[▓] ئۆتمۈش كەلگۈسىنىڭ ئانىسى [▓]
                 
※ ※ ※ ※ ※ ※ ※ ※ ※ ※ ※ ※ ※ ※ ※ ※

[▓▓] ئۆتمۈش توغۇرسىدا خىياللىرىم ئۈزۈندىلىرى [▓▓]

〔 مەنسۈر مۇھەممەت 〕
               
   ※ ※ ※ ※ ※ ※ ※ ※ ※ ※ ※ ※ ※ ※ ※ ※

ئۆتمۈش ــــــــــ  ئۇ چۈش !
       ئۆتمۈش ــــــــــــــ ئۇ تارىخ !
               ئۆتمۈش  ـــــــــــــــ  ئۇ ئىبرەت !
                        ئۆتمۈش ـــــــــــــــــ ئۇ ئۆرنەك  !
                   
※ ※ ※ ※ ※ ※ ※ ※ ※ ※ ※ ※ ※ ※ ※ ※

. ئۆتمۈشىڭدىكى خوشال ۋە غەمكىن كۈنلىرىڭ ساڭا مەڭگۈلۈك شېرىن ۋە تاتلىق ئەسلىمە . بەزى بىر يالغۇزلۇقتىن زېرىككەن، غەمكىنلىكتىن چۈشكۈنلەشكەن ، دەرت-ئەلەمدىن قايغۇرغان كۈنلىرىڭدە ،  بۇرۇن ئۆز بىشىڭدىن ئۆتكۈزگەن خوشال كۈنلىرىڭنى ، قىلغان ساياھەتلىرىڭنى ،  كىرگەن باغچىلارنى ،  قىزىقارلىق پاراڭلارنى ، قىسقىسى كۈلۈپ يۈرگەن سەبىي ۋە خوشال چاغلىرىڭنى ئەسلە ،  كۆزۈڭنى يۈمۈپ تۇرۇپ يۈرۈكىڭدىن ئەسلە ، ۋاھ-ۋاھ … ئۆتمۈشتىن ھۇزۇرلىنىش دېگەن  ئەنە  شۇ  …
                 
   ※ ※ ※ ※ ※ ※ ※ ※ ※ ※ ※ ※ ※ ※ ※ ※

. يەنەبەزى بىر بىشىڭغا قونغان ئامەت  ، غايىپتىن كەلگەن شاتلىق ، ئاسان تاپقان بايلىق ، ئولتۇرغان داچا ئۆي ۋە ئېسىل ماشىنىلىق ۋاقىتلاردا ، ئۆتمۈشىڭدىكى ئۆتكۈزگەن غەمكىن ۋە غېرىپ چاغلىرىڭنىمۇ ئۇنۇتماسلىق كېرەك ئەلۋەتتە .
                 
      ※ ※ ※ ※ ※ ※ ※ ※ ※ ※ ※ ※ ※ ※ ※ ※

• ئىنسان ئۆز كەچۈرمۈشلىرىدىكى كۆرگەن ،ئاڭلىغان ،بارغان ،تۇرغانلىرىدىن تارتىپ ئەتكەنلىرىگىچە ، قىسقىسى ئۆتكەن ھەربىر ئىش-ھەركەتلىرىدىن ئۈلگە ئېلىپ ، كىيىنكى كۈنلىرىدە ئۇچىرىغان مەسىلىلىرى بىلەن ئۆز-ئارا بىرلەشتۈرۈپ ئىش كۆرۈشنى ،  ئۆزىنىڭ خاس ئادىتىگە شۇنداقلا خارەكتىرىگە ئايلاندۇرۋىلىشى كېرەك . ئەنە شۇ چاغدا كەلگۈسى ھاياتىدىكى يىڭى يولۇققان ھەرقانداق بىر ئىشقا نورمال كۆزدە قارىيالايدىغان بولۇپلا قالماي ، كۆڭلى قەسىرىنىڭ قانچىلىك يورۇپ كىتىدىغانلىقىنى ، ئۆزىنىڭ قانچىلىك سەمىمىي ۋە كەمتەر، شۇنداقلا شۈكرى-قانائەتچان ۋە چوڭقۇر مېھىر-مۇھەببەتكە تولغان قەلىب ئىگىسىگە ئايلانغانلىقىنى ھېس قىلىۋالالايدۇ .
                 
