برازىلىيە پۇقرالىرىنىڭ برازىلىيە ھۆكۈمىتىنىڭ دۇنيا لوڭقىسىنى تالىشىش پۇتبول مۇسابىقىسىنى تەشكىللىشىگە قارىتا نارازىلىق ھەرىكەتلىرىنىڭ ئايىغى ئۈزۈلمەيۋاتقان بولۇپ، بۇنىڭدىن بۇرۇن خاككېرلار ئەترىتى ئۆزلىرىنىڭ برازىلىيىدىكى پۇتبول مۇسابىقىسى مەزگىلىدە، دۇنيا لوڭقىسىنى تالىشىش پۇتبول مۇسابىقىسى تەرەپنىڭ تور بېتىگە ھۇجۇم قىلىدىغانلىقىنى ئېلان قىلدى. مۇشۇ جۈمە كۈنى خاككېرلار ھەقىقەتەن ‹دېگىنىنى قىلغان› بولۇپ، ئۇلار برازىلىيە دۇنيا لوڭقىسىنى تالىشىش پۇتبول مۇسابىقىسىنىڭ ھۆكۈمەت تەرەپ تور بېتىگە ھۇجۇم قىلىپ، بۇ تور بەتنى پالەچ ھالغا چۈشۈرۈپ قويدى. مۇشۇ جۈمە كۈنى برازىلىيە دۇنيا لوڭقىسىنى تالىشىش پۇتبول مۇسابىقىسىنىڭ ھۆكۈمەت تەرەپ تور بېتى نەچچە سائەت ئېچىلماي پالەچ ھالەتكە چۈشۈپ قالغان بولۇپ، بۇنىڭدىن خاككېرلارنىڭ ھەقىقەتەن ‹دېگىنىگە ئەمەل قىلىپ› ھەقىقىي ھۇجۇم قوزغىغانلىقىنى بىلىۋالغىلى بولىدىكەن.
خەۋەر قىلىنىشىچە، بۇ قېتىملىق خاككېرلىق ھۇجۇمىنى بولسا نامى‹ Anonymous برازىلىيە › بولغان خاككېرلىق تەشكىلاتى ئېلىپ بارغان بولۇپ، بۇ تەشكىلات ئەزالىرى پۈتۈن يەر شارىنىڭ ھەممە يېرىگە تارقالغان Anonymous ناملىق خاككېرلىق تەشكىلاتىنىڭ بىر تارمىقى ئىكەن.
يۇقارقى خاككېرلىق تەشكىلاتى ئىلگىرى ئۆزلىرىنىڭ برازىلىيە دۇنيا لوڭقىسىنى تالىشىش پۇتبول مۇسابىقىسى مەزگىلىدە، ‹دۇنيا لوڭقىسىغا ھۇجۇم قىلىش پىلانى› ناملىق ھۇجۇم قىلىش ھەرىكىتىنى قانات يايدۇرۇش ئارقىلىق، برازىلىيىدىكى نامراتلىق مەسىلىسى، چىرىكلىك شۇنداقلا ساقچىلارنىڭ زوراۋانلىقى قاتارلىق ئىجتىمائىي مەسلىلەرگە قارىتا ئېتىراز بىلدۈرىدىغانلىقىنى ئېيتتى.