ئاغرىنىش-قاقشاشلاردىن توختاڭ
گۈلزىرە مەخمۇت
ئاغرىنىش-قاقشاشلاردىن بەكلا زېرىكىپ كەتتىم . بەلكىم كىشىلەرنىڭ بەخت تۇيغۇسى ئازلاپ كەتكەندۇر ، ۋەياكى تۇرمۇش بېسىمى ئېشىپ كەتكەندۇر . ئىشقىلىپ ، ھەممىمىزگە ئاسان ئەمەس ، بىراق بۇ خىل پاسسىپ پوزىتسىيە بىزنىڭ تۇرمۇشىمىزدىن يىراق بولۇشى كېرەك ئىدى ، بىراق ھازىر قاقشاشلار تۇرمۇشىمىزنىڭ ئايرىلماس بىر قىسمىغا ئايلىنىپ قالدى . ‹‹ بۇ ئۆي ئىشلىرى پەقەت تۈگىمەيدۇ ›› ، ‹ ‹خىزمىتىمىز بەك جاپالىق ، شەنبە-يەكشەنبىمىزمۇ يوق ، بەك ھاردىم › › ، ‹‹ بۇلاردىن بەك زېرىكتىم ، دائىم ئىش چىقىرىپلا تۇرغان › › ، ‹ ‹ قىلىدىغان ئىشىمىز بەك جىق ، بىر قولۇمنى ئىككى قىلىپ بولالمايۋاتىمەن ›› دېگەندەك قاقشاشلار.....نېمانداق تۈگىمەيدىغان قاقشاشلار بۇ ! بۇ خىل قاقشاشلار تۇرمۇشىڭىزنى ئۆزگەرتەلىدىمۇ ؟ بىرەر ئىشىڭىز ئازلىدىمۇ ؟ ياق ، ھەممىسى شۇ جايىدا ، تېخى تۈگىمىدى . ئەكسىچە ، كەيپىياتىڭىز تېخىمۇ ناچارلىشىپ ئىشلىرىڭىز ھەل بولمايۋاتىدۇ . شۇنداق ئەمەسمۇ ؟ لېكىن ئادەم ياخشى كەيپىيات بىلەن ئىش قىلسا ، ھەممە ئىشى ئاسانغا توختايدۇ ، ئىش ئۈنۈمى تېخىمۇ ياخشى بولىدۇ . ناچار كەيپىياتچۇ ؟ ئىشلىرىڭىزغا تەسىر يەتكۈزۈپ ، قىلغانسىرى تۈگىمەيدۇ ، قاقشاشلار تېخىمۇ كۆپىيىشكە باشلايدۇ .
تۇرمۇشتا كۆڭۈلسىز ئىشلارنىڭ يۈز بېرىشى ناھايىتى نورمال ئىش . چۈنكى تۇرمۇشنىڭ ئۆزى كۈلكە ۋە يىغىنىڭ بىرلەشمىسىدىن تەركىپ تاپقان . ھاياتىڭىز ھەرگىزمۇ توختاپ قالغان سۇغا ئوخشاش بىر خىل رېتىمدە ئۆتمەيدۇ . ھەممىمىز تۇرمۇشنىڭ ھەرخىل سىناقلىرىغا دۇچ كېلىمىز . بەزىدە خۇشاللىقتىن ئۆزىمىزنى بەختلىك ھېس قىلساق ، يەنە بەزىدە ئازاپ-ئوقۇبەتلەردىن ئۆزىمىزنى گوياكى بەختتىن بەھرىمەن بولۇش ھوقۇقىمىز يوقتەك ھېس قىلىپ ئۈمۈدسىزلىنىمىز . شۇنداق چاغلاردا يېقىنلىرىمىزدىن ئاغرىنىمىز . نېمىشقا مەن بىلەن كارى بولمايدۇ ؟ مەن شۇنداق ناچارمۇ ؟ ئەجەپ بىلىشى يوقكەن ، ئادەم نېمانداق شەخسىيەتچى ؟ دېگندەك .....بىراق ، سىز ئويلاپ باقتىڭىزمۇ ؟ بەلكىم باشقىلارمۇ سىزگە ئوخشاش ئۈمۈدسىزلىك پاتقىقىغا پېتىپ قېلىپ ، يولىنى قانداق داۋاملاشتۇرۇشنى بىلەلمەي قېلىۋاتقاندۇر.....نېمىلا دېگەن بىلەن ھەممىمىزنىڭ دەرد-ئەلىمى بار . ھەركىم شۇ غېمى بىلەن ئالدىراش . شۇڭا كونىلار‹ ‹ توخۇ داڭگال چۈشەيدۇ ، ئۆچكە جاڭگال ›› دەپ بىكار ئېيتمىغان .
