جىگدىلىكتە يىلىم ئالار قىز [ئۇلانما كۆچۈرۈش]

جىگدىلىكتە يىلىم ئالار قىز

يۈرىكىدە ئوتلۇق ئارمانلار ،
جىگدىلىكتە يىلىم ئالار قىز.
ئارام بەرمەس نۇرلۇق خىياللار،
جىگدىلىكتە يىلىم ئالار قىز.

يۈرىكىدە بىر ئۇلۇغ گۈلخان،
كۈتۈشلىرى كۆتۈرگەن چۇقان،
چۇچۇپ-چۇچۇپ قارىغاچ ھەريان،
جىگدىلىكتە يىلىم ئالار قىز.

ئارام بەرمەي سېغىنىش، پىراق،
ھەسرەتلىرى ئۇزاق بەك ئۇزاق،
يېڭى چىققان ئوسمىدەك ئوماق،
جىگدىلىكتە يىلىم ئالار قىز.

لەۋلەر كۆيگەن چاغلارنى ئويلاپ،
بار ئەلەمنى باغرىغا چىڭداپ،
ئۆز-ئۆزىگە دەردلىك شىۋىرلاپ،
جىگدىلىكتە يىلىم ئالار قىز.

تۈنۈش شەپە كەلمەيدۇ ئەجەپ،
ئارمانلىرى كۈيەر گۈرۈلدەپ،
كۆزلىرىدە دەريا ئىسەدەپ،
جىگدىلىكتە يىلىم ئالار قىز.

سېغىنىشتا بۇلبۇلدەك سايراپ،
جىگدىلىكتە يىلىم ئالار قىز.
تەكرار-تەكرار كاككۇكتەك زارلاپ،
جىگدىلىكتە يىلىم ئالار قىز.

رىسىدە بولغان قىز چۈشىدە

ئەگىپ يۈرەر بۇرۇتلۇق ئەركەك،
رىسىدە بولغان قىز چۈشىدە.
ۋۇجۇدىدا بىر تاتلىق تىترەك،
باغرىدا چوغ ، گۈلخان كۆزىدە.

رىسىدە بولغان قىز چۈشىدە ،
باشتىن-ئاخىر سۆيگۈ يانغىنى.
تاڭغا تەشنا ئوتلۇق بىر ئارمان،
لەۋلىرىدە سۆيگۈ قاينىمى.

رىسىدە بولغان قىز چۈشىدە ،
قۇچاق ئېچىپ كېلەر بىر يىگىت.
كۆزلىرىدە مۇھەببەت قىيان،
باسار ئۇنى باغرىغا جىمجىت.

رىسىدە  بولغان قىز چۈشىدە ،
تەشنالىقتا ئەركىن ئەركىلەش.
ئۈمىدلىرى قۇياش چاقنىغان،
تاتلىق سۆيۈش، شىرىن بىر بەزلەش.

رىسىدە بولغان قىز چۈشىدە ،
تاغ ياسالغان چوغلار دۆۋلىنىپ.
گۈللەر ھىچكىم پۇراپ باقمىغان،
بەس-بەس بىلەن كەلگەن كۈيلىنىپ.

جۇپ-جۇپ قۇشلار ئايلىنار لەرزان،
بەسلىشىدۇ ئىگىزدە ، كۆكتە.
رىسىدە بولغان قىز چۈشىدە ،
ھىد چاچىدۇ گۈللەر بەس-بەستە.

قېرىندىشىم يۇلغۇن ، تىلى يەڭگىل ، لەرزان ، ئوتلۇق شېئىرلىرىڭىزنى  دائىم ئوقۇپ تۇرسام دەيمەن . ئىجادىيتىڭىز بەرىكەت تاپقاي !

ۋاي  ...ۋاي  شۇنداق ياقتى بۇ شېئىر  دىلغا جۇمۇ .

ئىجادىيىتىڭىز بەرىكەتلىك بولسۇن!