ئىزھارسىز سۆيگۈ
ئاشىقنىڭ چۈشىدە سېغىنىش ئوتى،
نەملەنگەن ياستۇقتا ئازاپنىڭ يۇقى.
كۆزلەردىن ئاققىدۇ سۆيۈملۈك ھىجران،
تەككەچكە يۈرەككە مۇھەببەت ئوقى.
سېنىڭسىز كۈنلىرىم رەڭسىز،قۇياشسىز،
كىچىكتى باھارمۇ قالغاندەك يارسىز.
يېشىللىق سەن بىلەن كېتىپ قالغاندەك،
قۇرىغان ياپراق بوپ قالدىم پاناھسىز.
قوزغايدۇ ھەسرەتنى يالغۇز- تەنھالىق،
ۋىسالغا تەلپۈنەر ئاچچىق-تەشنالىق.
ئىزھارسىز سۆيگۈمنى يۈردۈم ھاپاشلاپ،
ئېيتىلغان ناخشىلار مۇڭلۇق-نىدالىق.
سەۋىرگە تۇيۇنغان بىر گۈزەل ئىستەك،
تاقەتنىڭ ۋەخپىگە سولانغان روھتەك.
يۇشۇرۇن كۆيۈشنىڭ ساھىللىرىدا ،
ئۇنلەيدۇ ئاھلىرىم يىگانە قۇشتەك.
