ئابدۇرەھىمجان يۈسۈپ

          ئابدۇرەھىمجان يۈسۈپ ئۈمىد 1974- يىلى 22 – ئىيون مەكىت ناھىيىسىنىڭ قىزىلئاۋات يېزىسىدا  مەرىپەتپەرۋەر ئوقۇتقۇچى ئائىلىسىدە توغۇلغان .1982– يىلى 9 – ئايدىن  1998 – يىلى 7 – ئايغىچە باشلانغۇچ ، تۇلۇقسىز ۋە تۇلۇق ئوتتۇرا مەكتەپلەردە ئوقۇغان . 1998 – يىلى 9 – ئايدىن 2003 – يىلى 7 – ئايغىچە قەشقەر پىداگوگىكا ئىنىستىتوتى جوڭگو تىل – ئەدەبىيات فاكولتىتىدا ئوقۇغان . 2003 – يىلى 10 – ئايدىن 2007 – يىلى 4 – ئايغىچە يوپۇرغا ناھىيىلىك 1 – ئوتتۇرا مەكتەپتە تىل – ئەدەبىيات ئوقۇتقۇچىسى بولۇپ ئىشلىگەن . 2009 – يىلدىن2011- يىلغىچە ئاقسۇ شەھەر ئايكۆل بازارلىك ئوتتۇرا مەكتەپتە تەكلىپلىك ئوقۇتقۇچى بولۇپ ئىشلىگەن . 2012-يىلدىن بۇيان ئائىلىدە تىجارەت ۋە يېزىقچىلىق بىلەن شۇغۇللىنىپ كەلمەكتە .
        ئابدۇرەھىمجان يۈسۈپ ئۈمىد 1993 – يىلى يەنى ،تولۇق ئوتتۇرىدا ئوقۇۋاتقان ۋاقتىدىلا  «شىنجاڭ مائارىپ گېزىتى »  دە ئىلان قىلىنغان « ئوبرازىنى خۈنۈكلەشتۈرىۋاتقان ئوقۇتقۇچىلار توغرىسىدا »  ناملىق ماقالىسى بىلەن  ئەدەبىي ئىجادىيەت  سىپىگە  كىرگەن بولۇپ ئىلگىرى – كىيىن بولۇپ  20 پارچىدىن ئارتۇق ئىلمىي ماقالىسى ، 150 پارچىدىن ئارتۇق شىئېر ، نەسىر ۋە ئىجتىمائىي تىمىدىكى ئەسەرلىرى «تىل ۋە تەرجىمە » «مىراس »  « شىنجاڭ ئىجتىمائىي پەنلەر مۇنبىرى »  « قەشقەر پىداگوگىكا ئىنستىتوتى ئىلمىي ژورنىلى » « قەشقەر ئەدەبىياتى » « كىروران »« ھاياتلىق » « كىتاپ مۇنبىرى » « جوڭگو مىللەتلىرى » « شىنجاڭ ياشلىرى » « تارىم غۇنچىلىرى » « قومۇل ئەدەبىياتى » « پەن ۋە تۇرمۇش »« تۇرپان » قاتارلىق مەتبۇئاتلاردا ئىلان قىلىنغان . 2003 – يىلى 4- ۋە 6 – ئايدا ،يەنى، ئالىي مەكتەپنى پۈتتۈرىدىغان ۋاقتىدا  قەشقەر  ئۇيغۇر نەشىرىياتى  تەرىپىدىن  « ئۈمىد تىنىقلىرى »  ( 200 مىڭ خەتلىك )  ناملىق ئەدەبىي خاتىرلەر توپلىمى  ۋە « قارچۇقۇمدا چاقنىغان دۇنيا »  ناملىق  شىئېرلار  توپلىمى نەشىر   قىلىنغان .  «  كىملىك تەربىيسى » ( 700 مىڭ خەتلىك )  ناملىق  ئىككى  قىسىملىق  مەكتەپ دەرسلىكى  ئالاقىدار  ئورۇنلار  تەرىپىدىن  تەكشۈرۈپ  ئۆتكۈزۈۋېلىنىپ بېسىشقا تاپشۇرۇلدى . نەشىرگە تەييارلىغان ۋە تاپشۇرغان كىتاپلىرىدىن « مەڭگۈلۈك مومام » « كاچكۇلدىكى قۇياش »« شاخنىڭ چۈشى » « يىغلىغان تاش » قاتارلىق شىئېرلار توپلاملىرى ، « تەپەككۇر مىۋىلىرى » ناملىق ئىلمىي ماقالىلار توپلىمى ، « ھىكمەت خەزىنىسى » ۋە « تىزگىنەك ئۆز قولىمىزدا » ناملىق  نەسىر  ۋە پوبلىستىك ماقالىلار توپلاملىرى بار  .  
