تەشۋىقات سەپىرىمدىكى  ھېس-تۇيغۇلىرىم

（مەنسۈرمۇھەممەت）

 كونىلار …
< كۆرگەندىن كۆپتۇر كۆرمىگىنىڭ >
< كۆرمىگەننى كۆرىسەن ئۆلمىگىنىڭ >

دەپ ، ھەجەب توغرا دەپتىكەن .
※ ※ ※ ※ ※ ※ ※ ※ ※ ※ ※ ※ ※ ※ ※ ※
ياقا-يۇرتقا قاراپ ماڭدىم
ئېچىش ئۈچۈن مەھسۇلاتىم بازىرىنى ،
يول-يولىدا يالغۇز ياتتىم
سىناش ئۈچۈن جاسارىتىم  تاقىتىنى .
※ ※ ※ ※ ※ ※ ※ ※ ※ ※ ※ ※ ※ ※ ※ ※
   يول ……
كوچا ……
بازار …
مەھەللە ……
قاتارلىق تەبىئەتتىكى بارچە ھەقىقەتنى  كۆرۈپ تۇرغان كۆزلىرىم  ، ھەربىر مەنزىلگە شۇنچە ئىنچىكە قاراپ تۇرۇپمۇ ھېچنىمىنى كۆرەلمىدى  .
※ ※ ※ ※ ※ ※ ※ ※ ※ ※ ※ ※ ※ ※ ※ ※
تۇنجى قېتىملىق كارخانا تەشۋىقاتلىرى بىلەن ياقا يۇرتلاردا قىلغان يېرىم ئايدەك خىزمىتىم ،  بۇرۇن ھېس قىلمىغان ھەتتا ئەزەلدىن ئويلاپمۇ باقمىغان  تۇيغۇنى ھېس قىلدۇردى شۇنداقلا كاللامنىمۇ قانداقتۇر تۈگىمەس خىيال ۋە جاۋابسىز سۇئاللار بىلەن لىق تولدۇردى .

  شۇنچىلىك ئاددىي قارىغان ، ئادەتتە بەك كۆزگە ئېلىپ كەتمەيدىغان بەزى بىر ئىشلارنىڭمۇ ، خىلى زور دەرىجىدە سەل چاغلىغۇسىز يۇشۇرۇن تەسىر كۈچى بارلىقىنى ھېس قىلدۇردى ھەمدە ھېچقانداق بىر ئىشقا ، بىپەرۋا مۇئامىلىدە سەل چاغلىماس كېرەكلىكىنى تونۇتتى ۋە بىلدۈردى .

《 بازار ئېچىش 》
دېگەن گەپنى نىمە گەپكىن دەپتىكەنمەن  …
ئۇ گەپ مىنىڭ چۈشىنىشىمچە ：
خۇددىي
《 ئەسسالامۇ - ئەلەيكۇم 》دىگەندەك ،
ئاۋۋال يۈزلەن  …
كۆڭلۈڭنى ئىپادىلە   …
ئەلا مۇلازىمەت قىل ……
تېرىشىپ ئۆگەن ……
جەمىيەتتىن بىلىم ئال ……
ھاردىم- تالدىم دېمە ……دېگەندەك ،
يەرلىك تىلدىكى
《 ئۈچەكتىن چىقىش 》ۋە《  كۆزنى يوغان ئېچىپ  جاھانغا بېقىش 》دېگەن گەپ ئىكەن دەپ ئويلىدىم ، ھەم شۇنىڭغا ئوخشاتتىم .

بۇ خىزمەت  باشقا يۇرتلاردا مۇساپىرمۇ قىلدىكەن ، تونۇشمايدىغانلار بىلەن  تونۇشمۇ قىلىدىكەن ، سودا - تىجارەت ،  جەمئىيەت ۋە يارقىن سىياسەتلەردىنمۇ خەۋەردار قىلىدىكەن .  
※ ※ ※ ※ ※ ※ ※ ※ ※ ※ ※ ※ ※ ※ ※ ※  
   كىچىككىنە كارخانىنىڭ تىجارىتىنى راۋاجلاندۇرۇش ئۈچۈن ، دىيارىمىزنىڭ ھەرقايسى شەھەر-ناھىيىلىرىدىكى چوڭ-كىچىك سودىگەر قىرىنداشلار بىلەن يۈز كۆرۈشۈش كېرەك بولغاچقا ،  بەزىدە تەشۋىقات ۋە ھەمكارلىق سۆھپىتى جەريانىدا ئويلىمىغان ئىشلار ياكى بەزى غەلىتە  پاراڭلار بوپ قالىدىكەن  .
※ ※ ※ ※ ※ ※ ※ ※ ※ ※ ※ ※ ※ ※ ※ ※
مەلۇم ناھىيەدىكى نوپۇزلۇق بىر كارخانىچى بىلەن پاراڭلىشىپ قالدىم . ئۇ كىشى مىنىڭ بەرگەن ھەمكارلىق مەسلىھەتىمنى ۋە تەشۋىقاتىمنى دىققەت بىلەن ئاڭلىغاندىن كېيىن  ئوتتۇرغا قويغان بىرىنچى سۇئالى مىنى گاڭگىرىتىپ قويدى .

