«ئەدىبلەر نەزىرىدىكى كۈسەن» ئىجادىيەت،مۇھاكىمە يىغىنى ئېچىلدى [ئۇلانما كۆچۈرۈش]

غەيرەت يوللىغان ۋاقتى  2013-6-21 19:41
كۇچادىكى مۇشۇ پائالىيەتنىڭ باھانىسىدا ،پائالىيەت باشلىنىشنىڭ ھارپا كۈنى،ئەدەبىي ئىجادىيەت ھەۋەسكارلىرى جەم بولۇپ،بىر كۈننى ئىنتايىن خۇشال-خورام ،مەنىلىك ئۆتكۈزدۇق . دىدار غەنىمەت.پائالىيەتمۇ مۇۋاپىقىيەتلىك ئېلىپ بېرىلىپتۇ. بۇنىڭدىن ھەممىمىز خۇشال.

«ئەدىبلەر نەزەرىدىكى كۈسەن»تېمىسىدىكى ئىلمىي مۇھاكىمە ۋە زىيارەت پائالىيىتىنىڭ باشلىنىش مۇراسىمىدا سۆزلەنگەن سۆز

  غەيرەت ئاسىم

ئەسسالام ھۆرمەتلىك رەھبەرلەر، دوستلار، كەسىپداشلار!
بۈگۈن «ئەدىبلەر نەزەرىدىكى كۈسەن»تېمىسىدىكى پائالىيىتىمىز قەدىمىي مەدەنىيەتلىك يۇرت كۈسەن دىيارىدا داغدۇغىلىق ھالدا باشلاندى. مانا ھازىر بىز بۇ يەرگە جەم بولۇپ،كۇچانىڭ ئەدەبىيات-سەنئەت ئىشلىرىنىڭ تەرەققىياتى ھەققىدە كەڭ-كۇشادە پىكىرلەشمەكچى بولۇپ تۇرىۋاتىمىز. مېھماندوست كۇچا خەلقىنىڭ ھۇزۇرىغا كەلگەنلىكىمىزدىن ھەممەيلەننىڭ كۆڭۈللىرى سۆيۈنمەكتە.شۇ مۇناسىۋەت بىلەن مەن شىنجاڭ ئۇيغۇر ئاپتونوم رايۇنلۇق ئەدەبىيات – سەنئەتچىلەر بىرلەشمىسى ۋە يازغۇچىلار جەمئىيىتى نامىدىن بۇ پائالىيەتنىڭ باشلانغانلىقىنى قىزغىن تەبرىكلەيمەن ھەم پائالىيەتكە قاتناشقان يازغۇچى،ئەدىبلىرىمىزدىن سەمىمى ھال سورايمەن. كۆپ يىللاردىن بېرى كۇچا ناھىيەسىنىڭ ئەدەبىيات- سەنئەت خىزمىتى ۋە ئەدەبىيات -  سەنئەتچىلەر بىرلەشمىسىنىڭ خىزمەتلىرىگە زور دەرىجىدە ئەھمىيەت بېرىپ،يېقىندىن قوللاپ كېلىۋاتقان كۇچا ناھىيەلىك پارتكوم، خەلق ھۆكۈمىتى ۋە ھەر ساھەلەرگە چوڭقۇر رەھمەت ئېيتىمەن!
كۇچا ھەممىزنىڭ نەزەرىدە قەدىمى بىر ماكان. مەيلى يېپەك يولى مەدەنىيىتى ئەڭ گۈللەنگەن دەۋرلەردە بولسۇن ۋە ياكى بۈگۈنكى كۈندە بولسۇن كۇچا يەنىلا ئاپتونوم رايونىمىزنىڭ مەدەنىي ۋە ئىجدىمائىي ھاياتىدا ئۆزىگە خاس مەدەنىيەت ئالاھىدىلىكىنى شەكىللەندۈرگەن، ئىقتىسادىي جەھەتتە مۇئەييەن تەسىر كۈچگە ئىگە، خەلقى تىرىشچان، ئەنئەنە پۇرىقى كۈچلۈك، ئەنئەنە بىلەن زامانىۋىيلىقنى بىرلەشتۈرۈشتە ئۆزگىچە يول تۇتقان ئالاھىدە بىر يۇرت.
