ماتېماتىكا ئومۇمىي تەكرار جەريانىدا ھېس قىلغانلىرىم

سەمى

  

ماتېماتىكا ئومۇمىي تەكرارىنى ئېلىپ بېرىش جەريانىدا ھېس قىلغانلىرىم

ماتېماتىكا دەرسى لوگېكىلىقى كۈچلۈك، ئابىستىراكىتلىقى يۇقۇرى، چېتىشلىق دائىرىسى ۋە مەزمۇن دائىرىسى كەڭ بولغان پەن بولۇپ، ئالىي مەكتەپ ئىمتىھانىدا ئوقۇغۇچىلارنىڭ كۆڭۈلدىكىدەك نەتىجىگە ئېرىشىش-ئېرىشەلمەسلىكى ئومۇمىي تەكرارنىڭ قانداق بولۇشى بىلەن زىچ مۇناسىۋەتلىك. شۇڭا، مەن تۆۋەندە ماتېماتىكا تەكرارى جەريانىدا ھېس قىلغانلىرىمنى ئوقۇرمەنلەر بىلەن ئورتاقلاشماقچىمەن.
1-تەكرار باشلىنىشتىن ئىلگىرى ئوقۇتقۇچىنىڭ كۆڭلىدە سان بولۇشى، ئومۇمىي تەكرارنىڭ قەدەم باسقۇچلىرى ۋە  Y لاھىيەسى ئۈستىدە ئويلىنىشى ھەمدە ئوقۇغۇچىلارنىڭ ئەمەلىي ئەھۋالىغا ئاساسەن تەكرار پىلانىنى پۇختا، سېستىمىلىق تۈزۈپ چىقىشى لازىم. پىلانغا ئاساسەن تەكرار قىلىش جەريانىدا ئوقۇغۇچىلارنىڭ ئەھۋالىغا ئاساسەن پىلاننى جانلىق قوللۇنۇش، ئۆزگەرتىشكە تېگىشلىك بولغاندا ئۆزگەرتىش لازىم. پىلان جانسىز، ئۆلۈك بولۇپ قالماسلىقى، سۈرئەت قوغلاشماسلىق لازىم.
2-ئىمتىھان سوئال تەتقىقاتى ۋە تەھلىلگە ئەھمىيەت بېرىش كېرەك.
ئالدىنقى يىللاردىكى ئالىي مەكتەپ ئىمتىھان سوئاللىرىنى تەتقىق قىلىش، قىزىق نۇقتىلار قايسى؟ ئارىلاپ چىقىۋاتقان بىلىم نۇقتىلىرى قايسى؟ قايسى بىلىم نۇقتىلىرىدىن قايسى خىل تۈردىكى سوئاللار چىقىرىلىۋاتىدۇ؟ سوئال يۈزلىنىشى قانداق بولىۋاتىدۇ؟............ قاتارلىقلارنى چوقۇم ئايدىڭلاشتۇرىۋېلىش ھەمدە شۇ ئاساستا مۇۋاپىق مەسىلە، مىساللارنى تاللاپ تەكرار قىلىش ھەمدە ئوقۇغۇچىلارنى تەكرارغا يېتەكلەش لازىم.
سوئال تەتقىقاتىدا ئېرىشىلگەن ئۇچۇرلارغا ئاساسەن تەكرار دائىرىسىنى مۇۋاپىق كىچىكلىتىش، ئىمتىھان نۇقتىلىرىنى تەكرار قىلىش، ئىمتىھان نۇقتىسى بولمىغان مەزمۇنلارنى تەكرار قىلماسلىق، بۇ ئارقىلىق ۋاقىت ۋە ئۈنۈمنى قولغا كەلتۈرۈش لازىم.
3-مۇۋاپىق بولغان تەكرار ماتېرىياللىرىنى تاللاش، تاللانغان تەكرار ماتېرىيالىدا ئاساسىي بىلىممۇ بولغان، تىپىك مىسال، مەشىقلەرمۇ بولغان، ئالىي مەكتەپ ئىمتىھان يۈزلىنىشىگە ماس بولغان ھەم ئاساسىي بىلىمنى تەكرار قىلىش ھەم ئوقۇغۇچىلارنىڭ ئىقتىدار، ماھارىتىنى ئۆستۈرەلەيدىغان ماتېرىياللارنى ئاساس قىلىپ تاللاش ھەم ئوقۇغۇچىلارنى تەمىنلەش كېرەك. ئەگەر ۋاقىت يېتىشمىسە شۇ ماتېرىيالنى تولۇق تەكرار قىلىش، ۋاقىت يېتىشمىسە تەكرار قىلمىسىمۇ بولىدۇ.
ئەگەر مۇۋاپىق ماتېرىيال بولمىسا ئوقۇتقۇچى تەكرار ماتېرىيالىنى ئۆزى تەييارلىشى لازىم.
4-تەكرار قىلغاندا تۆۋەندىكى باسقۇچلار بويىچە تەكرار قىلىش.  ① ئاساسىي بىلىمنى تەكرار قىلىش.  ② ئالاھىدە نۇقتىلارنى تەكرار قىلىش.  ③ ئۇنىۋېرسال مەسىلىلەرنى تەكرار قىلىش.   ④ تەقلىدى سوئاللارنى تەكرار قىلىش.
ئاساسىي بىلىمنى تەكرار قىلىش – دەرسلىك سېستىمىسى بويىچە بارلىق مەزمۇنلارنى دەرس ئۆتكەندەك بىرمۇ-بىر سۆزلەپ بېرىش بولماستىن، مۇناسىۋەتلىك بىلىملەرنى مەركەزلەشتۈرۈپ، ئۆزئارا كىرىشتۈرۈپ تەكرار قىلىش كېرەك. ئاساسىي بىلىم بىلەن مەشىقلەندۈرۈشنى بىرلەشتۈرۈشى لازىم.