باشقىلارنىڭ بەختلىك تۇرمۇشىنى كۆرۈپ ، ئۆزىڭىزنىڭ تۇرمۇشىدىن ئاغرىنماڭ . بەلكىم ئاشۇ كىشىلەرنىڭمۇ ئۆزىگە چۇشلۇق دەردى بار ، پەقەت شۇ ئىچىدە بىلىدۇ . بەزىلەر ئاغرىنىشنى ئۆزىگە كەسپىي كېسەل قىلىۋالغان بولسا كېرەك . كىمنى كۆرسە شۇنىڭغا دەرت تۆكىدۇ . باشقىلارنىڭ ئاشۇ دەرتلەرنى ئاڭلىغۇسى بارمۇ ؟ ئاڭلاشنى خالىمايدۇ ، پەقەت شۇ قائىدە يۈزىسىدىنلا ئاڭلاپ قويىدۇ خالاس . شۇڭا دىيدىغىنىم ، ئاغرىنىشلارنى قويۇپ ، ئۆزىڭىزنى كۆپرەك تەھلىل قىلىڭ ، ئۆزىڭىزگە ئۆزىڭىز ياردەم قىلىڭ . سەۋەپنى كۆپرەك ئۆزىڭىزدىن ئىزلەپ ، باشقىلاردىن ئاغرىنىشىنى توختىتىڭ . بىر ئادەم بىلەن يەنە بىر ئادەمنىڭ تۇرمۇشى ئوخشىمايدۇ . شۇڭا ، تۇرمۇشىڭىزنى ئۆزگەرتىش ئۈچۈن ئالدى بىلەن ئۆزىڭىزنىڭ پوزىتسىيەرىڭىزنى ئۆزگەرتىپ بېقىڭ . سىز ھاياتقا كۈلۈپ باقسىڭىز ، ھاياتمۇ سىزگە كۈلۈپ باقىدۇ .
مەن مۇنداق بىر ھېكايىنى ئاڭلىغان : پويىزدا مەنزىرە كۆرۈپ كېتىۋاتقان بىر كىشىنىڭ تۇيۇقسىز بىر پاي ئايىقى چۈشۇپ قاپتۇ . ئۇ كىشى دەرھاللا يەنە بىر پاي ئايىقىنى سېلىپ سىرتقا تاشلىۋېتىپتۇ . ئۇ كىشىنىڭ ئەتراپىدىكىلەر بۇنى كۆرۈپ ئەجەپلىنىپ سوراپتۇ : ‹‹-نېمىشقا يەنە بىر پاي ئايىقىڭىزنىمۇ تاشلىۋېتىسىز ؟ ئايىقىڭىز يوق ، ئەمدى قانداق قىلىسىز ؟›› ئۇ كىشىنىڭ جاۋابى ھەممەيلەننى ھەيران قالدۇرۇپتۇ :‹‹-بىر پاي ئايىقىم چۈشۈو قالغانغا كۆڭلۈم يېرىم بولدى . بىراق يەنە بىر ئايىقىمنى تاشلىۋەتسەم ، ئايىقىمنى تېرىۋالغان كىشىنىڭ بىر جۈپ ئايىقى بولمامدۇ ؟ ›› بۇ ھېكايىنى ئاڭلاپ ئاشۇ كىشىنىڭ تۇرمۇشقا بولغان ئاكتىپ ئۈمۈدۋار پوزىتسىيىسىدىن شۇنداق سۆيۈندۈم . توغرا ، ئۈمۈدۋارلىق كىشىگە ھۇزۇر ئاتا قىلىدۇ ، تۇرمۇشىڭىز تېخىمۇ كۆڭۈللۈك ئۆتىدۇ . ھېكايىدىكى كىشى گەرچە ئايىقىدىن ئايرىلىپ قالغان بولسىمۇ ، بىراق ئۇ ئاھ ئۇرۇپ كەتمىدى . چۈنكى ئۇ باشقىلارنى ئويلىدى . ئەگەر ئۇ ‹‹ ئايىقىم نېمىشقا چۈشۈپ قالىدۇ ؟ دېرىزە تۈۋىگە كەلمىگەن بولسام ئايىقىمدىن ئايرىلىپ قالمايتىم .....