روھ تەلقىنلىرى(غەزەللەر) ـــ بۈركۈت [ئۇلانما كۆچۈرۈش]

  
روھـ تەلـقىنـلىـرى

(غەزەللەر)

ئېلى بۇراۋىدىن (بۈركۈت)

ئۆتۈنۈش

بىزگە غۇرۇر-ۋىجدان بەر پەلەك،
روھىمىزغا دەرمان بەر پەلەك .

دىيانەتكە-ئادىمىيلىككە ،
يۈرەكلەردىن ماكان بەر پەلەك.

ھەققانىيەت تامچىلاپ تۇرسۇن،
ئابىي بۇلاق ــــ زۇۋان بەر پەلەك.

ساداقەتكە چۆمسۇن قەلبىمىز ،
ئاسىيلىققا «توپان» بەر پەلەك.

ۋۇجۇدلارنى يۇتمىسۇن زۇلمەت ،
بۈيۈك پارلاق نىشان بەر پەلەك.

بارچە دىلنى تولدۇرۇپ نۇرغا ،
چىن ئېتىقاد-ئىمان بەر پەلەك !

زارلىنىش

يىگىت بولۇپ قامالدا قالدىم،
گۈزەل ساھىبجامالدا قالدىم.

ۋەدە قىلدى كەلمىدى ، بىراق
ئۆزۈم تەنھا ئاچالدا قالدىم .

سەۋەبلىرى باغلاندى پۇلغا ،
مۇھەببەتتە زاۋالدا قالدىم .

زەربە يېدىم تۆت-بەشىنچى رەت،
قانداق قىلاي ؟ ئامالدا قالدىم .

دەردىم تۆكۈپ يۇلتۇزغا-ئايغا ،
باياۋاندەك خىيالدا قالدىم .

ۋاپا كۆرمەي قىزلاردىن ئاخىر،
چۈشۈمدىكى ئايالدا قالدىم...

ھەقىقەتنى چاقىرىش

پەلەك ! قۇشلار،بېلىقلار قېنى؟
لاي سۈيى بار ئېرىقلار قېنى؟

ئورىماقتا روھلارنى تۇمان ،
قەلبى ئويغاق-يېنىقلار قېنى؟

قىز-يىگىتلەر چېكىشتى ھەسرەت،
يۈرىكى ئوت-قىزىقلار قېنى؟

ۋۇجۇدلاردا زەبەردەستلىك يوق،
ئۇماچ،زاغرا-تېرىقلار قېنى ؟

ئادەملىككە ئوت كەتتى بۇ دەم،
ئەركەك غۇرۇر تىنىقلار قېنى ...؟

بۈيۈك ئارزۇلاردا بولۇش

ئۇچقانلارغا ساما بولغۇم بار ،
تىنىق ئەنبەر ھاۋا بولغۇم بار .

كۆزنىكىنى خوۋلۇق چەكمىگەن ،
غەمكىن دىلغا ناۋا بولغۇم بار .

رەزىللىككە بەتلەپ ئوق-ساداق،
ئادالەتكە پاناھ بولغۇم بار .

بىۋاپانىڭ قۇربانى بولغان ،
ئاشىقلارغا داۋا بولغۇم بار .

ئىمانى يوق كۆيۈك دىللارغا ،
كەچۈرگىسىز گۇناھ بولغۇم بار...

ئېغىر خۇرسىنىش

چېھرى سۈزۈك ناھارلار تۈگـىدى ،
قەلبى ئىللىق باھارلار تۈگىـدى.

ئۇرۇلمىدى دىلنىڭ زەخمىكى ،
مۇڭلۇق كۈيلەر-ساتارلار تۈگـىدى.

كۆپەيگەچكە سۈنئىي چىرايلار،
يامان كۆزلەر-تۇمارلار تۈگـىدى.

«خېنىم مىجەز» بوپقالـدى ئەرلەر ،
يۈرەكتىكى ئوت-نارلار تۈگـىدى.

ھاياسىـنى يوقـاتـتى قىـزلار ،
سۆيسە قانماس خۇمارلار تۈگىـدى...

بۇ يازمىنى ئاخىرىدا   بۈركۈت تەھرىرلىگەن. ۋاقتى  2012-4-13 19:20  

ئويناق ئىلھام،شوخ تۇيغۇلىرىڭىزغا مۇبارەك بولسۇن! قىسقا بەھىرلىك غەزەل يازماق ئۇنچە ئاسان ئەمەس،يېقىشلىق چىقىپتۇ بۇ غەزەللەر.

شائىر مۇھەممەت كامال خۇشخۇي ئەپەندىنىڭ رىغبىتىگە ھەشقاللا! ئامان بولغايلا...

ۋاي بۆركۈت، تەمبۇرنىڭ ئوينۇتۇپ ئولتۇرۇپ ناخشىغا قاتىدىغان قۇرلار ئىكەن بۇ! داۋاملىق تىرىشىڭ. سىزگە ئىجادىيەتتە ئۇتۇق تىلەيمەن.

بىر -بىرىدىن ئىسىل يېزىلغان غەزەللەركەن تەشەككۈر ، دەرت كەلمىسۇن قوللارغا.
شۇنداق ياقتۇرۇپ ئوقۇدۇم.

غەزەللىرىڭنى تۇلىمۇ ياقتۇرىمەن بۇرادەر . بۇ ساھەدە نەتىجە قازىنىشىڭنى ئۈمۈد قىلىمەن .

ناھايىتى ياخشى يېزىلغان غەزەللەركەن،ئىجادىيەت ئاسمىنىدا تېخىمۇ پەرۋاز قىلىشىڭىزغا تىلەكداشمەن.

‹‹شائىر ئۆرىنىڭ ئوقۇغانلىرىغا ئەمەس بەلكى ئۆزھىس تۇيغۇللىرغا ئەگىششى كېرەك››دەيدۇ ئادىل تۇنياز.ئەزىزى مۆھتىرەم:سىزنىڭ مەشرەپ،زەللى،نەۋائى،گۇمىنام،غەزەللرىنى كۆپرەك تەقىق قىلىپ كۆرشىڭىزنى تەۋسىيەقىلاي،بۇسىزگە ئوخشاش ئوتلۇق شائىرغا مول بولغان روھى ئېنىرگىيەئاتا قىغاي› شئرىيەت ئاسمىنىدا بۈركۈت كەبى پەرۋازقىلىڭ،،،،،،

   بۈركۈت، بۇ غەزەللىرىڭىزدىن سۆيۈندۈم. داۋاملىق ئالغا!