ئالاھىدە نۇقتىلارنى تەكرار قىلغاندا ئالاھىدە نۇقتىلارنى سۆزلەش بىلەن بىرگە مۇۋاپىق مەشىقلەندۈرۈشنى بىرگە ئېلىپ بېرىش كېرەك.
ئۇنىۋېرسال مەسىلىلەر تەكرارى بىلەن تەقلىدى سوئاللار تەكرارىدا مەشىقلەندۈرۈشنى ئاساس قىلىش، ئوقۇغۇچىلارنى ئۆزلىرى قول سېلىپ ئىشلەشكە يېتەكلەپ، ئۇلارنىڭ ئىقتىدار ۋە ماھارىتىنى ئۆستۈرۈش كېرەك.
مېنىڭچە، بىرىنچى مەۋسۇمدا ئاساسىي بىلىم تەكرارى، ئالاھىدە نۇقتىلار تەكرارى، ئۇنىۋېرسال مەسىلىلەر تەكرار ئېلىپ بېرىلسا، ئىككىنچى مەۋسۇمدا تەقلىدى ئىمتىھان سوئاللىرى ئىشلەنسە مۇۋاپىق بولىدۇ.
5-تەكراردا 4نى سۆزلەش يەنى ئاساسىي بىلىمنى سۆزلەش، قانۇنىيەتنى سۆزلەش، قائىدە-ئۇسۇلنى سۆزلەش، قانۇنىيەتنى سۆزلەش، قائىدە-ئۇسۇلنى سۆزلەش، تەپەككۇر يولىنى سۆزلەش لازىم.
ماتېماتىكا تەكرارى جەريانىدا ئىشلەنگەن ھەربىر مىسالدىكى ئاساسلانغان ئاساسىي بىلىم، مەسىلىنىڭ ئالاھىدىلىكىگە ئاساسەن قوللۇنۇلغان ئۇسۇل ۋە تەپەككۇر يولىنى ئېنىق ئېيتىپ بېرىش، بېرىلگەنلىرىدىن «يىپ ئۇچى» ئىزلەش، قائىدە-قانۇنىيەتلەرنى بايقاش قاتارلىق ئۇسۇللارنى ئىگەللىتىشىمىز زۆرۈر.
6-ئوقۇغۇچىلارنىڭ ئەمەلىي ئەھۋالىغا ئاساسەن تولۇقلاشقا تېگىشلىك مەزمۇنلارنى، بىلىم نۇقتىلىرىنى تولۇقلاش كېرەك.
دەرسلىك كىتاپتا سۆزلەنمىگەن مەسىلىلەرنى يېشىشتە ئاسانلىق يارىتىدىغان بەزىبىر ئۇسۇل، فورمىلىلارنى چوقۇم ئوقۇغۇچىلارغا ئېيتىپ بېرىش ھەمدە مۇۋاپىق مەشىقلەندۈرۈش لازىم. ئوقۇغۇچىلار قىينىلىۋاتقان بىلىم نۇقتىلىرىدا تولۇقلاش ئېلىپ بېرىش ھەمدە مەشىقلەندۈرۈشنى كۈچەيتىش كېرەك.
7-تەكرار جەريانىدا ئۇششاق، كىچىك چۈشەنچىلەرگە سەل قارىماسلىقىمىز، نەزەردىن ساقىت قىلماسلىقىمىز لازىم. دەرسلىكتىكى مۇھىم مەزمۇنلار چوقۇم ئىمتىھاننىڭ مۇھىم نۇقتىسى بولۇشى ناتايىن. سوبىكتىپ سوئاللاردا بىز دىققەت قىلمىغان، كىچىك ئۇششاق چۈشەنچىلەردىن سوئاللار كۆرۈلۈشى مۇمكىن. شۇڭا تەكراردا كىچىك چۈشەنچىلەرگە ئېتىۋار بېرىش كېرەك.
8-ھەرخىل ئىمتىھانلارنى، سىناقلارنى كۆپرەك ئېلىش ئارقىلىق ئوقۇغۇچىلارنىڭ تاقابىل تۇرۇش ئىقتىدارىنى ئۆستۈرۈش بىلەن بىرگە ئىمتىھاندىن كېيىنكى تەھلىلنى ياخشى ئېلىپ بېرىپ، ئوقۇغۇچىلارنىڭ كەتكۈزۈپ قويغان مەزمۇن ۋە شۇ تۈردىكى مەسىلىلەرنى ئىمتىھاندىن كېيىن تولۇقلاش، مەشىق سالمىقىنى ئاشۇرۇش ئارقىلىق شۇ بىلىم نۇقتىلىرىنى تولۇقلىۋېلىشقا يېتەكچىلىك قىلىش لازىم.
تەكرار جەريانىدا ئوقۇغۇچىلارنىڭ ئىقتىدارىنى، قابىلىيىتىنى يېتىلدۈرۈشكە، تەپەككۇر ئىقتىدارىنى ئۆستۈرۈشكە، ماتېماتىكىلىق ئىدىيە ۋە ئۇسۇللارنى سىڭدۈرۈشكە ئەھمىيەت بېرىش بىلەن بىرگە بىۋاستە سەزگۈ ۋە ئىجادى تەپەككۇرنى يېتىلدۈرۈشكىمۇ ئەھمىيەت بېرىش لازىم.
ئومۇمەن، تەكراردا ئاساسنى چىڭ تۇتۇش، ئاساسنى پۇختا سېلىش، مۇھىم نۇقتىلارنى چىڭ تۇتۇش، ئىمتىھان نۇقتىلىرىنى تەكرار قىلىش، ئىقتىدار ۋە ماھارەت يېتىلدۈرۈشنى ئاساس قىلىش كېرەك.

