يەرلىك تاراتقۇلارنىڭ خەۋەر قىلىشىچە، ئېفىئوپىيە پايتەختى ئەددىس-ئەبېبە شەھىرى ئەتراپىدىكى بىشوفتۇ بازىرىدا 2-ئۆكتەبىر ساقچىلار بىلەن ئامما توقۇنۇشۇپ قېلىپ دەسسىلىش ۋەقەسى يۈز بەرگەن، كۆرگۈچىلەرنىڭ ئېيتىشىچە كۆپ ئادەم دەسسىلىش ۋەقەسىدە قازا قىلغان.
خەۋەردە ئېيتىلىشىچە، ۋەقە يۈز بەرگەندە نەچچە مىڭ نەپەر ئورومىيالىق بىشوفتۇ بازىرىدىكى بىر كۆل بويىدا دىنىي مۇراسىم ئۆتكۈزۈۋاتقان بولۇپ، يامغۇر پەسلىنىڭ ئاخىرلاشقانلىقىنى خاتىرىلەۋاتقان ئىكەن. پائالىيەت ئاياغلاشقاندا مەيداندا تۇيۇقسىز مالىمانچىلىق يۈز بېرىپ، ساقچىلار كىشىلەر توپىغا ياش ئاققۇزۇش بومبىسى ئاتقان، قورقۇپ كەتكەن كىشىلەر قېچىش جەريانىدا دەسسىلىش ۋەقەسى يۈز بەرگەن.
تاراتقۇلارنىڭ ئېيتىشىچە، ئاز دېگەندە 50 ئادەم ۋەقەدە قازا قىلغان. مۇخبىر خەۋەرنى ئەۋەتكەندە ئېفىئوپىيە ھۆكۈمىتى تېخى كونكرېت ئۆلۈش-يارىلىنىش ئەھۋالىنى ئېلان قىلمىغان ئىدى.
