ئاسماننىڭ ئۇ تەرىپى [ئۇلانما كۆچۈرۈش]

ئارىيە

ئاسماننىڭ ئۇ تەرىپى

ساجىدە سۇلايمان

مەن ئەسلىدە ئاسماننىڭ ئۇ تەرىپىگە كەتمەكچى بولۇپ يولغا چىققان ئىدىم، ئەمما يېرىم يولغا بېرىپلا قايتىپ كەلدىم. قايتىپ كەلدىم ئەمەس ئۇلار مېنى قايتۇرۇپ كېلىشتى. ئۇلار زادى كىملەر؟ بىلگىڭىز بارمۇ؟ مېنىڭمۇ بەكلا بىلگۈم بار. مەن ئۇلارغا تازا زەن سېلىپ قارىدىم. ئۇلارنىڭ بەزىلىرى ماڭا ئىنتايىن تونۇش بىلىندى، تونۇشلا ئەمەس، بەكلا يېقىن، بالامدەك  يېقىن بىلىندى. بەزىلىرىنى مەن شۇنچە قىلىپمۇ تونۇيالمىدىم. بىرسى ماڭا «سەن بۇلارنىڭ بەزىلىرىنى ھازىر تونىيالمىغىنىڭ بىلەن  بۇلار سېنىڭ كېيىنكى سەپىرىڭدىكى ھەمراھلىرىڭ بولىدۇ،  ۋاقىت ئۆتكەنچە ئاستا-ئاستا تونۇپ قالىسەن» دېدى. مەن ئۇلارغا قارىدىم، ئۇلار ماڭا سوغۇق كۈلۈپ قويدى. ئۇ سوغۇق كۈلكىدىن تىنىم باشتا سەل شۈركىنگەن بولسىمۇ، بىردەمدىن كېيىنلا پۈتۈنلەي ئەسلىمگە كېلىپ قالدىم.
سىز ئاسماننىڭ ئۇ تەرىپىگە بېرىپ باققانمۇ؟ ياق، سىز بېرىپ باقمىغان ، ھەم بارالمايسىز. چۈنكى باراي دېسىڭىزمۇ يېرىم يولدىن قايتىپ كېلىسىز، خۇددى ماڭا ئوخشاش ئۇلار سىزنىمۇ قايتۇرۇپ كېلىشىدۇ. ئەمما ئۇيەرگە بارغانلارنىمۇ ئانچە - مۇنچە بار، دەپ ئاڭلاپمۇ قالدىم. ئۇنداقلارنى كىشىلەر شەخسىيەتچى، ئۆزىنىلا ئويلايدىغان ھاماقەت دېيىشىدىكەن. مەن ئۇنداق قارىمايمەن، شەخسىيەتچى بولسا نېمە بوپتۇ؟ ئۆزىنى ئويلىغاننىڭ زىيىنى بارمۇ؟ ئۆزىنى ئويلىماي تۇرۇپ ئۆزگىنى ئويلاش مۈمكىنمۇ؟ باشتا يالغۇز كەلگەندەك ئەڭ ئاخىردىمۇ يەنە ئۆزىمىز يالغۇچ كېتىمىزغۇ؟ بولدىلا بۇ گەپلەر تۇرۇپ تۇرسۇن. ئۇلارنىڭ مېنى قايتۇرۇپ كېلىپ قەيەرگە ئاپارغانلىقىنى بىلەمسىز؟
ئۇلار مېنى قايتۇرۇپ كېلىپ  لاۋۇلداپ كۆيۈۋاتقان تونۇرغا سېلىپ قويدى،  مەن تونۇرنىڭ ئىچىدە ئوت لاۋۇلداپ كۆيگەن ۋاقىتلاردا چاراسلاپ كۆيۈپ كېتەتتىم، ئوت پەسەيگەندە بولسا دۈملىنىپ ئېرىپ كېتەتتىم.  قانداق چىدىغانسىز دېمەڭ، مەن بۇنداق تونۇرغا بۇرۇنمۇ بىر قېتىم كىرىپ باققان، ئۇ ۋاقىتتا بىرسى ئەكىرمىگەن، ئەمما مەن ئۆزۈممۇ تۇيمىغان ھالدا كىرىپ قالغان ئىدىم، ئۇ ۋاقىتتا مەن گەڭگىراپ قالغانلىقىمدىن بىراقلا ھالەك بولغىلى تاس قالغان، بۇ قېتىم ئۇنىڭغا ئوخشىمايدۇ، بۇ قېتىم ھېچ بولمىسا تونۇرنى مەن تونۇيتىم، شۇڭا سەگەكلىك بىلەن  تونۇردىن چىقىپ كېتىشكە يۇلقۇندۇم، ئەمما ئۇلار بېشىمدىن بېسىپ، زادىلا ئۆرە بولغىلى قويمايۋاتاتتى،  ئۇلار پەقەت مېنى تونۇرغا سولاپ قويۇشتىن باشقىنى بىلمەيدۇ، چۈنكى ئۇلار كۆيۈپ باقمىغان، ھەممىسى كۆيدۈرگۈچىلەر.  