2013-2-19
پىرىسلانغان ھۆججەتنى كۆرمەكچى ھەم پايدىلانماقچى بولسىڭىز بۇ يەردىن چۈشۈرۈڭ ماتېماتىكا ئومۇمىي تەكرارىنى ئېلىپ بېرىش جەريانىدا ھېس قىلغانلىرىم (2).doc                                               
                           

زەپەر

چۈشۈرۈش ئادىرسى كۈرۈنمەيدۇ . خاپا بولماي قايتا تەھىرلەپ قويسىڭىز .
ئىمكان بار  ماقالە ئەسەرلەرنى . ھودتا يېزىپ بۇلۇپ ياسولاپ ،  ياكى زىپ ھالىتىگە كەلتۈرۈپ يوللىسىڭىز . باشقىلارنىڭ پايدىلىنىشىغا ئۇڭاي بۇلىشىنى نەزەردە تۇتۇپ  ھە. ئىجادىي تىمىللىرىڭىز ئۈزۈلمىگەي   .رەخمەت سىزگە

سىرداش

چۈشۈرۈش ئادىرسى كۈرۈنمەيدۇ  تەھرىرلەپ قۇيۇڭ.

گۈلزار

ياخشىمۇسىز سەمى ئەپەندى ؟
ئوقۇتقۇچى- ئوقۇغۇچىلارغا نىسبەتەن ئېلىپ ئېيتقاندا ماتىماتىكا ئوقۇتۇشى ناھايىتى قىيىن بولغان بىر پەن بولۇپ قالدى . سىزنىڭ بۇ  تېمىڭىز ئوقۇتقۇچى- ئوقۇغۇچىلارنىڭ ئاشۇ قىيىن مەسىلىلەرنى بىر تەرەپ قىلىشىدا ھەل قىلغۇچ رول ئوينىغۇدەك رەھمەت سىزگە .
  تېمىلىرىڭىزنىڭ ئۈزۈلۈپ قالماسلىقىىنى  ئۈمۈد قىلىمەن رەھمەت.