كۈيزار: تەكلىماكان قىسسى [ئۇلانما كۆچۈرۈش]

تەكلىماكان قىسسى

( نەسىر )

ئابلەت مۇھەممەت كۈيزار


1
پايانسىزلىققا تۇتاشقان چىغىر يولنىڭ ئارمان قۇشىغا ئايلانغان يولۇچىسىدىن ۋۇجۇدۇم لاۋۇلداپ يانىدۇ... ئەقىدە چېچەكلىرى كۆكلىگەن سۆيگۈ چىمەنىستانىدا، باھار جىلۋىسىنىڭ يۇلتۇزدەك پارلىغان تال- تال نۇرلىرىدىن سەھەر قۇياشىنىڭ تەكلىماكاندىن بېشىنى كۆتۈرۈپ، كەڭ سامادا ئەركىن پەر قىقىشىغا جۆر بولالايدىغان يېگانە توغراقلارنىڭ يۈرەك تىۋىشلىرىنى پۈتۈن جىمجىتلىقىم بىلەن بىلەن ئاڭلايمەن. جىمجىتلىق چوڭقۇرلاپ تۇرىدۇ....
تەنھالىق، باياۋانغا يامىشىۋاتقان باھادىرغا خاس بەردەملىكى بىلەن جىمجىتلىققا ئىللىق قۇچاق ئاچىدۇ. مېھىر ئۆركىشى ئېقىۋاتقان قۇم دېڭىزىدا پاكىزە ئېتقاد مېلۇدىيىسى جان دانچىلىرىغا ئايلىنىۋاتقان تارىختەك قەلىبلەرگە شولىسىنى سېپىدۇ. يۈرەكلەر پارلايدۇ.
قارلىق يوللاردا تېنىگەن سەھەر قۇچقاچلىرى تەكلىماكاندىن كەلگەن. گويا گۇگۇم سۈبھىگە ئۇلاشقىنىغا تەبەسسۇم قىلغاندەك قۇچقاچلارمۇ  تەكلىماكاننىڭ ئەبەدىي باھارى ئۈچۈن ناۋا قىلىشىدۇ.

2

تەكلىماكاندىن باشلانغان تۇغۇم، تەكلىماكاندا قېنىغا قايتىدۇ. مەۋجۇدىيەت ئالىمىنىڭ رەڭگارەڭ سەھىپىسىدە قالىدىغان ئىزلار رەڭگارەڭ ھەم چىغىر بولىدۇ. تەكلىماكاننىڭ جەڭنامىلىرىدىن بوۋام ئوغۇزخاننىڭ سىماسىنى قانماي- قانماي خىيال قىلىمەن. خارابىي قەلئەلەردە چاڭغا كۆمۈلۈپ ياتقان ھەقىقەت ئىچىدە، تەكلىماكان سۈپسۈزۈك ئۇنچىدەك ھاياتقا، ئالامگە چاراقلاپ تۇرىدۇ. تەكلىماكاندىن بۈگۈننىڭ شادىيانىسىنى تاماششا قىلىمەن.
يىراقتىن بىر گۈلخاننىڭ گۆرۈلدەپ كۆيۈشىنى كۆرگىنىمدە، ۋۇجۇدۇمدا ئەركەكلىك تۇيغۇلىرىم بار ئاۋازى بىلەن ھۇۋلايدۇ... تەكلىماكاندا تەكلىماكانغا جەم بولىمەن. ئۈمىد ۋۇلقانلىرى ئۇرغۇپ تۇرىدۇ.

3

تەكلىماكاننىڭ پىژغىرىمىدا تەرلەپ راھەتلىنىمەن. ۋۇجۇدۇم بىغۇبار ھارارەتكە تويۇنىدۇ. شادلىق جىلۋىلىرى گويا باھار يامغۇرىدەك تەكلىماكاندىلا ياغماقتا ئىدى.
ئاخىرقى تېنىقلىرىدا ئېقىۋاتقان زۇمرەت ئېقىندا بىر لەھزە ھاياتلىق بۇرۇندىن بۇرۇننىڭ قىسسى كەبى غۇۋا يېنىپ قالماقتا ئىدى. غۇۋالىق- سەھەرستان ئارامگاھىدىكى ئىشىكى يوق ھوجرىدۇر!
سەھەر_ كېچىنىڭ قوۋۇرغىسىدىن ئاپىرىدە بولغاندا، تەكلىماكاندىن نۇرانە كۆتۈرىلىدۇ.
تارىخنىڭ رىۋايىتىنى تارىخ سۆزلەيدۇ. تارىخنىڭ تارىخىدا يەنىلا چىنلىق گۇمان. تەكلىماكاننىڭ رىۋايىتىنى تەكلىماكان ئەركىسى توغراقلار سۆزلەيدۇ. توغراقلارنىڭ روھىدا مەڭگۈلۈك چىنلىق زامانغانغا ئاقىدۇ.