مەن ئۇلارنىڭ بىخودلۇقىدىن پايدىلىنىپ، بىر ئاماللارنى قىلىپ تىۋىش چىقارماي تونۇردىن چىقىۋالدىم-دە، بارلىق كۈچۈمنى يىغىپ، تۈننىڭ شۇنچە قاراڭغۇلۇقىغا قارىماي ئاسماننىڭ ئۇ تەرىپىنى نىشانلاپ يۈگۈردۈم، يولبويى بىر دەممۇ توختاپ قالماي يۈگۈردۈم، بەزىدە ماڭا چىمەن باغلارمۇ ئۇچراپ قالدى، ئۇ يەردە ئازراق ئارام ئالماقچىمۇ بولدۇم، ئەمما مەن تونۇيدىغان يېقىن كىشىلەر ھەم مەن تونۇش ئالدىدا تۇرغانلارنىڭ ئارقامدىن يېتىپ كېلىپ، مېنى قايتۇرۇپ كېلىپ يەنە تونۇرغا سېلىپ كۆيدۈرۈشىدىن قورقۇپ، ئارام ئېلىش ئويۇمدىن دەر ھاللا ۋاز كېچىپ، جان-جەھلىم بىلەن يۈگۈردۈم. ھەر نېمە بولسا يۈگۈرگىنىم بىكار كەتمىدى، كۆزلىرىم ئاسماننىڭ قىرغىقىنى كۆردى، قىرغاق ئاستا-ئاستا ئالدىمغا يېقىنلاپ كەلمەكتە ئىدى، ياق مەن قىرغاققا يېقىنلاپ بارماقتا ئىدىم، يۈرىكىم ھاياجاندا تىپچەكلەپ كەتتى، ئۈمىدلىرىم چېچەك ئېچىپ، ئارمان گۈللىرىم ئارزۇ چېكىلىرىدىن ئورۇن ئالدى. ئاخىرى ئاسماننىڭ ئۇ تەرەپى بىلەن بۇ تەرەپىنىڭ نەق چېگرىسىغا كېلىپ توختىدىم، ھاياجىنىمنى بېسىۋېلىش ئۈچۈن كۆزلىرىمنى چىڭ يۇمۇپ بىردەم سۈكۈتتە تۇرۇۋالغاندىن كېيىن كۆزلىرىمنى ئاستا ئېچىپ، ئاسماننىڭ ئۇ تەرىپىگە ئاتلاي دەپ تۇرۇشۇمغا مەن ئويلاپمۇ يېتەلمەيدىغان بىر ئىش يۈز بەردى، ئاسماننىڭ ئۇ تەرەپ قىرغىقىدا مەن تۇيدۇرماي قويۇپ قېچىپ كەلگەن ھېلىقى مەن تونۇيدىغان ھەم مەن تونۇش ئالدىدا تۇرغان كىشىلەر مېنى  قارشى ئېلىپ قوللىرىنى  ماڭا سوزۇشىۋاتاتتى، مەن ئۇلارنى كۆرۈپ ھوشۇمدىن كەتتىم-دە، ئالدىمدىكى ئاسماننىڭ ئىككى تەرەپ پاسىلىدىكى ھاڭغا يىقىلدىم. مەن ئۆزۈمنى پارە-پارە بولۇپ كەتتىممىكىن دەپ ئويلىغان ئىدىم، ئەمما مەن ھېچ نېمە بولماپتىمەن. چۈنكى مەن ئۇلارنىڭ قۇچىقىغا يىقىلغان ئىدىم، ئۇلار مېنى كۆتۈرۈپ ئاسماننىڭ ئۇ تەرەپىگە ئېلىپ بېرىشتى، ئۇ يەردە كۆردۈمكى، ئاسماننىڭ بۇ تەرەپىدىكىدىن غايەت زور بىر تونۇر تۇراتتى، تونۇر ئىچىدىن لاۋۇلداپ كۆتۈرۈلىۋاتقان ئوت يالقۇنى ئاسماننىڭ ئاسمىنىغا تۇتىشاتتى. مەن بۇ قېتىم ئالدىنقى قېتىمقىدەك قارشىلىق كۆرسەتمەستىن يۇۋاشلىق بىلەن تونۇرغا كىرىپ كەتتىم...
بۇ يازمىنى ئاخىرىدا   zeperi تەھرىرلىگەن. ۋاقتى  2012-9-21 00:46  