يېقىنقى يىللاردىن بۇيان، كۇچا ناھىيەلىك پارتكوم، خەلق ھۆكۈمىتىنىڭ توغرا  رەھبەرلىكىدە،كۇچا ناھىيەسىدىكى كەڭ ئەدەبىيات -  سەنئەت خىزمەتچىلىرى ئىلمىي تەرەققىيات قارىشىنى چوڭقۇر ئىزچىللاشتۇرۇپ، ئاڭلىق ھالدا «ئىككى ئۈچۈن خىزمەت قىلىش»يۆنىلىشى ،«بارچە گۈللەر»فاڭجېنى ۋە «ئۈچكە يېقىنلىشىش» پىرىنسىپىدا چىڭ تۇرۇپ، زامانىۋى مەدەنىيەتنىڭ ئالغا ئىلگىرلەش يۆلىنىشىنى توغرا ئىگىلەپ، ئىسلاھات ، تەرەققىيات ، مۇقىملىق چوڭ ۋەزىيىتىنى يېقىندىن چۆرىدەپ، ئاساسى مىلودىيەنى ياڭرىتىپ، تەشەببۇسكارلىق بىلەن دەۋر پۇرىقى روشەن ئەكس ئېتىلگەن، قۇيۇق مىللىي ئۇسلۇبقا ئىگە، ھەر مىللەت ئاممىسىنىڭ ياقتۇرىشىغا ئېرىشكەن بىر تۈركۈم نادىر ئەسەرلەرنى يارىتىپ،كۇچانىڭ جەلىپكارلىقى ۋە تەسىر كۈچىنى ئاشۇرۇپ ۋە كېڭەيتىپ،كۈسەن دىيارىدىكى ھەر مىللەت خەلق ئاممىسىنىڭ مەدەنىيەت تۇرمۇشىنى بېيىتىپ ۋە تولۇقلاپ، ئەدەبىيات -  سەنئەت ئىشلىرىمىزنىڭ گۈللىنىشى،تەرەققىي قىلىشى ئۈچۈن ئاز بولمىغان نەتىنجىلەرنى قولغا كەلتۈردى. بۇ قېتىم ئۇيۇشتۇرۇلغان «ئەدىبلەر نەزەرىدىكى كۈسەن»تېمىسىدىكى مۇھاكىمە ۋە زىيارەت پائالىيەتمۇ ئىنتايىن ياخشى ۋە دەل ۋاقتىدا تەشكىللەنگەن بىر قېتىملىق پائالىيەت بولۇپ ھېساپلىنىدۇ.
بۇ قېتىمقى «ئەدىبلەر نەزەرىدىكى كۈسەن» تېمىسىدىكى مۇھاكىمە ۋە زىيارەت پائالىيىتىگە ئاپتونۇم رايۇنىمىزنىڭ ھەرقايسى جايلىرىدىن ئەدىبلەر،ژۇرنالىستلار قاتناشتى. مەن كۆپچىلىكنىڭ مۇھاكىمە ۋە زىيارەت جەريانلىرىدا، كۆز قاراشلىرىنى كەڭ-كۇشادە ئوتتۇرغا قويۇپ، ئازادە پىكىر ئالماشتۇرۇپ،كۇچادىكى ئۆزگۈرۈش ۋە يېڭىلىقلارنى تەپسىلى ئۈگىنىپ، ئەدەبىياتىمىزنىڭ بۇندىن كېيىنكى تەرەققىياتى ئۈچۈن تېخىمۇ ياخشى ھاسىلاتلارغا ئېرىشىشىنى ئۈمىد قىلىمەن. بۇ يەردە ئولتۇرغان مەيلى ژۇرنالىستلار بولسۇن ۋە مەيلى ئىجادىيەت تۇلپارلىرىنى قامچىلاپ ئالغا كېتىۋاتقان ئەدىبلىرىمىز بولسۇن ھەممىمىز ئۆزىمىزگە تەلەپنى قاتتىق قويۇپ، بىر-بىرىمىزگە ھەمدەم، يار-يۆلەكتە بولۇپ، ئەدەبىيات – سەنئەت ئىشلىرىمىزنى ئىلگىرى سۈرۈش ئۈچۈن كۈچ قوشۇشنى ئۈمىد قىلىمەن.
ھەممىمىزگە مەلۇمكى، ئەدەبىيات - سەنئەت خىزمىتى جۇڭگوچە ئالاھىدىلىككە ئىگە سوتسىيالىزىم  ئىشلىرىنىڭ  مۇھىم تەركىۋى قىسىمى. پارتىيە ۋە ھۆكۈمىتىمىز باشتىن- ئاخىر ئەدەبىيات -  سەنئەت خىزمىتىگە يۈكسەك  ئەھمىيەت بېرىپ، بىريۈرۈش توغرا بولغان فاڭجېن سىياسەتلەرنى تۈزۈپ ۋە يولغا قويۇپ، سوتسىيالىستىك ئەدەبىيات -  سەنئەت ئىشلىرىنىڭ گۈللىنىشى، تەرەققىي قىلىشىنى تۈپ كاپالەت بىلەن تەمىنلەپ، ئۇنىڭغا بىپايان كەلگۈسىنى يارىتىپ بەردى.