ساپا تەربىيىسى توغرىسىدا
گۈلزىرە مەخمۇت
ساپا توغرىلىق سۆزلەشنى ئۇزۇندىن بېرى ئويلاپ كېلىۋاتقانىدىم ، بىراق قانداق ئېغىز ئېچىشنى بىلمەي يۈرگەن ئىدىم . تۈنۈگۈنكى ئىشلارنى كۆرۈپ يەنىلا سۆزلەش قارارىغا كەلدىم . مەكتەپتە ئوقۇۋاتقان چاغلىرىمدىلا سىنىپ مەسئۇلۇمنىڭ ئەڭ جىق دەيدىغان گېپى ‹ ئادەمدە ساپا بولمىسا بەك قورقۇنچلۇق ، ساپانىڭ ئەڭ ئاددىي تەلىپى-باشقىلارغا دەخلى قىلماسلىق ! › دېگەن گەپ ئىدى . مانا بۈگۈنكى كۈندە ھېس قىلىپتىمەن ، ساپا ھەقىقەتەنمۇ بەك مۇھىم ئىكەن !
قايسى بىر كۈنى سىڭلىم بىلەن ئۆرپ-ئادەت مەدەنىيىتى مۇزىيىغا باردۇق . سىڭلىم ئەمدى ئالتە ياشقا كىرگەن ئىدى ، ئۆزىمۇ سەل جىم تۇرمايدىغان كەپسىزرەك قىز ئىدى ، شۇڭا ئۇنىڭ ئارقىسىدىن ئەگىشىپلا يۈردۈم . ئۇنى تۇتۇشقا بولمايدۇ ، بۇنى تۇتۇشقا بولمايدۇ ، كىرىشكە بولمايدۇ .....دېگەندەك قائىدىلەرنى چۈشەندۈرۈپ قۇلىقىغا سىڭدۈرۈپ ماڭدىم . ئارىلقتا چىرايلىق ياسانغان ئىككى ياش ئانا تۆت بالىنى(ھەممىسى قىزبالا) يېتىلەپ كەلدى . ئۇلارنىڭ ئارىسىدا ئەڭ كىچىكى تۆت ياش ئىدى . قالغانلىرى مېنىڭ سىڭلىم بىلەن تەڭتۇش ئىدى . ئۇلارنىڭ ئاۋازى مۇزىيخانىنى بىر ئالدى . سىڭلىم ئىككىمىز ئۇلارغا ھەيرانلىق بىلەن قاراپ قويدۇق . دېمىسىمۇ ، جىمجىت بىر زال ئۇلارنىڭ ئاۋازى بىلەن باشقىچە ئاۋاتلىشىپ كەتكەنىدى . ئارىلىقتا سىڭلىم بىر ياغاچ كېمىنى كۆرۈپ قالدى . شۇنىڭغا بەك چىققۇسى بارلىقىنى ھەم رەسىمگە چۈشكۈسى بارلىقىنى ئېيتتى . مەن ئۇنىڭغا كېمىنىڭ ئىچىگە كىرىشكە بولمايدىغانلىقىنى چۈشەندۈردۈم ۋە كېمىنىڭ قېشىدا تۇرۇپلا رەسىمگە تارتىپ قويدۇم . سىڭلىم ئازراق خاپا بولدى ، بىراق يەنىلا باشقا نەرسىلەرنى كۆرۈش بىلەن مەشغۇل ئىدى . تۇيۇقسىز ھېلىقى تۆت قىز كېمىنىڭ ئىچىگە يۈگۈرۈپ كىرىپ كەتتى ، سەكرەشلىرىچۇ تېخى . ئۇلارغا گەپ قىلاي دەپ تۇرۇشۇمغا ، ئۇلارنىڭ ئانىلىرى يېتىپ كەلدى ۋە ئۇلارنى ئانداق تۇرۇڭ ، مۇنداق تۇرۇڭ دەپ رەسىمگە تارتقىلى تۇردى . سىڭلىم تېخىمۇ ھەيرانلىق بىلەن قاراپ قالدى . مەن ئۇنى يېتىلەپ باشقا يەرنى كۆرۈشكە ماڭدىم . قىزىق ، ھېلىقىلار سايىمىزدەكلا بىزنىڭ ئارقىمىزدىن تەڭلا يېتىپ كەلدى . كىرىشكە بولمايدۇ ، تۇتۇشقا بولمايدۇ ، دەسسەشكە بولمايدۇ .....دېگەندەك ئاگاھلاندۇرۇشلار ئۇلارغا ھەقىقەتەن ئارتۇقچە ئىدى.....
ئۇلارنىڭ ئارقىسىدىن گەپ قىلغىنىم ئەمەس ، پەقەت شۇ كېيىنكى ئەۋلادلىرىمىزغا تەربىيە قىلىشنىڭ قانچىلىك زۆرۈرلىكىنى تەكىتلەپ قويماقچى مەن ! ئائىلە تەربىيىسى شۇنچىلىك مۇھىمكى ، سىز بالىڭىزغا نېمىنى ئۆگەتسىڭىز ، ئۇ شۇنى ئۆگىنىپ چوڭ بولىدۇ . تەربىيىنى ئادەتتىكى ئىشلاردىن باشلايلى ، ئادەتتىكى قائىدىلەرگە سەل قارىمايلى ! ئېسىڭىزدە بولسۇن ، قائىدىگە بويسۇنمىغان كىشى ساپاسىز كىشىدۇر !
كىچىك بالا دېگەن ھەممە نەرسىگە قىزىقىدۇ ، قىلما دېگەننى بەك قىلىدۇ ! لېكىن ئۇنىڭدىمۇ بىلىش ، ھېس قىلىش تۇيغۇسى بار ، تېخى بەزىدە چوڭلار ئويلىمىغاننى ئويلىيالايدۇ . شۇڭا، مەنچە بولغاندا ئۇلارغا كىچىك ۋاقتىدىن باشلاپلا قائىدىگە بويسۇنۇشنى ئۆگىتىش كېرەك .
2016-يىلى 10-ئاينىڭ 24-كۈنى
تۆت قۇلاق قەلىمىدىن
314 قېتىم كۆرۈلدى | sansiz99 | ئەسەر يوللىغۇچى : | |
2016-10-25 1:02:48 | :يوللانغان ۋاقتى |
بۇ تېمىغا تېخى ئىنكاس يېزىلماپتۇ
تور بىكىتىمىزدىكى ئەسەرلەرنىڭ ئىشلىتىش ھوقۇقى تور بىكىتىمىزگە ۋە ئاپتورغا تەۋە بولۇپ، قالايمىقان كۆچۈرۈپ تارقاتقۇچىلارنىڭ مەسئۇلىيتى قاتتىق سۈرۈشتە قىلىنىدۇ. ئەمگىكىمىزگە ھۆرمەت قىلىڭ! باشقىلارنىڭ ئەمگىكىنى قەدىرلەش گۈزەل ئەخلاقتۇر!!!! بىكەت مەسئۇلى: نۇرمۇھەممەت ئالاقە تېلېفۇن - ئۈندىدار: 18999843588
www.yazghuqilar.com
新ICP备15002323号
|