          ئىلان قىلىنغان ۋەكىللىك ئەسەرلىرىدىن  « ھاياتنىڭ خوجايىنى  بول »  (« مىراس»  ژورنىلى 2005 – يىلى 2 – سان ) ، « موھىت ، مەۋجۇدىيەت ۋە مەسئۇلىيەت »  («مىراس » ژورنىلى 2005 – يىلى 5 – سان ) ،  « جىگدە مۇھەببىتى »  ( « تارىم غۇنچىلىرى » 199  – يىل 8 - سان ) ،  « بالىلارنى تەربىيلەش ئاتا – ئانىلارنىڭلا ئىشىمۇ »  ( « شىنجاڭ ئاياللىرى »  2003 – يىللىق 3 – سان  )  ،  « مۇھەببەت ۋە ئەخلاق كىرزىسى »  (  «  قەشقەر ئەدەبىياتى  » 2003 – يىللىق 1 – سان )  ، «  كىلاسىك ئەدەبىياتىمىزدىكى شىئېرىيەت تەنقىدچىلىكى »  (  « قەشقەر  پىداگوگىكا  ئىنىستىتوتى   ئىلمىي ژورنىلى » 2004 – يىللىق 5 – سان )« خەلىق ئېغىز ئەدەبىياتى تەتقىقات تىمىلىرىدىن ئومۇمىي كاتالوگ» ( « كىتاپ مۇنبىرى » 2003 – يىل 3-4- سان )  «  <بۆرە ئانا > رومانىنىڭ  قىممەت  قاتلىمى ئۈستىدە  ئىزدىنىش »  ( باكلاۋېرلىق دېسىرتاتسىيسى ) ، «ئويغۇر ئەدەبىيات تارىخىدىكى<قەشقەر>نى تەخەللۇس قىلغان ئەدىبلەر »(«شىنجاڭ ئىجتىمائىي  پەنلەر مۇنبىرى »2006   يىل 6- سان )، «< مەسنەۋىي  خاراباتى >  دىكى مەرىپەت  ئىدىيىسى   ۋە  ئۇنىڭ رىئال قىممىتى   »  (  «    شىنجاڭ  ئىجتىمائى   پەنلەر مۇنبىرى »2003-يىللىق5-سان ) قاتارلىقلار بار .  
       ئابدۇرەھىمجان يۈسۈپ ئۈمىدنىڭ « جىگدە مۇھەببىتى » ناملىق نەسىرى «ئۈلگىلىك ماقالىلەر » ۋە  « ماقالە  –   نەسىر يېزىقچىلىقىدىن ئۆرنەكلەر » ،  « ئوتتۇرا مەكتەپ ئوقۇغۇچىلىرى ئۈچۈن ئۈلگىلىك ماقالىلەر توپلىمى »  ناملىق كىتاپلارغا كىرگۈزۈلگەن . « ھاياتنىڭ خوجايىنى بول » ناملىق ئەسىرى « گومانتار ئوقۇشلۇق » ( 8 – يىللىقلار ئۈچۈن 1 – قىسىم ) غا كىرگۈزۈلگەن . « پىرىستان ياساڭ » ناملىق ئەسىرى «پىسخىك  ساغلاملىق مەجمۇئەسى –ئۇتۇقنامە »گە كىرگۈزۈلگەن « مەڭگۈلۈك زۈرۈرىيەت »، « ئەڭ زۈرۈر بىلىمگە ئىنتىلىڭ »، « مىۋىلىك دەرەخ ۋە ئادەم »، «قۇربىڭ يەتمەيدىغان ئىشقا ئورۇنما » ناملىق ئەسەرلىرى تولۇق ۋە تولۇقسىز ئوتتۇرا مەكتەپلەرنىڭ يانداش مەشىقلىرىگە كىرگۈزۈلگەن . « سەر خىل ئەسەرلەردىن جەۋھەرلەر » ناملىق كىتاپقا « ئۈمىد تىنىقلىرى » ناملىق كىتابىدىن ھېكمەتلەر تاللاپ كىرگۈزۈلگەن . « ئوقۇدۇم دىگۈچە ، بىلدىم دىگىن » ناملىق نەسىرى « جەزبىدار گۈلدەستىلە ر »  ( 3 – قىسىم ) غا كىرگۈزۈلگەن  .  ئابدۇرەھىمجان يۈسۈپ ئۈمىد « جوڭگو مىللەتلىرى  »  ژورنىلى ئويۇشتۇرغان مۇنەۋەر ئوقۇرمەنلەرنى تاللاش پائالىيىتىدە 1 – دەرىجىگە ئىرىشىپ مۇكاپاتلانغان . بۇنىڭدىن باشقا ئابدۇرەھىمجان يۈسۈپ ئۈمىدىنىڭ نامى  « ئويغۇر خەلق ئېغىز ئەدەبىيات قامۇسى » ( 12 – توم)نىڭ « تۆھپىكارلار » قىسىمىغا كىرگۈزۈلگەن . «شىنجاڭ ياشلىرى»دا ئېلان قىلىنىپ مەركىزىي خەلق رادىيۇ ئىستانسسىدا ئاڭلىتىلغان«سۆيگەنلەر سۆيۈلىدۇ» ناملىق ئەسىرىنىڭ توردا چېكىلىش قېتىم سانى  9300 قېتىمدىن ئاشقان .
ئابدۇرەھىمجان يۈسۈپ ئۈمىد يۇقارقىدەك نەتىجىلىرى بىلەن 2013-يىلى 2-ئايدا شىنجاڭ ئۇيغۇر ئاپتونۇم رايونلۇق يازغۇچىلار جەمىيتىنىڭ ئەزالىقىغا قوبۇل قىلىندى. ئۇ ئىجادىيەت سىپىدە توختاۋسىز ئىلگىرلىمەكتە.بىز بۇ ياشنىڭ بۇندىن كىيىنكى ئىجادىيىتىگە تېخىمۇ ئوتۇق تىلەيمىز.

بۇ يازمىنى ئاخىرىدا   ئەلقىزى تەھرىرلىگەن. ۋاقتى  2014-1-28 14:20