›› دېگەندەك سۆزلەرنى قىلمىدى . ئاشۇنداق سۆزلەرنى قىلسىمۇ ، بەرىبىر ئۇنىڭ ئايىقى ئالدىغا كېلىپ قالمايدۇ،-دە ! شۇڭا ئۇ ئاقىلانىلىق بىلەن ئۈمۈدۋار بولۇشنى تاللىغان . كۈندىلىك تۇرمۇشىمىزدا بۇنداق ئىشلار جىق يۈز بېرىپ تۇرىدۇ . لېكىن ئۆتكەن ئىشنى كىم ئۆزگەرتەلەيدۇ ؟ ئۆزگەرتىش قولىمىزدىن كەلمەيدۇ ، لېكىن ئۆتكەن ئىشقا تۇتقان پوزىتسىيىمىزنى ئۆزگەرتەلەيمىز . ئاغرىنىشلارنى كۆنۈپ قالغانلار قانداق قىلىدۇ ؟ ئاھ ئۇرۇپ ھالى قالمايدۇ . ئۇلارنىڭ تۇمۇشى ئاغرىنىشلارغا توشۇپ كەتكەن . لېكىن بىز نېمىگە موھتاج ؟ تۈگىمەيدىغان ئاغرىنىشلار بىزگە نېمە ئېلىپ كېلىدۇ ؟ ئاغرىنىش ئاغرىنىشنى كەلتۈرۈپ چىقىرىدۇ . بىز ئۈمۈدۋار ئاكتىپ ئېنىرگىيىگە موھتاج ! شۇڭلاشقا ، تۇرمۇشتا ئۈمۈدۋار بولۇڭ ! ئۆلمىگەن جاندا ئۈمۈد بار دەپتىكەن . بىرەر قىيىن ئىشلارغا دۇچ كەلگەندە نېمىشقا مەن بۇنداق تەلەيسىز دەپ قاقشىماي ، مۇشۇ مەسىلىنى قانداق ھەل قىلسام بولار ؟ دەپ كاللا ئىشلىتىڭ . سەۋەپ قىلساڭ سېۋەتتە سۇ توختايدۇ دەيدىغۇ ، چوقۇم ھەل قىلالايسىز قاقشاشنى توختاتسىڭىز ! ئۆزىڭىزگە باھانە ئىزدىمەڭ . باھانە ئاقمايدۇ ، باھانە ھېچقانداق ئىشنى ھەل قىلالمايدۇ ! شۇڭا ، ئۆزىڭىزنىڭ پاسسىپ پوزىتسىيەرىڭىزنى ئۆزگەرتىڭ ، ئەتراپىڭىزدىكى ئۈمۈدۋار كىشىلەردىن ئۈلگە ئېلىڭ .
سىزگە نىك(Nick Vujicic)尼克·武伊契奇 توغرىلىق سۆزلەپ بېرەي: نىك ئاۋىستىرالىيەنىڭ موربېن شەھىرىدە تۇغۇلغان داڭلىق نۇتۇقشۇناس . ئۇ تۇغما مېيىپ ، قولى يوق ، پۇتىمۇ يوق ، بىراق ئۇ ھاياتىدا ئاجايىپ مۆجىلەرنى ياراتتى . ئۇ ئۆزىنىڭ ھېكايىسىنى سۆزلەش ئارقىلىق باشقىلارغا ئۆزىنى ۋە دۇنيانى مېھىر-مۇھەبىبىتى بىلەن سۆيگەندىلا ، ھەرقانداق قىيىنچىلىقنى يەڭگىلى بولىدىغانلىقىنى تەكىتلىگەن . ئۇ مۇنداق دېگەن : ۋاز كېچىشنىڭ ئۆزى مەغلۇبىيەت ، ھاياتلىقنىڭ قىممىتى پۈتكۈل ۋۇجۇدى بىلەن كىرىشىش . ئۆزۈڭ بول ، ئۆزۈڭگە ئىشەن ، ئۆزۈڭنىڭ قىلالايدىغانلىقىغا ئىشەن . سەن ھەركۈنى تاللاشقا دۇچ كېلىسەن ، سەندە پەقەت ئۈمۈد تۇيغۇسى بولغاندىلا ، غەلبە ئۈچۈن كۈرەش قىلالايسەن !