   ※ ※ ※ ※ ※ ※ ※ ※ ※ ※ ※ ※ ※ ※ ※ ※

• ئۆتمۈشى بولمىغان كەلگۈسى ئەزەلدىن مەۋجۈت ئەمەس .
                 
※ ※ ※ ※ ※ ※ ※ ※ ※ ※ ※ ※ ※ ※ ※ ※

• ئۆتمۈشىدىكى مۇددىھىش ۋە غەپلەتلىك  كەچۈرمىشلىرىدىن ئۆكۈنۈپ نالە قىلىشنىڭ ، يىغلاپ-قاقشاشنىڭ ، قايغۇرۇپ بوشاپ كېتىشنىڭ ، قىسقىسى ئۆزىنى تاشلىۋىتىشنىڭ ،  ئىنساندىكى ئەڭ چوڭ ئاجىزلىق ئىكەنلىكىنى تونۇپ يىتىشمۇ ئىنتايىن مۇھىمدۇر .
             
    ※ ※ ※ ※ ※ ※ ※ ※ ※ ※ ※ ※ ※ ※ ※ ※

• ئۆتمۈش ئۇ كەتتى ، ئەمدى كەلمەيدۇ .ئۇ سېنى مەيلى خوش قىلغان ۋە ياكى دەرت- ئەلەمگە تاشلىغان بولسۇن ، ئۇ ھامان كەتتى .خوش قىلغان بولسا ، كۈلدۈرۈپ كەتتى  .خاپا قىلغان بولسا ، ئۈگۈتۈپ كەتتى . مەيلى قانداقلا بولمىسۇن كۆرمىگەننى كۆرسىتىپ ، بىلمىگەننى بىلدۈرۈپ كەتتى .شۇڭلاشقا ھەممىدىن ئاۋۋال بۈگۈنىمىزگە ، ھازىرىمىزغا ، ھەربىر مىنۇتتىكى تىنىق-نەپەسلىرىمىزگە چەكسىز شۈكرى قىلىشىمىز ، ھەرۋاقىت ھەقتىن ھېدايەت تېلەپ ، كۆزىمىزنى يوغان ئېچىپ ،ئالدىمىزدىكى مەنزىلگە  ، ئۆز كەلگۈسىمىزگە ئىشەنچكە تولغان قەلبىمىز ۋە ئوتلۇق يۈرىكىمىز بىلەن يۈزلىنىشىمىز ئىنتايىن زۆرۈر.
                 
※ ※ ※ ※ ※ ※ ※ ※ ※ ※ ※ ※ ※ ※ ※ ※

• تۆنۈگۈنكى كۆرگىنىڭدىن ئۈلگە ئېلىپ  ، ئەتەڭ ئۈچۈن كۆۋرۈك ياساپ باق .
• تۆنۈگۈنكى دەرتلىرىڭدىن ئىبرەت ئېلىپ ، ئەتەڭ ئۈچۈن ئىشەنچ بىلەن كۈلۈپ باق .
• تۆنۈگۈنكى ئامىتىڭدىن كېرىلىپ كەتمەي ، ئەتەڭ ئۈچۈن توسما سىلىپ باق .
• تۆنۈگۈنكى يىقىلغىنىڭدىن ئۆرنەك ئېلىپ  ، ئەتەڭ ئۈچۈن ئالدىغا داۋاملىق ئۆمىلەپ باق .
• قىسقىسى ئۆزۈڭنىڭ ئۇلىنى مۇستەھكەم قىلاي دېسەڭ ، تۆنۈگۈنكى بىلگىنىڭنى بۈگۈن كۆرگىنىڭگە بىرلەشتۈرۈپ، ئەتەڭ ئۈچۈن كۈرەش قىلىپ باق .

2015 - يىلى 9- ئاينىڭ 22-كۈنى
                 
 ※ ※ ※ ※ ※ ※ ※ ※ ※ ※ ※ ※ ※ ※ ※ ※