داۋامى بار

داۋامىغا تەشنامەن...!

داۋامىغا تەشنامەن

ئەسەردە ئىپادىلەنگەن ئىچكى تۇيغۇلارنىڭ نازۇك رىتىمىگە ئەگىشىپ ،تەكلىماكاندىكى قۇم بارخانلىرىنىڭ تەكتىگە چۆكۈپ كەتكەندەك بولدۇم...داۋامىنى تېزراق يوللىغايسىز...

            قۇم  ھەققىدىكى ئىزدىنىشلەر   قۇم  بۇيىدىكىلەرنىڭ  تەپەككۇرۇنى  ھەر ۋاقىت  غىدىقلاپ  قۇم ھەققىدىكى  ياخشى ئەسەرلەرنى مەيدانغا   چىقارماقتا...داۋامىغا  تەشنامەن.

مەن تەكلىماكانغا بېرىپ باقمىدىم، ئاشۇ قۇملاردىن سوراپ باقمىدىم . ئىچىمدە ياتىدۇ تۈمەن مىڭ سوئال، بۇنى ھىچكىمگە تىنىپ باقمىدىم.
تەكلىماكان دەپ بوۋامنىڭ چۆچىكىدىن چىقاتتىم. دادام ئېيتقان «زامان» لاردا ئاڭلاپ قالاتتىم. كىچىك ۋاقتىمدىكى ئەسلىمىلىرىمگە سىڭىپ كەتكەن تەكلىماكانغا شۇنداق بىر قېتىملا بېرىپ باققۇم بار ئىدى. بىراق يېزىپ قالمىدى سەپەر دېگەننى، بۇ كۈنلەرنىڭ ھىجرانلىقلىرى. يېزىپ باقمىدى سەپەر دېگەننى. بۇ كۈنلەرنىڭ غىرىبلىقى. شۇڭا مەن تىكىلىپ قالدىم كۈيزارنىڭ بۇ يازغان يازمىسىدىكى تەكلىماكانغا.

تەكلىماكانغا خىيالىمسىمان ئاستا سەپەر قىلىمەن.سەپەر قىلۋېتىپ توساتتىنلا توختايمەن...چۈنكى،تەكلىماكاننىڭ كەينى يېزىلمىغان...كەينىنى تېزاراق يېزىشىڭىزنى ئۈمىد قىلمەن ئاكا.

4

تەكلىماكاندا ئۈزۈۋاتقان يېگانە ياپراقلاردىن بوۋامنى سورايمەن. بوۋامنىڭ ئاۋازى ۋۇجۇدۇم ئاسمىنىدا قاراڭلاپ تۇرىدۇ. روھىم كۆتۈرەڭگۈلىشىپ، كۈچۈمگە كۈچ قوشۇلىدۇ. قانلىرىم ئۆزىدە جۇلالايدۇ!!
ئاپئاق تۇلپارغا مېنىپ كېلىۋاتقان بوۋاي تەكلىمكاندىن چىققان. ۋۇجۇدىدا چاراقلاپ تۇرغان بۈيۈك ئارمان تەكلىماكاننىڭ كەچمىشىدىن قاناتلانغان. تەكلىماكان مەنىۋىيەت قەلئەسىنىڭ سېھىرلىك تۇغۇمىدۇر!
تەكلىماكان قىسسى تەكلىماكاندا ياشىغان، تەكلىماكاننى ياشناتقان باھادىرلارنىڭ مەڭگۈلۈك تېنىقىدۇر!

2008- يىلى 8- نۇيابىر       سەھرايى ئالامەت