سىز ئاسماننىڭ ئۇ تەرىپىگە بېرىپ باققانمۇ؟ ياق، سىز بېرىپ باقمىغان ، ھەم بارالمايسىز. چۈنكى باراي دېسىڭىزمۇ يېرىم يولدىن قايتىپ كېلىسىز، خۇددى ماڭا ئوخشاش ئۇلار سىزنىمۇ قايتۇرۇپ كېلىشىدۇ. ئەمما ئۇيەرگە بارغانلارنىمۇ ئانچە - مۇنچە بار، دەپ ئاڭلاپمۇ قالدىم. ئۇنداقلارنى كىشىلەر شەخسىيەتچى، ئۆزىنىلا ئويلايدىغان ھاماقەت دېيىشىدىكەن. مەن ئۇنداق قارىمايمەن، شەخسىيەتچى بولسا نېمە بوپتۇ؟ ئۆزىنى ئويلىغاننىڭ زىيىنى بارمۇ؟ ئۆزىنى ئويلىماي تۇرۇپ ئۆزگىنى ئويلاش مۈمكىنمۇ؟ باشتا يالغۇز كەلگەندەك ئەڭ ئاخىردىمۇ يەنە ئۆزىمىز يالغۇچ كېتىمىزغۇ؟ بولدىلا بۇ گەپلەر تۇرۇپ تۇرسۇن. ئۇلارنىڭ مېنى قايتۇرۇپ كېلىپ قەيەرگە ئاپارغانلىقىنى بىلەمسىز؟
سۆزلەرنىڭ بۇنچىلىك ئىلاستىكىلىقىنى ئويلىماپتىمەن.
ئاسمىنىڭىز ئاسمىنىڭىزدەك بولسۇن!

مەن تونۇرنىڭ ئىچىدە ئوت لاۋۇلداپ كۆيگەن ۋاقىتلاردا چاراسلاپ كۆيۈپ كېتەتتىم .....

  ھاياتلىق تاۋلىنىش دىمەكتۇر .
سىزگە تېخىمۇ زور ئۇتۇقلار تىلەيمەن !

بۇ يازمىنى ئوقۇۋىتىپ ئۆزەم ھەققىدە ئويلىنىپ قالدىم.
بۇ ئەسەرنىڭ مۇۋاپىقىيىتى بولسا كېرەك ھە! سىزگە ئۇتۇقلار يار بولسۇن.

سىزگە ئۇتۇق تىلەيمەن،

نەسىرىمنى ياقتۇرۇپ ئوقۇغان ئەزىزلەرگە تەشەككۇر!

راس گەپنى قىلسام بۇ نەسىر نى تازا چۈشىنەلمىدىم،  مېنى ئاياللىققا چاقىرغان كىم ، دېگەن نەسىرىڭىزنى بەكمۇ ياقتۇرۇپ ئوقۇغان ئىدىم، كەچۈرۈڭ، بۇ نەسىرىڭىزنىڭ مەنىسىنى بەكلا چۈشەنگۈم بار،.

يەنە سىزدىن سوراپ باقسام، ئاۋۇ ئارىيە دېگىنىڭىز  نېمىنى چۈشەندۈرىدۇ؟ باشقىلارنىڭ ئەسىرىدىن ئارىيەمۇ؟ يا ئۆزىڭىزنىڭ بىرەر  ئەسىرىڭىزدىن ئارىيەمۇ؟ خالىمىسىڭىز جاۋاب بەرمىسىڭىزمۇ كېرەك يوق.