ھېچقانداق ئادەم تۇيۇقسىزلا نەتىجە قازىنىپ قالمىغان . بىر ئادەمنىڭ نەتىجىسىنىڭ كەينىگە نۇرغۇنلىغان ئوڭۇشسىزلىقلار يوشۇرۇنغان . نىكنىڭ ھاياتىمۇ ھەم شۇنداق . ئۇ تۇغۇلغان ۋاقتىدا ھەتتا ئاتا-ئانىسىمۇ ئۇنى قوبۇل قىلالمىغان . ئۇ ئۆلۈۋېلىشنىمۇ ئويلىغان ، بىراق يەنىلا ئۈمۈدۋارلىق بىلەن ياشاشنى تاللىغان . ئۇ باشقىلارنىڭ ئۆزىگە قانداق قارىشىغا پەرۋا قىلمىغان . ئۇ تۇنجى قېتىملىق نۇتۇقىنى سۆزلەش ئۈچۈن باشقىلارنىڭ 52 قېتىم رەت قىلىنىشىغا ئۇچرىغان . بىراق ئۇ قەتئىي ۋاز كەچمىگەن ، تىرىشچانلىقى ئارقىلىق بەش مىنۇتلۇق نۇتۇق سۆزلەش پۇرسىتىنى قولغا كەلتۈرگەن . ئۇ نۇتۇق سۆزلەش جەريانىدا ئۆزىنىڭ باشقىلارغا ئوخشىمايدىغان كەچۈرمىشلىرىنى ناھايىتى يۇمۇرلۇق ، ئوبرازلىق قىلىپ سۆزلەپ ، باشقىلارنىڭ ئالقىشىغا ئېرىشكەن . ئۇ مۇنداق دېگەن : ئادەمنىڭ ھاياتىدا پۇت-قولىدىن ئايرىلىپ قېلىشى قورقۇنچلۇق ئەمەس ، بەلكى غايە ۋە ئۈمۈدنىڭ بولماسلىقى ئەڭ قورقۇنچلۇق ئىش . كىشىلەر دائىم قىلالمايۋاتقىنىدىن ئاغرىنىدۇ . بىراق مەن ئۆزۈمنىڭ نېمىلەردىن بەھرىمەن بولۇۋاتقانلىقىمنى ، نېمىلەرگە ئېرىشەلمەيۋاتقانلىقىمنى ئېسىمدە تۇتىمەن . ھەرگىزمۇ ئېرىشكەن نەرسىلىرىمنىڭ قەدرىنى قىلمايدىغان ئىشنى قىلمايمەن . قەدىرلىمەسلىك سېنى پۇشايمانغا قالدۇرىدۇ . تەقدىرىمىزنى ھەقىقىي ئۆزگەرتىدىغىنى پۇرسەت ئەمەس بەلكى ئۆزىمىزنىڭ پوزىتسىيەسىدۇر . مەغلۇپ بولۇش قورقۇنچلۇق ئەمەس ، مۇھىمى داۋاملىق سىناپ بېقىش . ئەگەر سىز مەغلۇپ بولسىڭىز ، يەنە ئورنىڭىزدىن تۇرۇڭ . پوزىتسىيە ھەممىنى ئۆزگەرتىدۇ !
باشقىلار نېمە قىلىۋاتىدۇ ، مەن نېمە قىلىۋاتىمەن دېگەننى كۆپرەك ئويلاپ تۇرۇشىمىز كېرەك . بۇرنىڭىزنىڭ ئۇچىنىلا كۆرمەي تېخىمۇ يىراقلارغا نەزەر سېلىشنى ئۆگىنىڭ . ئاغرىنىشلار سىزنى ھالسىرىتىپ قويمىسۇن ! ئۆزىڭىزنىڭ پاسسىپ پوزىتسىيەرىڭىزنى ئۆزگەرتىڭ ، ئەتىڭىزنىڭ تېخىمۇ گۈزەل بولۇشىغا ئىشىنىڭ !
تۆت قۇلاق قەلىمىدىن
2016-يىلى 12-نويابىر
595 قېتىم كۆرۈلدى | sansiz99 | ئەسەر يوللىغۇچى : | |
2016-11-12 22:47:04 | :يوللانغان ۋاقتى |
بۇ تېمىغا تېخى ئىنكاس يېزىلماپتۇ
تور بىكىتىمىزدىكى ئەسەرلەرنىڭ ئىشلىتىش ھوقۇقى تور بىكىتىمىزگە ۋە ئاپتورغا تەۋە بولۇپ، قالايمىقان كۆچۈرۈپ تارقاتقۇچىلارنىڭ مەسئۇلىيتى قاتتىق سۈرۈشتە قىلىنىدۇ. ئەمگىكىمىزگە ھۆرمەت قىلىڭ! باشقىلارنىڭ ئەمگىكىنى قەدىرلەش گۈزەل ئەخلاقتۇر!!!! بىكەت مەسئۇلى: نۇرمۇھەممەت ئالاقە تېلېفۇن - ئۈندىدار: 18999843588
www.yazghuqilar.com
新ICP备15002323号
|