى-دە،شۇئان كاللىسىغا ئۆزنىڭ پورتمالىنى ئېلىۋالغان قىزنىڭ مۇشۇ قىز بىلەن پويىز كۆتۈش ئۆيدە پاراڭلىشىپ تۇرغانلىقى كەلدى.
مەمەت ساقىچغا نېمە دېيىشنى بىلەلمەي تۇرۇپ قالدى.ساقچى مەمەتنىڭ كىملىكىنى سۈرۈشتە قىلدى،ئەپسۇس ئۇنىڭدا كىملىكمۇ يوق ئىدى. مەمەت ساقچىلارغا قايتا-قايتا كىملىكى سېلىنغان پورتمالىنى بىر قىزنىڭ ئوغرىلىۋالغانلىقىنى دېگەن بولسىمۇ ساقچىلار ئۇنىڭغا ئشەنمىدى.شۇنىڭ بىلەن مەمەتنى ساقچىخانىغا ئېلىپ كەتتى.
مەمەت ‹‹ئوغرى››لىق جىنايتى بىلەن تۇرمىدە يېتىپ چىقىتى.ئۆيگە كەلگەندە بىر پارچە پوسۇلكا تاپشۇرۇۋالدى.پوسۇلكا ئىچىدە ئۆزىنىڭ يۈتكەن پورتمالى ۋە پورتمال ئىچىدىكى نەرسىلىرى تۇراتتى.

زەپەر

مەزمۇنى ياخشىكەن . مۇشۇنداق تىمىلارنى كوپلەپ يوللاپ تۇرشىڭىزغا تىلەكداشمەن

ئىلغار

ياخشى تېمىلارنى يوللاۋاتىز رەخمەت سىزگە

خۇمارى

ۋاي قانداق جاھان بولۇپ كەتتى بۇ!ھىكايىڭىزنى ئۇقۇپ بېشىمدىن بىر چىلەك سۇ قۇيغاندەك چۈچۈپ كەتتىم.ئەمدى ئاياللار قىلمىغان مۇشۇ ئىش قاپتىمۇ نىمە؟ئۇلۇغ اللاھ ھەربىر بەندىسىنىڭ كۆڭلىگە ئىنساپ بەرسەن!