-  يۈرۈكۈڭ بارمۇ  ؟
- ئەلۋەتتە  بار .
- قانچىلىك بار ؟
ئۇجۇقۇپ كەتتىم . قانداق سۇئال بۇ ؟ مانداقمۇ سۇئال بولىدىكەن دېسە ؟
بۇنىڭغا نىمە دىسەم بولار ئەمدى ؟؟؟

كۆپ ئويلاشمايلا ئاغزىمغا نىمە كەلسە
شۇنى جۆيلۈشكە باشلىدىم .
- قانچىلىكلىكىنى ئۆزەممۇ ئىنىق
بىلمەيدىكەنمەن ، پەرىزىمچە ：
نورمال چېغىمدا مۇشتۇمدەك ، قوپال چېغىمدا قوچقاردەك ، تېتىك چېغىمدا تايچاقتەك ، پۇللۇق چېغىمدا قۇياشتەك ، پۇلسىز چېغىمدا توقاشتەك ، سۇلغۇن چېغىمدا شامالدەك ، خۇشال چېغىمدا خورازدەك ، ئاچچىقلاپ قالغاندا بۇقىدە .ھەمدە ئۇرۇلۇش ، سوقۇلۇش ، يىرتىلىش ، تىتىلىش ، پۇچۇلۇشلاردىن ئۆز خاسلىقىنى يوقاتماي ، يۈكسەك ئارزۇ-ئارمانلىرى ئۈچۈن ئۈن-تىنسىز سوقۇپ تۇرغان  شۇنداق بىر يۈرەك باركى ،

ياۋۋۋۋۋ… ئەييۇھەنناس ،
بوران -چاپقۇن -جۇدۇن ،
ھەتتا تاغمۇ توسالماس ،
دوك-دوك…
دوك-دوك…
دوك-دوك…  
دوك-دوك…
قىلىپ سىكىنۇت توختىماستىن
كۆكرىكىمنى چېكىپ ،  ھەرۋاقىت ئىشەنچىم ۋە ئىرادەمنى ئويغىتىپ تۇرىدۇ . مانا بۇ مىنىڭ يۈرۈكۈم .
※ ※ ※ ※ ※ ※ ※ ※ ※ ※ ※ ※ ※ ※ ※ ※
   تەشۋىقات ئىشلىرىنى قىلىپ يۈرۈپ ، كۆپ سۆزلەپ كۈنۈپ قالدىممىكىن ، ئاددىيغىنە بىر ئېغىز سۇئالغا بەش كېلومىتىر جاۋاب بېرىۋىتىپتىمەن . شۇنداقتىمۇ چوڭقۇر مەنىلىك چۈشەندۈرۋەتكەن قىياپەتتە قاتتىق تۇرۋالدىم . ئۇ كىشى ماڭا قاراپ كۈلۈپ كەتتى ۋە
-  《 سەن بولىدىكەنسەن 》 دىدىدە ئارتۇق گەپ قىلمايلا بىزنىڭ ھەمكارلىق كېلىشىمگە قول قۇيدى ۋە  مەن تونۇشتۇرغان تۇنجى
ھەمكارلاشقۇچىمىزدىن بولۇپ قالدى .
بۇ مىنىڭ تەشۋىقاتىمدىن تۇنجى ھەمكارلىق ئورناتقان كارخانا بولغانلىقى ئۈچۈنمىكىن تاڭ ، تولىمۇ خوشال بولدۇم .
ئەتىسى ئۇ كىشى ماڭا يەنە بىر غەيرى گەپنى قىلدى .
- سەندىكى يۈرەك قالتىس يۈرەك ئىكەنتۇق ، ئەپسۇس ئۆزى ئۈچۈن خىزمەت قىلمىغان يۈرەك ، بىر پارچە سېسىق گۆش خالاس ……

2016.10.15