ھازىر ئاپتونوم رايۇنىمىزنىڭ سوتسىيالىستىك ئەدەبىيات - سەنئەت  ئىشلىرىنىڭ گۈللىنىپ، روناق تېپىشى، تارىختا مىسلى كۆرۈلمىگەن تەرەققىيات پۇرسىتىدە تۇرماقتا. يېڭى ۋەزىيەت ۋە يېڭى ۋەزىپىلەرگە يۈزلەنگىنىمىزدە ھەر مىللەت خەلقىنىڭ مەدەنىيەت ئېھتىياجىنى قاندۇرۇشقا نەزەر سالغىنىمىزدا،مول ۋە ئۆزگىچە مەدەنىيەت مەنبەسىدە تۇرۇپ، تارىخقا، دەۋرگە، خەلققە يۈز كېلىدىغان نادىر ئەسەرلەرنى تىرىشىپ ئىجاد قىلىش، شىنجاڭدىكى ھەر مىللەت ئەدەبىيات - سەنئەت خىزمەتچىلىرىنىڭ شەرەپلىك بۇرچى ۋە تارىخى مەسئۇلىيىتى بولۇپ ھېسابلىنىدۇ. شۇنىڭ ئۈچۈنمۇ، ئەدىبلىرىمىز زامانىۋىي مەدەنىيەتنى تارقىتىشتىن ئىبارەت مۇقەددەس بۇرچنى زىممىسىگە ئېلىپ ، «ئىككى ئۈچۈن خىزمەت قىلىش » يۆنىلىشى ۋە «بارچە گۈللەر» فاڭجېنى، ئەمەلىيەتكە، تۇرمۇشقا،ئاممىغا يېقىنلىشىش پىرىنسىپىدا تەۋرەنمەي چىڭ تۇرۇپ ، رايون ئالاھىدىلىكى بىلەن مىللى ئالاھىدىلىكنى ئاۋامنىڭ تەلىپى بىلەن بىرلەشتۈرۈشتە چىڭ تۇرۇپ ، ئەنئەنىۋى جەۋھەرلەر بىلەن دەۋرنىڭ تەلەپلىرىنى بىرلەشتۈرۈپ، سىرتتىن قوبۇل قىلىپ ، كېلەچەككە يۈزلىنىپ ، ئاكتىچانلىقىمىزنى ئەڭ زور چەكتە جارى قىلدۇرۇپ، تەشەببۇسكار ۋە ئىجادچان بولۇپ، ئەدەبىيات - سەنئەتنىڭ ئەسلى ئىجادىي كۈچى،جەلىپكارلىقى ، تارقىتىش كۈچى، تەسىر كۈچى قاتارلىقلارنى زور كۈچ بىلەن يۇقۇرى كۆتۈرۈپ ، ھەر مىللەت ئاممىسىنى  نادىر ئەدەبىيات – سەنئەت ئەسەرلىرىمىز تەمىنلىشىمىز كېرەك.
ئاخىرىدا، كەڭ ئەدىبلىرىمىز، ژۇرنالىستلىرىمىزدىن ئۆگىنىشنى،تەربىيلىنىشنى كۈچەيتىپ، ۋەتەنگە،خەلققە سادىق بولۇپ،يادرولۇق قىممەت قارىشىمىزنى ئاڭلىق ھالدا ئەمەلىيەتتە كۆرسىتىپ،چىنلىق،ياخشىلىق، گۈزەللىكنى جارى قىلدۇرۇپ،ساختىلىق،رەزىللىك،خۇنۈكلىكنى قامچىلاپ،چىداملىق بىلەن يېڭىلىق يارىتىپ، ئاپتونوم رايۇنىمىزنىڭ ئەدەبىي ئىجادىيەت ئىشلىرىنىڭ تەرەققىياتى ئۈچۈن تېخىمۇ زور تۆھپىلەرنى قوشۇشىنى، تېخىمۇ نادىر ئەسەرلەرنى بارلىققا كەلتۈرۈشىنى سەمىمىيلىك بىلەن ئۈمىد قىلىمەن ۋە بۇ قېتىمقى پائالىيەتنىڭ تولۇق ئۇتۇقلۇق بۇلۇشىغا تىلەكداشلىق بىلدۈرىمەن !

                                           كۆپچىلىككە رەخمەت !
                                                  2013-يىلى 6-ئاينىڭ 20-كۈنى