شىنجاڭنىڭ ئولىمپىك پىدائىيلىرى بېيجىڭ سەپىرىگە ئاتلاندى

28–ئىيۇل چۈشتىن بۇرۇن ، شىنجاڭ ئۇيغۇر ئاپتونوم رايونلۇق ئىتتىپاق كومىتېتى بىلەن ئاپتونوم رايونلۇق پىدائىيلار جەمئىيتى ، ئۈرۈمچى شەھىرى خەلق مەيدانىدا داغدۇغىلىق مۇراسىم ئۆتكۈزۈپ ، 2008 – يىللىق بېيجىڭ ئو ت م ۋە مېيىپلار ئو ت م غا بارىدىغان شىنجاڭ پىدائىيلىرىنى ئۇزىتىپ قويدى .

      شىنجاڭدىن يۈز نەپەر پىدائىي بېيجىڭغا بارىدىغان بولۇپ ، بۇ پىدائىيلار پۈتۈن ئاپتونوم رايون بويىچە تىزىملاتقان 3600 نەپەر پىدائىي ئىچىدىن تاللاپ چىقىلغان ئىكەن . يېقىندا ، 80 كىشلىك ئاۋانگارتلار قىسمى بېيجىڭغا ئالدىن بېرىپ ئولىمپىك ئۈچۈن مۇلازىمەت قىلىدىكەن . قالغان  20 كىشى سىنتەبىر ئېيىدا يولغا چىقىپ ، مېيىپلار ئو ت م غا مۇلازىمەت قىلىدىكەن .

       يۈز پىدائىينىڭ 44 نەپىرى ئەر ، 56 نەپىرى ئايال بولۇپ ، ئۇلار ئۇيغۇر ، قازاق ، خۈيزۇ ، قىرغىز ، داغور ، روس ، ئۆزبېك ، شىبە قاتارلىق مىللەتلەردىن تەركىب تاپقان ، پىدائىيلار ئىچىدە ئالىي مەكتەپ تولۇق كۇرس مەلۇماتىغا ئىگە پىدائىيدىن 89 ى بار ، بىر قىسم پىدائىيلار ئىنگلىز تىلى ، روس تىلى ، ئىسپان تىلى ، ئەرەب تىلى ، ئۆزبېك تىلى قاتارلىق تىللارنى بىلىدىكەن .

     ئىگىلىنىشىچە ، ئاپتونوم رايونلۇق ئىتتىپاق كومىتېتى پىدائىيلارغا قارىتا ئۈچ ئايلىق تەربىيلەش ئېلىپ بارغان ، پىدائىيلارغا ئىنگلىز تىلىدىن كۈچەيتىش ، ئاممىۋى قائىدە – يوسۇن ، مۇقىملىقنى قوغداش ، شىنجاڭنىڭ رايون ئەھۋالى قاتارلىقلارنى مەزمۇن قىلغان تەربىيلەش ئېلىپ بارغان ھەمدە بېيجىڭ پەن – تېخنىكا ئونىۋېرسىتېتىدىن ئولىمپىك مەيدان ئىجرا كوللېكتىپىنى تەكلىپ قىلىپ ، پىدائىيلارغا ئۈچ كۈنلۈك مەركەزلەشتۈرۈپ تەربىيىلەش ئېلىپ بارغان . بۇ پىدائىيلار بېيجىڭغا بارغاندىن كېيىنمۇ ، ئولىمپىك ئىش ئورنىغا چىقىشتىن بۇرۇنقى تەربىيىلەشكە قاتنىشىدىكەن .